തൃശൂർ: ധനലക്ഷ്മി ബാങ്ക് 2022-23 സാമ്പത്തിക വർഷത്തിൽ 49.36 കോടി രൂപ ലാഭം കൈവരിച്ചു. മുൻ സാമ്പത്തികവർഷം 35.90 കോടി രൂപയായിരുന്നു ബാങ്കിന്റെ അറ്റ ലാഭം. ഇക്കാലയളവിലെ പ്രവർത്തനലാഭം 123.20 കോടി രൂപയാണ്.
മാർച്ചിൽ അവസാനിച്ച നാലാം പാദത്തിലെ ലാഭം 38.17 കോടി രൂപയാണ്. മുൻ കാലയളവിൽ ഇത് 23.42 കോടി രൂപയായിരുന്നു. ഈ സാമ്പത്തിക വർഷത്തിലെ നാലാം പാദ പ്രവർത്തന ലാഭം 38.56 കോടി രൂപയാണ്.
ബാങ്കിന്റെ മൊത്തം ബിസിനസ് 11.32 ശതമാനം വളർച്ച കൈവരിച്ച് 23,206 കോടി രൂപയായി. മുൻ സാമ്പത്തികവർഷത്തിൽ മൊത്തം ബിസിനസ് 20847 കോടി രൂപയായിരുന്നു.
നിക്ഷേപം 7.65 ശതമാനം വളർച്ച കൈവരിച്ച് 12,403 കോടി രൂപയിൽ നിന്നും 13352 കോടി രൂപയായി. നിക്ഷേപത്തിന്റെ 31.91 ശതമാനം കറന്റ്, സേവിങ്സ് ബാങ്ക് നിക്ഷേപമാണ്. ആകെ വായ്പ 16.70% ശതമാനം വർദ്ധനവ് രേഖപ്പെടുത്തി 8444 കോടി രൂപയിൽ നിന്നും 9,854 കോടി രൂപയായി.
സ്വർണ പണയ വായ്പയിൽ 23.39% വാർഷിക വളർച്ച നേടിക്കൊണ്ട് 1,843 കോടി രൂപയിൽ നിന്നും 2,274 കോടി രൂപയായി. വായ്പാ നിക്ഷേപ അനുപാതം 68.08% ത്തിൽ നിന്നും 73.80% ആയി ഉയർന്നിട്ടുണ്ട്.
അറ്റ പലിശ വരുമാനം 362.31 കോടി രൂപയിൽ നിന്നും 475.76 കോടി രൂപയായി വർദ്ധിച്ച് വാർഷികാടിസ്ഥാനത്തിൽ 31.31% വർദ്ധനവ് രേഖപ്പെടുത്തി. അറ്റ പലിശ വരുമാന തോത് 3.00% ശതമാനത്തിൽ നിന്നും 3.60% ആയി ഉയർന്നു.
മൊത്തം വരുമാനം 5.53% വാർഷിക വളർച്ചയോടെ 60 കോടി വർദ്ധിച്ച് 1,085.75 കോടി രൂപയിൽ നിന്നും 1,145.75 കോടി രൂപയായി.
മൊത്തം നിഷ്ക്രിയ ആസ്തി വാർഷികാടിസ്ഥാനത്തിൽ 6.32 ശതമാനത്തിൽ നിന്ന് 5.19 ശതമാനമായും അറ്റ നിഷ്ക്രിയ ആസ്തി 2.85 ശതമാനത്തിൽ നിന്ന് 1.16 ശതമാനമായും കുറയ്ക്കാൻ ബാങ്കിന് കഴിഞ്ഞു.
സാമ്പത്തിക വർഷാന്ത്യത്തിൽ 12.32 ശതമാനം ആണ് ബാങ്കിന്റെ മൂലധന പര്യാപ്തത അനുപാതം. മാർച്ചിൽ ബാങ്കിന്റെ ഓഹരിയുടെ ബുക്ക് വാല്യു 35.57 രൂപയിൽ നിന്നും 37.99 രൂപയായി വർദ്ധിച്ചിട്ടുണ്ട്.
