മുംബൈ: ഗജ ക്യാപിറ്റലിന്റെ നേതൃത്വത്തിലുള്ള നിക്ഷേപകരിൽ നിന്ന് 210 കോടി രൂപ (അല്ലെങ്കിൽ 26 ദശലക്ഷം ഡോളർ) സമാഹരിച്ച് ഡിജിറ്റൽ ബാങ്കിംഗ് ഇൻഫ്രാസ്ട്രക്ചർ പ്രൊവൈഡറായ സിഗ്സി. വിപുലീകരണ പദ്ധതിയെ പിന്തുണയ്ക്കുന്നതിനായി ആണ് കമ്പനി ധന സമാഹരണം നടത്തിയത്.
നിലവിലുള്ള നിക്ഷേപകരായ വെർടെക്സ് വെഞ്ചേഴ്സ്, അർക്കം വെഞ്ച്വേഴ്സ് എന്നിവയും ഫണ്ടിംഗ് റൗണ്ടിൽ പങ്കെടുത്തതായി ബെംഗളൂരു ആസ്ഥാനമായുള്ള സിഗ്സി പറഞ്ഞു. ബാങ്കിംഗ്, ഫിനാൻഷ്യൽ സർവീസ് ക്ലയന്റുകളിലുടനീളം തങ്ങളുടെ പ്ലാറ്റ്ഫോം വ്യാപിപ്പിക്കുന്നതിനും നിലവിലുള്ള ഉൽപ്പന്ന നിരയെ ശക്തിപ്പെടുത്തുന്നതിനും ഈ ഫണ്ട് ഉപയോഗിക്കുമെന്ന് കമ്പനി അറിയിച്ചു.
2015-ൽ സ്ഥാപിതമായ സിഗ്സി, ഫിൻടെക്കുകൾ, ധനകാര്യ സ്ഥാപനങ്ങൾ, ബാങ്കുകൾ എന്നിവയെ മൾട്ടി-ചാനൽ ഓൺ-ബോർഡിംഗുമായി സംയോജിപ്പിക്കുന്നതിനും ആർട്ടിഫിഷ്യൽ ഇന്റലിജൻസ് വഴി ബാക്ക്-ഓഫീസ് പ്രവർത്തനങ്ങൾ ഓട്ടോമേറ്റ് ചെയ്യുന്നതിനുമുള്ള ഒരു ഡിജിറ്റൽ സോഫ്റ്റ്വെയർ പ്ലാറ്റ്ഫോം വാഗ്ദാനം ചെയ്യുന്നു.
കമ്പനിയുടെ നോ-കോഡ് പ്ലാറ്റ്ഫോമായ ‘Go’, 240-ലധികം ആപ്ലിക്കേഷൻ പ്രോഗ്രാമിംഗ് ഇന്റർഫേസിന്റെ (API-കൾ) സംയോജിത വിപണിയിലേക്ക് ആക്സസ് നൽകുന്നു. വീഡിയോ കെവൈസി വെരിഫിക്കേഷൻ, ക്രെഡിറ്റ് ചെക്കുകൾ, അസറ്റ് ആധികാരികത തുടങ്ങിയ പ്രവർത്തനങ്ങളിൽ കമ്പനി പങ്കാളി ധനകാര്യ സ്ഥാപനങ്ങളെ സഹായിക്കുന്നു.
ഇന്ത്യയിലെ നാല് വലിയ ബാങ്കുകൾ ഉൾപ്പെടെ ആഗോളതലത്തിലെ 240-ലധികം ധനകാര്യ സ്ഥാപനങ്ങളുമായി സ്റ്റാർട്ടപ്പ് ചേർന്ന് പ്രവർത്തിക്കുന്നു. മാസ്റ്റർകാർഡുമായും മൈക്രോസോഫ്റ്റുമായും സിഗ്സിക്ക് പങ്കാളിത്തമുണ്ട്.
