മുംബൈ: ഇൻഫ്ലെക്ഷൻ പോയിന്റ് വെഞ്ചേഴ്സിന്റെ നേതൃത്വത്തിലുള്ള പ്രീ-സീരീസ് എ റൗണ്ടിൽ 3 മില്യൺ ഡോളർ സമാഹരിച്ച് അഗ്രിടെക് പ്ലാറ്റ്ഫോമായ ഫാൽക്ക. ലെറ്റ്സ്വെഞ്ചർ, മുംബൈ ഏഞ്ചൽസ്, മറ്റ് ഉയർന്ന മൂല്യമുള്ള വ്യക്തികൾ (എച്ച്എൻഐകൾ) എന്നിവരും ഈ ഫണ്ടിംഗ് റൗണ്ടിൽ പങ്കെടുത്തു.
ഡെറ്റ്, ഇക്വിറ്റി എന്നിവയുടെ മിശ്രിതത്തിലൂടെ ആയിരുന്നു സമാഹരണം. പുതിയ വിപണികളിലേക്ക് സേവനങ്ങൾ വ്യാപിപ്പിക്കുന്നതിനും പ്രതിഭകളെ നിയമിക്കുന്നതിനും പ്ലാറ്റ്ഫോമിനായി സാങ്കേതിക അടിസ്ഥാന സൗകര്യങ്ങൾ നിർമ്മിക്കുന്നതിൽ ശ്രദ്ധ കേന്ദ്രീകരിക്കുന്നതിനും പുതിയ ഫണ്ട് ഉപയോഗിക്കുമെന്ന് ഫാൽക്ക ഒരു പ്രസ്താവനയിൽ പറഞ്ഞു.
2018-ൽ സന്തോഷ് ദാനെഗൗഡർ സ്ഥാപിച്ച ഫാൽക്ക ചെറുകിട കർഷകർക്ക് കാർഷിക പരിഹാരങ്ങൾ വാഗ്ദാനം ചെയ്യുന്ന ഒരു ഗ്രാമീണ അഗ്രിടെക് വിതരണ ശൃംഖലയാണ്. ഇത് വാടക, മാർക്കറ്റ് ലിങ്കേജുകൾ, സാധ്യമായ സംഭരണ പരിഹാരങ്ങൾ, ഉപദേശം, കാർഷിക ഉൽപ്പാദനക്ഷമത വർധിപ്പിക്കുന്നതിനുള്ള സാങ്കേതികവിദ്യകൾ എന്നി സേവനങ്ങൾ വാഗ്ദാനം ചെയ്യുന്നു.
സ്റ്റാർട്ടപ്പ് നിലവിൽ 1,00,000 കർഷകരുമായും 60-ലധികം ഇൻപുട്ട് നിർമ്മാതാക്കളുമായും 65-ലധികം കോർപ്പറേറ്റ് ബയർമാരുമായും ചേർന്ന് പ്രവർത്തിക്കുന്നു. കഴിഞ്ഞ സാമ്പത്തിക വർഷം 100 കോടി രൂപ വരുമാനം നേടിയതായി ഫാൽക്ക അവകാശപ്പെട്ടു.
കാലാവസ്ഥ, വിതരണ-ഡിമാൻഡ് വിടവുകൾ, വിപണി വില, അനുയോജ്യമായ വിളവെടുപ്പ് സമയം എന്നിവ പോലുള്ള അനലിറ്റിക്കൽ പിന്തുണയും തങ്ങളുടെ പ്ലാറ്റ്ഫോം സൗജന്യമായി വാഗ്ദാനം ചെയ്യുന്നുണ്ടെന്ന് അഗ്രിടെക് സ്റ്റാർട്ടപ്പ് പറഞ്ഞു. കൂടാതെ, മറ്റ് കാർഷിക കമ്പനികൾക്ക് അവരുടെ ഉൽപ്പന്നങ്ങളും ചരക്കുകളും പ്ലാറ്റ്ഫോമിൽ ലിസ്റ്റ് ചെയ്യാമെന്ന് സ്റ്റാർട്ടപ്പ് പറഞ്ഞു.
