കൊച്ചി: ദക്ഷിണേന്ത്യയിലെ ചെറു പട്ടണങ്ങളിലേക്ക് എയർ കണക്ടിവിറ്റി വർദ്ധിപ്പിക്കാൻ ലക്ഷ്യമിട്ട് കൊച്ചി രാജ്യാന്തര വിമാനത്താവള കമ്പനി(സിയാൽ) പുതിയ സർവീസുകൾ ആരംഭിക്കുന്നു.
അലയൻസ് എയറുമായി ചേർന്ന് കൊച്ചിയിൽ നിന്ന് കണ്ണൂർ, ട്രിച്ചി, മൈസൂരു, തിരുപ്പതി എന്നിവിടങ്ങളിലേക്കാണ് പുതിയ സർവീസുകൾ തുടങ്ങുന്നത്.
പുലർകാലത്തും രാത്രി വൈകിയും കൊച്ചിയിൽ നിന്ന് സർവീസ് ആരംഭിക്കാൻ സഹായിക്കും വിധം അലയൻസ് എയറിന്റെ എ.ടി.ആർ വിമാനങ്ങൾക്ക് ഓവർനൈറ്റ് പാർക്കിംഗ് സംവിധാനവും ഒരുക്കുമെന്ന് സിയാൽ വ്യക്തമാക്കി.
നിലവിൽ കൊച്ചിയിൽ നിന്നും അഗത്തി, സേലം, ബാംഗ്ളൂർ റൂട്ടുകളിൽ അലയൻസ് എയർ സർവീസുകൾ നടത്തുന്നുണ്ട്.
പ്രാദേശിക നഗരങ്ങളിലേക്കുള്ള സർവീസുകളുടെ എണ്ണത്തിലെ വർദ്ധന സംസ്ഥാനത്തെ വിനോദ സഞ്ചാര മേഖലയ്ക്ക് കൂടുതൽ കരുത്ത് പകരുമെന്ന് സിയാൽ പത്രക്കുറിപ്പിൽ പറഞ്ഞു.
