മുംബൈ: രാജ്യത്തെ ടെലികോം വിപണിയിലെ കടുത്ത മത്സരത്തിനിടെ ജൂലൈയിൽ പുതിയ മൊബൈൽ ഉപഭോക്താക്കളെ സ്വന്തമാക്കുന്നതിൽ ഭാരതി എയർടെൽ മുന്നിലെത്തി. ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) പുറത്തുവിട്ട ഏറ്റവും പുതിയ കണക്കുകൾ പ്രകാരം ജൂലൈയിൽ എയർടെൽ 26.88 ലക്ഷം പുതിയ വയർലെസ് ഉപഭോക്താക്കളെയാണ് ചേർത്തത്. അതേസമയം, രാജ്യത്തെ ഏറ്റവും വലിയ ടെലികോം സേവനദാതാവായ റിലയൻസ് ജിയോ 24.46 ലക്ഷം പുതിയ ഉപഭോക്താക്കളെ നേടി.
പുതിയ ഉപഭോക്താക്കളെ ചേർക്കുന്നതിൽ എയർടെൽ ജിയോയെ മറികടന്നെങ്കിലും മൊത്തം ഉപഭോക്തൃ അടിത്തറയിൽ ജിയോ തന്നെയാണ് മുന്നിൽ. ജൂലൈ അവസാനത്തോടെ ജിയോയുടെ വയർലെസ് ഉപഭോക്താക്കളുടെ എണ്ണം 50.60 കോടിയായി.
എയർടെലിന്റെ മൊത്തം ഉപഭോക്തൃ അടിത്തറ 48.94 കോടിയിലുമെത്തി. ജൂലൈയിലെ നേട്ടം എയർടെലിന്റെ ഉപഭോക്തൃ അടിത്തറയിൽ കൂടുതൽ ശക്തമായ മുന്നേറ്റമാണ് സൂചിപ്പിക്കുന്നത്.
മറ്റ് ടെലികോം കമ്പനികളും ജൂലൈയിൽ ഉപഭോക്താക്കളെ കൂട്ടി. വോഡഫോൺ ഐഡിയയ്ക്ക് 2.40 ലക്ഷം പുതിയ വയർലെസ് ഉപഭോക്താക്കളെ ലഭിച്ചപ്പോൾ പൊതുമേഖലാ സ്ഥാപനമായ ബി.എസ്.എൻ.എൽ 1.68 ലക്ഷം ഉപഭോക്താക്കളെ കൂട്ടിച്ചേർത്തു. ഇതോടെ വോഡഫോൺ ഐഡിയയുടെ മൊത്തം ഉപഭോക്തൃ അടിത്തറ 19.90 കോടിയായി.
അതേസമയം, രാജ്യത്തെ മൊത്തം വയർലെസ് ടെലികോം വിപണിയിലും ജൂലൈയിൽ ശ്രദ്ധേയമായ വളർച്ചയുണ്ടായി. മാസത്തിൽ 55.38 ലക്ഷം ഉപഭോക്താക്കൾ കൂടി, രാജ്യത്തെ മൊത്തം വയർലെസ് ഉപഭോക്താക്കളുടെ എണ്ണം 128.79 കോടിയിലെത്തി. ജൂൺ അവസാനത്തിൽ ഇത് 128.23 കോടിയായിരുന്നു. ഉപഭോക്താക്കളുടെ വർധനവിനൊപ്പം ബ്രോഡ്ബാൻഡ് മേഖലയിലും വളർച്ച രേഖപ്പെടുത്തി.
ട്രായിയുടെ കണക്കുകൾ പ്രകാരം ജൂൺ അവസാനം രാജ്യത്തെ ബ്രോഡ്ബാൻഡ് ഉപഭോക്താക്കളുടെ എണ്ണം 108.75 കോടിയായിരുന്നു. ജൂലൈയിൽ ഇത് 109.44 കോടിയായി ഉയർന്നു. ഒരു മാസത്തിനിടെ 0.64 ശതമാനം വളർച്ചയാണ് രേഖപ്പെടുത്തിയത്.
1,562 ഓപ്പറേറ്റർമാരിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് ട്രായ് ഈ കണക്കുകൾ പുറത്തുവിട്ടത്.
പുതിയ കണക്കുകൾ ഇന്ത്യൻ ടെലികോം വിപണിയിൽ എയർടെലും ജിയോയും തമ്മിലുള്ള മത്സരം കൂടുതൽ ശക്തമായി തുടരുന്നതിന്റെ സൂചന കൂടിയാണ്. മൊത്തം ഉപഭോക്തൃ എണ്ണത്തിൽ ജിയോ മുന്നിലാണെങ്കിലും, പുതിയ കണക്ഷനുകൾ നേടുന്നതിൽ എയർടെൽ കൈവരിച്ച മുന്നേറ്റം വിപണിയിലെ കമ്പനികളുടെ മത്സര തന്ത്രങ്ങൾക്ക് നിർണായകമാകും.
