മുംബൈ: ആഗോള സാമ്പത്തിക രംഗത്തെ പ്രതിസന്ധികൾക്കിടകയിലും ഇന്ത്യൻ സമ്പദ് വ്യവസ്ഥ ശക്തമാണെന്ന് ധനമന്ത്രാലയം. ഇന്ത്യയുടെ സാമ്പത്തിക രംഗം മികച്ച പ്രകടനം നടത്തുന്നു.
ഗാർഹിക ഗ്രാമീണ മേഖലകൾക്കിടയിലെ ശക്തമായ ഡിമാൻഡ്, മികച്ച നിക്ഷേപം, സ്ഥിരമായ ഉൽപ്പാദന വളർച്ച എന്നിവ ഇന്ത്യയുടെ സാമ്പത്തിക വളർച്ചക്ക് സഹായകരമായി. മാർച്ചിൽ റീട്ടെയിൽ പണപ്പെരുപ്പം കുറക്കാനായി.
മാർച്ച് മാസത്തെ സാമ്പത്തിക അവലോകന റിപ്പോ‍ർട്ടിലാണ് ഇന്ത്യയുടെ സാമ്പത്തിക വളർച്ച ശക്തമാണെന്ന സൂചനയുള്ളത്. ആഗോളതലത്തിൽ തന്നെ ഇപ്പോൾ പണപ്പെരുപ്പം നിയന്ത്രിക്കുന്നതിന് മുൻഗണന നൽകുന്നുണ്ട്.
2023-24 സാമ്പത്തിക വർഷത്തിലെ ഇന്ത്യയുടെ റീട്ടെയിൽ പണപ്പെരുപ്പം കുറഞ്ഞിട്ടുണ്ടെന്ന് റിപ്പോർട്ട് സൂചിപ്പിക്കുന്നു. ഇത് കൊവിഡ് വ്യാപനം ആരംഭിച്ചതിന് ശേഷമുള്ള ഏറ്റവും താഴ്ന്ന നിരക്കാണ്.
രാജ്യത്തുടനീളം വിലക്കയറ്റത്തിൽ വന്ന നേരിയ കുറവാണ് ആർബിഐ അടിസ്ഥാന പലിശ നിരക്കുകൾ മാറ്റമില്ലാതെ നിലനിർത്താൻ കാരണമെന്നും റിപ്പോർട്ടിൽ സൂചനയുണ്ട്. അതേസമയം നാലു ശതമാനം എന്ന ലക്ഷ്യം ഇപ്പോഴും അസ്ഥാനത്താണ്.
രാജ്യാന്തര നാണ്യ നിധി 2024 ഏപ്രിലിൽ ഇന്ത്യയുടെ വളർച്ചാ അനുമാനത്തിൽ മാറ്റം വരുത്തിയിരുന്നു. 2023-24 സാമ്പത്തിക വർഷത്തിലെ ഇന്ത്യയുടെ ജിഡിപി വളർച്ച 7.8 ശതമാനമാകും എന്നാണ് അനുമാനം.
2024 ജനുവരിയിൽ 6.7 ശതമാനം വളർച്ചയാണ് പ്രതീക്ഷിച്ചിരുന്നത്. 2024-25 ലെ ജിഡിപി വളർച്ച ഏഴു ശതമാനമായിരിക്കും എന്നാണ് ആർബിഐ പ്രവചനം.
2024 മാർച്ചിൽ ഇന്ത്യയിലെ ഓഹരി വിപണിയുടെ റെക്കോർഡ് പ്രകടനവും ജിഎസ്ടി പിരിവിലെ വ‍ർധനയും റിപ്പോർട്ട് ചൂണ്ടിക്കാട്ടുന്നു. ഇന്ത്യയിൽ, പണപ്പെരുപ്പം നിയന്ത്രിക്കാനുള്ള സർക്കാരിൻ്റെയും ആർബിഐയുടെയും ശ്രമങ്ങൾ ഫലം കണ്ടു.
മാർച്ചിൽ പണപ്പെരുപ്പം 10 മാസത്തെ താഴ്ന്ന നിലയിലാണ്.
