മുംബൈ: രണ്ടാം പാദത്തിൽ 151.22 കോടി രൂപയുടെ ഏകീകൃത അറ്റാദായം രേഖപ്പെടുത്തി ഗുജറാത്ത് മിനറൽ ഡെവലപ്മെന്റ് കോർപ്പറേഷൻ (ജിഎംഡിസി). ഇതോടെ കമ്പനിയുടെ ഓഹരി 3.11 ശതമാനം ഉയർന്ന് 145.75 രൂപയിലെത്തി.
2022 സെപ്തംബർ 30ന് അവസാനിച്ച പാദത്തിൽ പ്രവർത്തനങ്ങളിൽ നിന്നുള്ള വരുമാനം മുൻ വർഷത്തെ 451.88 കോടിയിൽ നിന്ന് 19.26 ശതമാനം ഉയർന്ന് 538.92 കോടി രൂപയായി വർധിച്ചു. അതേപോലെ നികുതിക്ക് മുമ്പുള്ള ലാഭം 204.28 കോടി രൂപയായി ഉയർന്നു. ഇത് മുൻ വർഷം ഇതേ കാലയളവിൽ 48.80 കോടി രൂപയായിരുന്നു.
കമ്പനിയുടെ മൈനിങ് വിഭാഗത്തിൽ നിന്നുള്ള വരുമാനം 484.75 കോടി രൂപയും ( 21.33% വർധന) ഊർജ്ജ വിഭാഗത്തിൽ നിന്നുള്ള വരുമാനം 72.21 കോടി രൂപയുമാണ് (1.06% വർധന). ഇന്ത്യയിലെ മുൻനിര ഖനന കമ്പനികളിലൊന്നാണ് ജിഎംഡിസി. സർക്കാർ ഉടമസ്ഥതയിലുള്ള കമ്പനിക്ക് നിലവിൽ കച്ച്, ദക്ഷിണ ഗുജറാത്ത്, ഭാവ്നഗർ മേഖലകളിൽ അഞ്ച് പ്രവർത്തനക്ഷമമായ ലിഗ്നൈറ്റ് ഖനികളുണ്ട്.
