അഹമ്മദാബാദ്: ആഗോള സഞ്ചാര സ്വാതന്ത്ര്യ പട്ടികയിൽ സ്ഥാനം മെച്ചപ്പെടുത്തി ഇന്ത്യൻ പാസ്പോർട്ട്. ഏറ്റവും പുതിയ ഹെൻലി പാസ്പോർട്ട് സൂചിക 2026 അനുസരിച്ച്, ലോക റാങ്കിങ്ങിൽ ഇന്ത്യ ഇപ്പോൾ 80-ാം സ്ഥാനത്താണ്. ഇത് കഴിഞ്ഞ വർഷത്തെ 85-ാം സ്ഥാനത്ത് നിന്നുള്ള മുന്നേറ്റമാണ്.
ഇന്ത്യൻ പാസ്പോർട്ട് ഇപ്പോൾ 55 സ്ഥലങ്ങളിലേക്കാണ് വിസ രഹിത പ്രവേശനം നൽകുന്നത്. ഇത് അൾജീരിയക്ക് തുല്യമാണ്. മികച്ച മുന്നേറ്റമാണെങ്കിലും, ലോകത്തെ പ്രധാന ഭാഗങ്ങളിൽ ഇന്ത്യൻ പൗരന്മാർക്ക് ഇപ്പോഴും വിസ ആവശ്യമാണ്.
അതായത് മുൻനിര രാജ്യങ്ങളുമായി താരതമ്യപ്പെടുത്തുമ്പോൾ ആഗോള യാത്രാ സ്വാതന്ത്ര്യം പരിമിതമായി തുടരുന്നു. ഇന്ത്യയുടെ ഏറ്റവും മികച്ച പ്രകടനം 2006-ൽ ആണ്. അന്ന് 71-ാം സ്ഥാനത്തായിരുന്നു.
ലോകത്ത് ഏറ്റവും ശക്തമായ പാസ്പോർട്ട് ആർക്ക്?
തുടർച്ചയായ മൂന്നാം വർഷവും, ലോകത്തെ ഏറ്റവും ശക്തമായ പാസ്പോർട്ട് എന്ന കിരീടം സിങ്കപ്പുർ നിലനിർത്തുന്നു. ഇത് 227 ലക്ഷ്യസ്ഥാനങ്ങളിൽ 192 എണ്ണത്തിലേക്കും വിസ രഹിത പ്രവേശനം നൽകുന്നു. ജപ്പാനും ദക്ഷിണ കൊറിയയും 188 രാജ്യങ്ങളിലേക്കുള്ള പ്രവേശനത്തോടെ രണ്ടാം സ്ഥാനം പങ്കിടുന്നു.
ഡെൻമാർക്ക്, ലക്സംബർഗ്, സ്പെയിൻ, സ്വീഡൻ, സ്വിറ്റ്സർലൻഡ് എന്നിവ 186 ലക്ഷ്യസ്ഥാനങ്ങളോടെ മൂന്നാം സ്ഥാനത്ത് തുടരുന്നു. ഓസ്ട്രിയ, ബെൽജിയം, ഫിൻലാൻഡ്, ഫ്രാൻസ്, ജർമ്മനി, ഗ്രീസ്, അയർലണ്ട്, നെതർലാൻഡ്സ്, നോർവേ എന്നിവയുൾപ്പെടെ നിരവധി യൂറോപ്യൻ രാജ്യങ്ങൾ നാലാം സ്ഥാനത്തുണ്ട്. ഇവ 185 ലക്ഷ്യസ്ഥാനങ്ങളിലേക്ക് പ്രവേശനം നൽകുന്നു.
ടോപ് ഫൈവ് പൂർത്തിയാക്കുന്നത് ഹംഗറി, പോർച്ചുഗൽ, സ്ലൊവാക്കിയ, സ്ലോവേനിയ, യുഎഇ എന്നിവയാണ്. ഇവർക്ക് 184 സ്ഥലങ്ങളിലേക്ക് പ്രവേശനമുണ്ട്. സിങ്കപ്പുർ 192 ലക്ഷ്യസ്ഥാനങ്ങളോടെ റാങ്കിങ്ങിൽ മുന്നിട്ടുനിൽക്കുമ്പോൾ, അഫ്ഗാനിസ്ഥാൻ ഏറ്റവും താഴെയാണ്.
അവിടുത്തെ പൗരന്മാർക്ക് വിസ രഹിതമായി 24 സ്ഥലങ്ങൾ മാത്രമേ സന്ദർശിക്കാൻ കഴിയൂ. ഇന്ത്യയെ സംബന്ധിച്ചിടത്തോളം, മുന്നോട്ടുള്ള യാത്രയിൽ പുരോഗതിയുടെ സൂചനയുണ്ട്. എന്നാൽ യഥാർഥ ആഗോള സഞ്ചാര സ്വാതന്ത്ര്യം നേടുന്നതിന് ഇനിയും ഒരുപാട് ദൂരം പോകാനുണ്ട്.
