ഹൈദരാബാദ്: യുഎസ്-ഇസ്രായേൽ ഇറാൻ യുദ്ധത്തിന്റെ ആഘാതം ഓഹരി വിപണി മുതൽ എണ്ണ, പാചകവാതക ക്ഷാമം വരെ പ്രകടമാണ്. മറ്റു പല മേഖലകളെയും പ്രതിസന്ധി സാരമായി ബാധിച്ചിട്ടുണ്ട്. ഇന്ത്യയുടെ രത്ന-ആഭരണ കയറ്റുമതിയെയും ഈ സാഹചര്യം ഉലച്ചിരിക്കുകയാണ്.
ജെം ആൻഡ് ജ്വല്ലറി എക്സ്പോർട്ട് പ്രൊമോഷൻ കൗൺസിലിന്റെ (GJEPC) കണക്ക് പ്രകാരം, പശ്ചിമേഷ്യയിൽ തുടരുന്ന യുദ്ധം ഏകദേശം രണ്ടു ബില്യൺ ഡോളറിന്റെ (ഏകദേശം 18,500 കോടി രൂപ) കയറ്റുമതിയെ ബാധിച്ചേക്കാമെന്നാണ് വിലയിരുന്നത്.
മാർച്ചിൽ യുഎസ്, ഇസ്രായേൽ, ഇറാൻ എന്നിവയ്ക്കിടയിൽ നടന്നുകൊണ്ടിരിക്കുന്ന യുദ്ധം മൂലം രൂക്ഷമായ പശ്ചിമേഷ്യയിലെ പ്രതിസന്ധി രത്നങ്ങളുടെയും ആഭരണങ്ങളുടെയും വ്യാപാരത്തിന്റെ 20% ബാധിക്കുമെന്ന് ജിജെഇപിസി പറയുന്നു.
“യുദ്ധം ബാധിക്കുമെന്ന് പ്രതീക്ഷിക്കുന്ന 2 ബില്യൺ ഡോളറിന്റെ വ്യാപാരത്തിൽ, ഏകദേശം 800 മില്യൺ ഡോളറിന്റെ സാധനങ്ങൾ വഴിതിരിച്ചുവിടാൻ നമുക്ക് പരമാവധി ശ്രമിക്കാം, പക്ഷേ 1.2 ബില്യൺ ഡോളർ എവിടെയും വഴിതിരിച്ചുവിടാൻ ഞങ്ങൾക്ക് കഴിയില്ല,” കൗൺസിലിന്റെ എക്സിക്യൂട്ടീവ് ഡയറക്ടർ സബ്യസാചി റേ പറഞ്ഞു.
ഇന്ത്യയുടെ വലിയ കയറ്റുമതി വിപണി
2025 സാമ്പത്തിക വർഷത്തിൽ ഇന്ത്യ 29 ബില്യൺ ഡോളറിന്റെ രത്നങ്ങളും ആഭരണങ്ങളും കയറ്റുമതി ചെയ്തു. ഏറ്റവും വലിയ വിപണി അമേരിക്കയായിരുന്നു. അമേരിക്കയിലേക്കുള്ള കയറ്റുമതി 9.24 ബില്യൺ ഡോളറാണ്.
7.87 ബില്യൺ ഡോളറിന്റെ കയറ്റുമതിയുമായി യു.എ.ഇയാണ് രണ്ടാം സ്ഥാനത്തെത്തിയത്. എന്നിരുന്നാലും, കഴിഞ്ഞ വർഷം അമേരിക്ക ചുമത്തിയ താരിഫുകളെ തുടർന്ന് യു.എ.ഇ ഇന്ത്യയുടെ ഏറ്റവും വലിയ രത്നങ്ങളുടെയും ആഭരണങ്ങളുടെയും കയറ്റുമതി വിപണിയായി ഉയർന്നുവന്നു. നിലവിലെ സാമ്പത്തിക വർഷം ഇതുവരെ 8.33 ബില്യൺ ഡോളറിന്റെ ഇറക്കുമതിയാണ് യു.എ.ഇ നടത്തിയത്.
ദുബായ് യുദ്ധത്തിന്റെ പിടിയിൽ; ആശങ്ക വർദ്ധിക്കുന്നു
അമേരിക്ക, ഇസ്രായേൽ, ഇറാൻ എന്നിവ തമ്മിലുള്ള യുദ്ധം ദുബായിയെ ബാധിച്ചാൽ, അത് ഇന്ത്യയിൽ നിന്നുള്ള കയറ്റുമതിയെ ബാധിക്കുമെന്ന് സബ്യസാചി റേ പറയുന്നു. ഇന്ത്യയിൽ വിൽക്കുന്ന അതേ തരം ആഭരണങ്ങളാണ് (പ്രധാനമായും ഭാരമേറിയ ആഭരണങ്ങൾ) ദുബായിലേക്ക് കൂടുതലായി കയറ്റുമതി ചെയ്യുന്നത്.
ഇവ മറ്റു വിപണികളിലേക്ക് അയക്കാൻ സാധിക്കില്ല. പശ്ചിമേഷ്യയുടെ മൊത്തം ഹബ്ബായാണ് ദുബായ് പ്രവർത്തിക്കുന്നത്. മറ്റു ഗൾഫ് രാജ്യങ്ങളിലേക്ക് വിതരണം ചെയ്യുന്നതിന് മുമ്പ് ഇന്ത്യൻ ആഭരണങ്ങൾ ആദ്യം ദുബായിലാണ് എത്തുന്നത്.
പ്രതിസന്ധിയുടെ പ്രധാന കാരണങ്ങൾ
മറ്റു ബിസിനസുകളിൽ നിന്ന് വ്യത്യസ്തമായി, രത്ന-ആഭരണ വ്യാപാരം പ്രധാനമായും നടക്കുന്നത് വിമാന മാർഗമാണ്. എന്നാൽ യുദ്ധം കാരണം ഗൾഫ് രാജ്യങ്ങളിലെ ആകാശപാതകളിൽ ഏർപ്പെടുത്തിയ നിയന്ത്രണങ്ങളും ആക്രമണങ്ങൾ മൂലം വിമാനത്താവളം അടച്ചിടുന്നതും ഈ മേഖലയിലെ പ്രതിസന്ധി വർദ്ധിപ്പിച്ചിരിക്കുകയാണ്.
ദുബായിലെ വ്യാപാരികൾ ഖത്തറിലേക്കും സൗദിയിലേക്കും സാധനങ്ങൾ അയക്കാൻ ബുദ്ധിമുട്ടുകയാണ്. ഷോപ്പിംഗിനായി വിനോദ സഞ്ചാരികൾ ദുബായിൽ എത്താത്തതും പ്രതിസന്ധിയാകുന്നുണ്ട്.
