മുംബൈ: കമ്പനിയുടെ ഹാസിറ പ്ലാന്റ് വികസിപ്പിക്കാൻ ആർസലർ മിത്തലിന്റെ വിഭാഗമായ എഎംഎൻഎസ് ഇന്ത്യ 60,000 കോടി രൂപ നിക്ഷേപിക്കുമെന്ന് ചെയർമാൻ ആദിത്യ മിത്തൽ പറഞ്ഞു. പ്ലാന്റിന്റെ നിലവിലെ ശേഷി 9 മെട്രിക് ടൺ ആണ്.
പ്ലാന്റിന്റെ ശേഷി 15 മെട്രിക് ടണ്ണായി ഉയർത്താൻ തങ്ങൾ 60,000 കോടി രൂപ നിക്ഷേപിക്കുമെന്ന് വിപുലീകരണ പദ്ധതിയുടെ ഭൂമി പൂജ നിർവഹിച്ച ശേഷം മിത്തൽ പറഞ്ഞു. പുതിയ സ്റ്റീൽ നിർമ്മാണ സാങ്കേതികവിദ്യകൾ സ്ഥാപിക്കൽ, പുതിയ കാലത്തെ യന്ത്രസാമഗ്രികൾ സ്ഥാപിക്കൽ, ഉൽപന്ന മിശ്രിതം വർദ്ധിപ്പിക്കൽ എന്നിവയിലായിരിക്കും നിക്ഷേപമെന്ന് അദ്ദേഹം പറഞ്ഞു.
വിപുലീകരണ പദ്ധതിയുടെ ഭാഗമായി പ്ലാന്റിലേക്ക് ഹരിത ഊർജം നൽകുന്നതിന് പുനരുപയോഗിക്കാവുന്ന ഊർജ്ജ സ്രോതസ്സ് സ്ഥാപിക്കുമെന്നും മിത്തൽ പറഞ്ഞു. എഎംഎൻഎസ് ഇന്ത്യയിൽ 60 ശതമാനം ഇക്വിറ്റി കൈവശം വച്ചിരിക്കുന്ന ആർസെലർ മിത്തലിന്റെ സിഇഒ കൂടിയാണ് ആദിത്യ മിത്തൽ. കമ്പനിയുടെ വിവിധ തലങ്ങളിലായി രാജ്യത്തുടനീളം 60,000 തൊഴിലവസരങ്ങൾ ഈ നിക്ഷേപം സൃഷ്ടിക്കുമെന്ന് പ്രതീക്ഷിക്കുന്നു.
പ്ലാന്റിന്റെ നിർദിഷ്ട വിപുലീകരണത്തിന് പാരിസ്ഥിതിക അനുമതി ലഭിച്ചതായി ഒക്‌ടോബർ ആറിന് സ്റ്റീൽ നിർമാതാക്കളായ എഎംഎൻഎസ് അറിയിച്ചു. ജപ്പാനിലെ നിപ്പോൺ സ്റ്റീലിന്റെയും ആർസലർ മിത്തലിന്റെയും സംയുക്ത സംരംഭമാണ് ആർസെലർ മിത്തൽ നിപ്പോൺ സ്റ്റീൽ (എഎംഎൻഎസ്) ഇന്ത്യ.
