ബീജിംഗ്: യു.എസിലേക്കുള്ള ചൈനീസ് കയറ്റുമതിയില് ഓഗസ്റ്റില് 33 ശതമാനം ഇടിവ് രേഖപ്പെടുത്തി. കഴിഞ്ഞ ആറുമാസത്തിനിടയിലെ താഴ്ന്ന നിരക്കിലാണ് യു.എസിലേക്കുള്ള കയറ്റുമതി. അതേസമയം, മൊത്തം കയറ്റുമതിയില് വര്ധന രേഖപ്പെടുത്താന് ചൈനയ്ക്ക് സാധിക്കുകയും ചെയ്തു. മുന് വര്ഷത്തെ അപേക്ഷിച്ച് 4.4 ശതമാനത്തിന്റെ വര്ധനയാണ് മൊത്തം കയറ്റുമതിയില് രേഖപ്പെടുത്തിയത്.
യു.എസില് നിന്ന് ചൈനയിലേക്കുള്ള കയറ്റുമതിയിലും ഇടിവുണ്ടായി. 16 ശതമാനമാണ് മുന് വര്ഷത്തെ അപേക്ഷിച്ച് താഴ്ന്നത്. യു.എസിന്റെ താരിഫ് വര്ധനയാണ് ചൈനീസ് കയറ്റുമതിക്ക് തിരിച്ചടിയായത്.
ഓഗസ്റ്റില് ചൈനീസ് കയറ്റുമതി 4.4 ശതമാനം വര്ധിച്ചെങ്കിലും ഫെബ്രുവരിക്കു ശേഷമുള്ള താഴ്ന്ന വളര്ച്ചാ നിരക്കാണിത്. മറ്റ് രാജ്യങ്ങള് വഴിയുള്ള കയറ്റുമതിക്കും യു.എസ് തീരുവ വര്ധിപ്പിക്കുന്നത് ചൈനീസ് കയറ്റുമതിക്ക് തിരിച്ചടിയാകുമെന്നാണ് വിദഗ്ധര് പറയുന്നത്.
കഴിഞ്ഞ മാസം ചൈനയുടെ ഇറക്കുമതിയില് 1.3 ശതമാനത്തിന്റെ വര്ധനയുണ്ടായി. സാമ്പത്തികരംഗത്ത് നിലനില്ക്കുന്ന പ്രശ്നങ്ങള് അവസാനിച്ചില്ലെന്ന് വിലയിരുത്തലാണുള്ളത്. യു.എസ് വിപണിയില് പ്രതിസന്ധി ഉടലെടുത്തതോടെ മറ്റ് വിപണികളില് കൂടുതല് ശ്രദ്ധ കേന്ദ്രീകരിക്കുക എന്ന നിലയിലേക്കാണ് ചൈനയും നീങ്ങുന്നത്. ദക്ഷിണേഷ്യ, യൂറോപ്യന് രാജ്യങ്ങള്, ലാറ്റിനമേരിക്ക, ആഫ്രിക്ക തുടങ്ങിയ വിപണികളിലേക്ക് കൂടുതല് കയറ്റുമതിക്ക് ചൈന ശ്രമം തുടങ്ങിയിട്ടുണ്ട്. യൂറോപ്യന് യൂണിയന് രാജ്യങ്ങളിലേക്കുള്ള കയറ്റുമതിയില് ഓഗസ്റ്റില് 7.7 ശതമാനം വര്ധിച്ചു. ആസിയാന് രാജ്യങ്ങളിലേക്ക് 14.6%, ആഫ്രിക്ക 24.6%, ലാറ്റിനമേരിക്ക 6% എന്നിങ്ങനെ കയറ്റുമതി വര്ധിച്ചു.
