ഇതുവരെ രണ്ടാം ത്രൈമാസ പ്രവര്‍ത്തന ഫലം പ്രഖ്യാപിച്ച ഏഴ്‌ ഐടി കമ്പനികളില്‍ അഞ്ചും ഭാവിയില്‍ പ്രതീക്ഷിക്കുന്ന വളര്‍ച്ചാനിരക്ക്‌ വെട്ടിക്കുറച്ചു.
ഡിമാന്റ്‌ കുറയുന്ന സാഹചര്യം വളര്‍ച്ചയിലും പ്രതിഫലിക്കുമെന്നാണ്‌ വിവിധ ഐടി കമ്പനികളുടെ മാനേജ്‌മമെന്റുകള്‍ ചൂണ്ടികാട്ടുന്നത്‌.
ഇന്‍ഫോസിസ്‌, എച്ച്‌ സി എല്‍ ടെക്‌, എല്‍&ടി ടെക്‌ സര്‍വീസസ്‌, ഹാപ്പിയസ്റ്റ്‌ മൈന്റ്‌സ്‌ എന്നീ കമ്പനികള്‍ പ്രതീക്ഷിത വളര്‍ച്ചാ നിരക്ക്‌ വെട്ടിക്കുറച്ചപ്പോള്‍ വിപ്രോ അടുത്ത ത്രൈമാസങ്ങളില്‍ വരുമാനത്തില്‍ ഇടിവാണ്‌ പ്രതീക്ഷിക്കുന്നത്‌.
ജൂലായ്‌-സെപ്‌റ്റംബര്‍ ത്രൈമാസത്തില്‍ വിപ്രോയുടെ ലാഭത്തില്‍ 0.70 ശതമാനം വളര്‍ച്ച മാത്രമാണുണ്ടായത്‌. വരുമാനം 0.10 ശതമാനം ഇടിയുകയും ചെയ്‌തു.
എല്‍ടിഐ മൈന്റ്‌ ട്രീ വരുമാനത്തിലെ പ്രതീക്ഷിത വളര്‍ച്ചാ നിരക്ക്‌ സംബന്ധിച്ച്‌ വെളിപ്പെടുത്തലൊന്നും നടത്തിയില്ല. ടിസിഎസ്‌ ഒറ്റയക്ക വളര്‍ച്ചയാണ്‌ ഈ വര്‍ഷം പ്രതീക്ഷിക്കുന്നതെന്ന്‌ വ്യക്തമാക്കി.
ഐടി ഓഹരികളുടെ കഴിഞ്ഞ ഒരു മാസമായുള്ള പ്രകടനം ദുര്‍ബലമാണ്‌. കഴിഞ്ഞ ഒരു മാസത്തിനിടെ നിഫ്‌റ്റി ഐടി സൂചിക 4.60 ശതമാനമാണ്‌ ഇടിഞ്ഞത്‌. വിപ്രോ ഇക്കാലയളവില്‍ 6.5 ശതമാനവും ടെക്‌ മഹീന്ദ്ര 8 ശതമാനവും ഇടിഞ്ഞു.
