ഡൽഹി: കൺവെർജൻസ് എനർജി സർവീസസ് ലിമിറ്റഡിന്റെ ടെൻഡറിന്റെ ഭാഗമായി ഡൽഹി ട്രാൻസ്‌പോർട്ട് കോർപ്പറേഷനിൽ (ഡിടിസി) നിന്ന് 1,500 ഇലക്ട്രിക് ബസുകൾക്ക് ഓർഡർ ലഭിച്ചതായി ടാറ്റ മോട്ടോഴ്‌സ് അറിയിച്ചു. കരാർ പ്രകാരം 12 വർഷത്തേക്ക് എയർ കണ്ടീഷൻഡ്, ലോ-ഫ്ലോർ, ഇലക്ട്രിക് ബസുകൾ വിതരണം ചെയ്യുകയും പ്രവർത്തിപ്പിക്കുകയും പരിപാലിക്കുകയും ചെയ്യുമെന്ന് ടാറ്റ മോട്ടോർസ് പ്രസ്താവനയിൽ പറഞ്ഞു. ഈ ബസുകളുടെ ഡെലിവറി ഡിടിസിയുമായുള്ള തങ്ങളുടെ പങ്കാളിത്തം കൂടുതൽ ശക്തിപ്പെടുത്തുകയും ഡൽഹി നഗരത്തിന് പരിസ്ഥിതി സൗഹൃദമായ ജനസഞ്ചാരം വാഗ്ദാനം ചെയ്യുകയും ചെയ്യുമെന്ന് ടാറ്റ മോട്ടോഴ്‌സ് വൈസ് പ്രസിഡന്റ് രോഹിത് ശ്രീവാസ്തവ പറഞ്ഞു.
ഇന്ത്യയിൽ പൊതുഗതാഗതം നവീകരിക്കുന്നതിനും ഭാവി വാഹനങ്ങളുടെ രൂപകൽപ്പനയിൽ സുസ്ഥിരത നിലനിർത്തുന്നതിനും തങ്ങൾ പ്രതിജ്ഞാബദ്ധരാണ് എന്ന ടാറ്റ മോട്ടോർസ് പറഞ്ഞു. മുംബൈ ആസ്ഥാനമായുള്ള കമ്പനി ഇതിനകം 650-ലധികം ഇലക്ട്രിക് ബസുകൾ ഇന്ത്യയിലെ ഒന്നിലധികം നഗരങ്ങളിലായി വിതരണം ചെയ്തിട്ടുണ്ട്.
