പട്ടിണിയും ഉത്പാദനക്ഷാമവും മൂലം രാജ്യത്തിന്റെ മുഖം മങ്ങിയിരുന്ന ഒരു കാലഘട്ടം. അന്നായിരുന്നു കാര്‍ഷിക രംഗത്തിന്റെ കഥ മാറ്റിമറിച്ച ഡോ.എംഎസ് സ്വാമിനാഥന്റെ ജനനം. കാര്‍ഷിക ശാസ്ത്രത്തെയും ആഹാര സുരക്ഷയെയും ജീവിത ലക്ഷ്യമായി കണ്ട അദ്ദേഹം മണ്ണിനോടും മനുഷ്യനോടും ഉത്തരവാദിത്വമുള്ള ശാസ്ത്രം എന്ന ആശയം മുന്‍ നിര്‍ത്തിയാണ് പ്രവര്‍ത്തിച്ചത്. അദ്ദേഹം വികസിപ്പിച്ച ഹൈബ്രിഡ് വിള വര്‍ഗങ്ങള്‍ ഇന്ത്യയെ പട്ടിണിയിലേക്കും ദാരിദ്രത്തിലേക്കും തള്ളിയിരുന്ന അവസ്ഥയില്‍ നിന്നും സ്വയംപര്യാപ്തതയിലേക്ക് നയിച്ചു. അത് ലോകം ഗ്രീന്‍ റിവല്യൂഷന്‍ എന്നു വിളിച്ച ഹരിത വിപ്ലവത്തിന്റെ തുടക്കമായിരുന്നു.
ഡോ.സ്വാമിനാഥന്‍ സാങ്കേതികവിദ്യയും മനുഷ്യാവബോധവും സമന്വയിപ്പിച്ച് പ്രവര്‍ത്തിച്ച ശാസ്ത്രജ്ഞനായിരുന്നു. അദ്ദേഹം ഗവേഷണത്തിലൂടെ വിളകളില്‍ മൂന്ന് ഇരട്ടിയിലധികം വര്‍ധനവുണ്ടാക്കി. ഗോതമ്പ്, നെല്ല്, പയര്‍ വര്‍ഗങ്ങള്‍ തുടങ്ങിയ വിളകളില്‍ ഉയര്‍ന്ന ഉത്പാദന ശേഷിയുള്ള വിത്തുകള്‍ വികസിപ്പിച്ചു. ഇതോടെ ഇന്ത്യ വിദേശ രാജ്യങ്ങളെ ആശ്രയിക്കലില്‍ നിന്ന് സ്വയംപര്യാപ്തതയിലേക്ക് മാറി. അത് ശാസ്ത്രത്തിന്റെ രാഷ്ട്രീയത്തിനുമപ്പുറം സാമൂഹ്യ വിപ്ലവമായി. കേരളത്തിലും അദ്ദേഹത്തിന്റെ ആശയങ്ങള്‍ ആഴത്തില്‍ പതിഞ്ഞു. ജൈവ കൃഷിയും മണ്ണിന്റെ പുനഃരുദ്ധാരണവും, ജല സംരക്ഷണം, ചെറു കര്‍ഷകരുടെ ശാക്തീകരണം തുടങ്ങിയ മേഖലകളില്‍ അദ്ദേഹത്തിന്റെ പ്രചോദനം പ്രകടമായിരുന്നു.
ഭൂമിയെയും മനുഷ്യനെയും രക്ഷിക്കുന്ന കൃഷിയാണ് യഥാര്‍ത്ഥ പുരോഗതിയെന്ന അദ്ദേഹത്തിന്റെ ആശയം കേരളത്തിലെ ജൈവ സംരംഭങ്ങള്‍ക്കും ജൈവ കര്‍ഷക പ്രസ്ഥാനങ്ങള്‍ക്കും അടിത്തറയായി. അദ്ദേഹം പ്രോത്സാഹിപ്പിച്ച സുസ്ഥിര കൃഷിയെന്ന ആശയം പിന്നീട് കേരളത്തിന്റെ കാര്‍ഷിക നയങ്ങളിലെ പ്രധാന ഘടകമായി. പച്ച വിപ്ലവം വെറും ഉത്പാദനത്തിന്റെ കഥയല്ല, അത് പ്രതീക്ഷയുടേത് കൂടിയാണ്. സ്വാമിനാഥന്റെ ശാസ്ത്രീയ പ്രാഗത്ഭ്യം ഇന്ത്യന്‍ ഗ്രാമങ്ങളുടെ ആത്മവിശ്വാസമായിത്തീര്‍ന്നു. കേരളത്തിലെ കര്‍ഷകര്‍ ഇന്ന് മണ്ണിനെയും മഴയെയും ശാസ്ത്രത്തിന്റെ കണ്ണുകളിലൂടെ കാണുമ്പോള്‍, അതിന്റെ പിറകില്‍ സ്വാമിനാഥന്റെ ദീര്‍ഘദര്‍ശനമാണ്. 2023-ല്‍ അദ്ദേഹം വിട വാങ്ങിയപ്പോള്‍ രാജ്യത്തിന് നഷ്ടമായത് ഒരു ശാസ്ത്രജ്ഞനെ മാത്രമല്ല, ഒരു ജീവിത ദര്‍ശനം കൂടിയാണ്. പച്ചപ്പിലൂടെ ഇന്ത്യയെ രക്ഷിച്ച മഹാ വൃക്ഷം എന്നാണ് അദ്ദേഹത്തെ വിശേഷിപ്പിക്കേണ്ടത്. സ്വാമിനാഥന്‍ കര്‍ഷകരുടെ മാത്രം ശാസ്ത്രജ്ഞനല്ല, മണ്ണിനോടും മനുഷ്യനോടുമുള്ള ശാസ്ത്രീയ സ്നേഹത്തിന്റെ പ്രതീകമാണ്.
