മുംബൈ: ഇന്ത്യയിലെ രണ്ടാമത്തെ വലിയ സ്വകാര്യ ബാങ്കാണ് ഐ.സി.ഐ.സി.ഐ ബാങ്ക്. ഇപ്പോഴിതാ ടാറ്റ ഗ്രൂപ്പ് കമ്പനിയായ ടാറ്റ കൺസൾട്ടൻസി സർവീസസിനെ (TCS) അറ്റാദായത്തിന്റെ കാര്യത്തിൽ ഈ ബാങ്ക് മറികടന്നിരിക്കുകയാണ്.
ഇതാദ്യമായി ഒരു സാമ്പത്തിക വർഷത്തിലെ ഐ.സി.ഐ.സി.ഐ ബാങ്കിന്റെ അറ്റാദായം 50,000 കോടി രൂപയ്ക്ക് മുകളിലെത്തി.
കഴിഞ്ഞ 5 വർഷത്തിൽ വാർഷികാടിസ്ഥാനത്തിൽ 40% ലാഭവളർച്ചയാണ് ബാങ്ക് നേടിയിരിക്കുന്നത്. ഇക്കഴിഞ്ഞ മാർച്ച് 31ന് അവസാനിച്ച സാമ്പത്തിക വർഷത്തിൽ ബാങ്കിന്റെ അറ്റാദായം 51,029 കോടി രൂപയാണ്.
താരതമ്യങ്ങളിൽ, ടി.സി.എസിന്റെ വരുമാന വളർച്ച 8.5% എന്ന തോതിൽ ഗതിവേഗം കുറഞ്ഞു നിൽക്കുന്നതായി കാണാം. കഴിഞ്ഞ സാമ്പത്തിക വർഷത്തിൽ ടി.സി.എസിന്റെ അറ്റാദായം 48,553 കോടി രൂപയാണ്.
ഇക്കഴിഞ്ഞ സാമ്പത്തിക വർഷത്തിൽ ഏറ്റവും കൂടുതൽ അറ്റാദായം നേടിയ മൂന്ന് കമ്പനികളാണ് സ്റ്റേറ്റ് ബാങ്ക് ഓഫ് ഇന്ത്യ, എച്ച്.ഡി.എഫ്.സി ബാങ്ക്, റിലയൻസ് ഇൻഡസ്ട്രീസ് എന്നിവ.
ഇതിൽ എസ്.ബി.ഐ ഇന്ത്യയിലെ ഏറ്റവും വലിയ വാണിജ്യ ബാങ്കും, എച്ച്.ഡി.എഫ്.സി ബാങ്ക് രാജ്യത്തെ ഏറ്റവും വലിയ സ്വകാര്യ ബാങ്കുമാണ്. ഏഷ്യയിലെ തന്നെ ഏറ്റവും വലിയ ധനികനായ മുകേഷ് അംബാനി നേതൃത്ത്വം നൽകുന്ന റിലയൻസ് ഇൻഡസ്ട്രീസ്, ഇന്ത്യയിലെ ഏറ്റവും വിപണി മൂല്യം കൂടിയ കമ്പനിയുമാണ്.
മൂന്ന് വർഷം മുമ്പ് വരെ, കൂടുതൽ അറ്റാദായം നേടിയ കമ്പനികളിൽ റിലയൻസ് ഇൻഡസ്ട്രീസിന് പിന്നിൽ രണ്ടാമതായിരുന്നു ടി.സി.എസിന്റെ സ്ഥാനം. ആ സമയത്ത് രാജ്യത്തെ പ്രമുഖ ബാങ്കുകളായ എസ്.ബി.ഐ, എച്ച്.ഡി.എഫ്.സി, ഐ.സി.ഐ.സി.ഐ എന്നിവയേക്കാൾ അറ്റാദായം ടി.സി.എസ് നേടിയിരുന്നതായി കാണാം.
അതേ സമയം മാർക്കറ്റ് ക്യാപ്പിറ്റലൈസേഷൻ അടിസ്ഥാനത്തിൽ റിലയൻസിനും, എച്ച്.ഡി.എഫ്.സി ബാങ്കിനും പിന്നിൽ മൂന്നാമതാണ് ടി.സി.എസിന്റെ സ്ഥാനം.
11.4 ലക്ഷം കോടി രൂപ വാല്യുവേഷനുള്ള ഭാരതി എയർടെൽ നാലാമതും, 10.17 ലക്ഷം കോടി രൂപ മാർക്കറ്റ് ക്യാപ്പുള്ള ഐ.സി.ഐ.സി.ഐ ബാങ്ക് അഞ്ചാമതുമാണ്. മെയ് 08 പ്രകാരം ടി.സി.എസിന്റെ മാർക്കറ്റ് ക്യാപ് 12.48 ലക്ഷം കോടി രൂപയാണ്.
2025 ജനുവരി മുതൽ, ഈ കലണ്ടർ വർഷത്തിൽ ഐ.സി.ഐ.സി.ഐ ബാങ്ക് ഓഹരികൾ 12% നേട്ടത്തോടെ നിഫ്റ്റി സൂചികയേക്കാൾ മികച്ച പ്രകടനം നടത്തി. അതേ സമയം സമാന കാലയളവിൽ ടി.സി.എസ് ഓഹരികളിൽ 15% ഇടിവാണുണ്ടായിരിക്കുന്നത്.
