മുംബൈ: ഇന്ത്യയിലെ സംഘടിത ഗോൾഡ് ലോൺ മാർക്കറ്റ് 2026 മാർച്ചോടെ 15 ലക്ഷം കോടി രൂപയുടെ മൂല്യത്തിലെത്തുമെന്ന് റേറ്റിങ് ഏജൻസിയായ ICRA റിപ്പോർട്ട്. പ്രതീക്ഷിച്ചതിലും അധികം വളർച്ചയാണ് ഈ മേഖലയിലുണ്ടാകുന്നത്. സമീപ മാസങ്ങളിലായി സ്വർണ്ണ വിലയിലുണ്ടായ വലിയ വർധനയാണ് ഗോൾഡ് ലോൺ വിപണിക്ക് നേട്ടമായി മാറുന്നത്.
2027 സാമ്പത്തിക വർഷത്തോടെ ഗോൾഡ് ലോൺ മാർക്കറ്റ് 18 ലക്ഷം കോടി രൂപയിലേക്ക് വളർച്ച നേടുമെന്നും റിപ്പോർട്ട് പറയുന്നു. 2025 മാർച്ചിൽ 11.8 ലക്ഷം കോടി രൂപയുടെ മൂല്യമായിരുന്നു ഈ വിപണിക്കുണ്ടായിരുന്നത്.
നടപ്പ് സാമ്പത്തിക വർഷം ബാങ്കിതര ധനകാര്യ സ്ഥാപനങ്ങൾ കൈകാര്യം ചെയ്യുന്ന ആസ്തി (NBFC AUM) 30-35% വളർച്ച നേടും. സ്വർണ്ണ വില വർധിക്കുന്നതും, ഈട് നൽകേണ്ടതില്ലാത്ത അൺസെക്വേർഡ് വായ്പാ വിതരണത്തിലെ കുറഞ്ഞ വളർച്ചാ നിരക്കും ഇതിന് കാരണങ്ങളായി മാറുമെന്നാണ് വിലയിരുത്തുന്നത്.
ഗോൾഡ് ലോൺ ബിസിനസിലേക്ക് പുതിയ കമ്പനികൾ വൈവിദ്ധ്യവൽക്കരണത്തിനായി കടന്നു വരുന്നതും പുത്തൻ പ്രവണതയാണ്. രാജ്യത്തെ ഭവനങ്ങളിൽ ധാരാളം സ്വർണ്ണമുള്ളതും ഈ മേഖലയ്ക്ക് നേട്ടമായി മാറുകയാണ് ചെയ്യുകയെന്ന് വിദഗ്ധർ ചൂണ്ടിക്കാട്ടുന്നു.
2024-25 കാലഘട്ടത്തിൽ ഗോൾഡ് ലോൺ 26% CAGR വളർച്ചയാണ് നേടിയത്. 2025 മാർച്ചോടെ ഇത്തരത്തിൽ 11.8 ലക്ഷം കോടിയുടെ വിപണി മൂല്യത്തിലെത്തി. ബാങ്കിതര ധനകാര്യ സ്ഥാപനങ്ങളെ അപേക്ഷിച്ച് ഗോൾഡ് ലോൺ ബിസിനസിൽ ബാങ്കുകൾ അതിവേഗ വളർച്ചയാണ് ഇക്കാലയളവിൽ പ്രകടമാക്കിയത്.
2020 മുതൽ 2025 വരെയുള്ള ആറ് ധനകാര്യ വർഷങ്ങൾ പരിഗണിക്കുമ്പോൾ ബാങ്കുകളുടെ സ്വർണ്ണപ്പണയ വായ്പ 26% CAGR വളർച്ചയാണ് കൈവരിച്ചത്. അതേ സമയം സമാന കാലയളവിൽ ബാങ്കിതര ധനകാര്യ സ്ഥാപനങ്ങൾ 20% വളർച്ചയാണ് നേടിയതെന്നും ICRA റിപ്പോർട്ടിൽ പറയുന്നു.
82% വിപണി പങ്കാളിത്തത്തോടെ ബാങ്കുകൾ ഈ മാർക്കറ്റിൽ ആധിപത്യം പുലർത്തുന്നു.
ബാക്കി 18% മാത്രമാണ് എൻ.ബി.എഫ്.സികളുടെ പങ്കാളിത്തം. 2021 മാർച്ചിൽ എൻ.ബി.എഫ്.സികൾക്ക് 22% വിപണി പങ്കാളിത്തമുണ്ടായിരുന്നത് പിന്നീട് ക്രമാനുഗതമായി കുറയുന്ന കാഴ്ച്ചയാണുള്ളത്.
സ്വർണ്ണ വില പുതിയ ഉയരങ്ങൾ തൊടുന്നതോടെ ഗോൾഡ് ലോൺ ബിസിനസിലും മത്സരം മുറുകുകയാണ്. പലവിധ സ്കീമുകൾ ബാങ്കുകൾ അടക്കമുള്ള ധനകാര്യ സ്ഥാപനങ്ങൾ അവതരിപ്പിച്ചിട്ടുണ്ട്.
