കൊച്ചി: കേരളത്തിലെ ഐടി പാർക്കുകളിൽ ജോലി ചെയ്യുന്ന വനിതകളുടെ എണ്ണം ദേശീയ ശരാശരിക്കും മുകളിലെന്നു കണക്കുകൾ. കേരളത്തിലെ 3 ഗവ. ഐടി പാർക്കുകളിൽ ജോലി ചെയ്യുന്ന 1.37 ലക്ഷം ജീവനക്കാരിൽ 41.7 % വനിതകളാണ്.
ദേശീയ ശരാശരി ഏകദേശം 38 %. തിരുവനന്തപുരം ടെക്നോപാർക്കിലെ 482 കമ്പനികളിൽ ജോലി ചെയ്യുന്ന 70,500 ഐടി ജീവനക്കാരിൽ 45% വനിതകളാണ്.
കൊച്ചി ഇൻഫോപാർക്കിലെ 572 കമ്പനികളിൽ ജോലി ചെയ്യുന്നത് 64,900 പേർ. ഇവരിൽ 40% പേരും വനിതകൾ. താരതമ്യേന പുതിയ പാർക്കായ കോഴിക്കോട് സൈബർ പാർക്കിലെ 2,000 ജീവനക്കാരിൽ 40% വനിതകളാണ്.
ദേശീയതലത്തിൽ മറ്റേതു സ്വകാര്യ വ്യവസായ മേഖലയിലേക്കാളും കൂടുതൽ വനിതകൾ ജോലി ചെയ്യുന്നത് ഐടി രംഗത്താണ്. എന്നാൽ, ഉന്നത ജോലികളിൽ നിയോഗിക്കപ്പെടുന്നവരുടെ എണ്ണം താരതമ്യേന കുറവാണ്.
എക്സിക്യൂട്ടീവ് തലത്തിലെത്തുന്നവർ 10%ൽ താഴെ മാത്രം.
