തിരുവനന്തപുരം: പ്രമുഖ എ ഐ, ടെക്നോളജി ട്രാൻസ്ഫോർമേഷൻ സൊല്യൂഷൻസ് കമ്പനിയായ യു എസ് ടി, ബെംഗളൂരു ആസ്ഥാനമായി പ്രവർത്തിക്കുന്ന മോഡസ് ഇൻഫർമേഷൻ സിസ്റ്റംസ് പ്രൈവറ്റ് ലിമിറ്റഡിനെ ഏറ്റെടുത്തു.
ഇന്ത്യയിലും ഗ്ലോബൽ സൗത്തിന്റെ ഭാഗമായുള്ള രാജ്യങ്ങളിലും നിരവധി ബാങ്കുകൾക്ക് സേവനങ്ങൾ പ്രദാനം ചെയ്യുന്ന കോർ ബാങ്കിംഗ് ഇംപ്ലിമെന്റേഷൻ സ്ഥാപനമാണ് മോഡസ്. ഗ്ലോബൽ സൗത്ത് മേഖലയിൽ ഉടനീളമുള്ള ബാങ്കുകളുടെ ഡിജിറ്റൽ പരിവർത്തനവും ആധുനികവൽക്കരണവും ത്വരിതപ്പെടുത്തുന്നതിനൊപ്പം, യു എസ് ടി യെ വളർച്ചയോന്മുഖമായ ഭാവിയുടെ ബാങ്കിംഗ് സൊല്യൂഷനുകൾക്കായുള്ള വർദ്ധിച്ചുവരുന്ന ആവശ്യങ്ങൾ നിറവേറ്റുന്നതിന് ഈ ഏറ്റെടുക്കൽ സജ്ജമാക്കും.
കോർ ബാങ്കിംഗ് സോഫ്റ്റ്‌വെയറിന്റെ വളരുന്ന വിപണിയിൽ യു എസ് ടി യുടെ നേതൃസ്ഥാനം ഉറപ്പിക്കുന്നതാണ് ഈ ഏറ്റെടുക്കൽ. ഗ്ലോബൽ സൗത്തിൽ ഉടനീളം പ്രവർത്തിക്കുന്ന വളരുന്ന വിപണികൾക്ക് സേവനം നൽകുന്നതിന് സജ്ജമാക്കുന്നതിലൂടെ കമ്പനിയുടെ വളർച്ചാ തന്ത്രത്തെ ത്വരിതപ്പെടുത്തുകയും ഇതു മൂലം സാധ്യമാകും.
കൂടാതെ, യു എസ് ടിയുടെ ബാങ്കിംഗ്-ആസ്-എ-സർവീസ് യൂട്ടിലിറ്റി സേവനമായ ബാങ്ക്ട്രസ്റ്റുമായി ചേർന്ന് നിൽക്കുന്ന ഒന്നാണ് ഈ ഏറ്റെടുക്കൽ. മികച്ച ആഗോള സാമ്പത്തിക സേവനങ്ങൾ പ്രദാനം ചെയ്യാൻ കമ്പനിയെ ഇതു സഹായിക്കും.
മൊഡസിന്റെ ഏകദേശം 340 പ്രൊഫഷണലുകളടങ്ങുന്ന ടീം ഈ മേഖലയിലെ പ്രമുഖ കോർ ബാങ്കിംഗ് സൊല്യൂഷനുകൾ നടപ്പിലാക്കുന്നതിൽ വൈദഗ്ദ്ധ്യം തെളിയിച്ചിട്ടുണ്ട്. 2003 മുതൽ വിജയകരമായ വിധത്തിൽ നൂതനാശയങ്ങൾ നടപ്പാക്കി, ഒരു ഫിനക്കിൾ വാല്യു പാർട്ണർ എന്ന നിലയിൽ മുൻനിര കമ്പനികളുമായി സഹകരിച്ചു പ്രവർത്തിക്കുന്ന സ്ഥാപനമാണ് മോഡസ്. ഇത് സമഗ്രമായ ബാങ്കിംഗ് സേവനങ്ങൾ നൽകാനുള്ള യുഎസ് ടിയുടെ കഴിവിനെ ഗണ്യമായി തുണയ്ക്കും.
യുഎസ് ടി യുടെ എഐ, പ്ലാറ്റ്‌ഫോം എഞ്ചിനീയറിംഗ് മികവുകൾ മോഡസിന്റെ ആഴത്തിലുള്ള ഡൊമെയ്ൻ വൈദഗ്ധ്യവുമായി സംയോജിപ്പിക്കുന്നതിലൂടെ, ലോകമെമ്പാടുമുള്ള ബാങ്കിംഗ് ഉപഭോക്താക്കൾക്ക് വ്യത്യസ്തമായ മൂല്യവും ഉറപ്പു വരുത്താനാകും.
സാമ്പത്തിക സേവന വ്യവസായത്തിൽ നവീകരണവും പ്രവർത്തന മികവും വളർത്തിയെടുക്കുന്നതിനുള്ള യുഎസ് ടി യുടെ പ്രതിബദ്ധതയാണ് ഈ തന്ത്രപരമായ ഏറ്റെടുക്കൽ അടിവരയിടുന്നത്. ബെംഗളൂരു ആസ്ഥാനമായിട്ടാണ് മോഡസിന്റെ സേവനങ്ങളും വൈദഗ്ധ്യവും യു എസ് ടി വാഗ്ദാനം ചെയ്യുന്നത്. ഇരു കമ്പനികളും നിക്ഷേപ മൂല്യം വെളിപ്പെടുത്തിയിട്ടില്ല.
