6,099 കോടി രൂപയുടെ 2000 രൂപ നോട്ടുകള്‍ ഇപ്പോഴും പ്രചാരത്തിലെന്ന് ആര്‍ബിഐ

ഇന്ത്യയുടെ നോട്ട് നിരോധവും, തുടര്‍ന്നെത്തിയ പുതിയ 2000 രൂപ നോട്ടുകളും, പിന്നീട് അവ വിപണിയില്‍ നിന്നു പിന്‍വലിച്ച നടപടിയുമൊന്നും നിങ്ങള്‍ മറന്നിരിക്കില്ലല്ലോ? സാമ്പത്തിക രംഗത്ത് ഇന്ത്യ നടത്തിയ വിപ്ലവകരമായ നീക്കമെന്നാണ് പലരും നോട്ട് നിരോധനത്തെ വിശേഷിപ്പിക്കുന്നത്.

എന്നാല്‍ നീക്കത്തെ എതിക്കുന്നവരും കുറവല്ല. ലക്ഷ്യം നിറവേറിയെന്നു കാട്ടി ആര്‍ബിഐ 2023 മെയ് 19 നാണ് പുതിയ 2000 രൂപ നോട്ടുകള്‍ വിപണികളില്‍ നിന്നു പിന്‍വലിക്കല്‍ പ്രഖ്യാപിച്ചത്. നിലവില്‍ ഇടപാടുകള്‍ക്ക് ഈ നോട്ടുകള്‍ ഉപയോഗിക്കാന്‍ കഴിയില്ല.

എന്നാല്‍ വര്‍ഷം 2 കഴിഞ്ഞിട്ടും ഇന്നും ആര്‍ബിഐ ഉദ്യോഗസ്ഥര്‍ക്കു പോലും പിടികൊടുക്കാതെ കറങ്ങുകയാണ് ഈ 2000 രൂപ നോട്ടുകളെന്ന റിപ്പോര്‍ട്ടുകള്‍ വ്യക്തമാക്കുന്നു.

6,099 കോടി രൂപ എവിടെ
2000 രൂപ നോട്ടുകള്‍ പിന്‍വലിച്ച് 2 വര്‍ഷം പിന്നിടുമ്പോഴും 6,099 കോടി രൂപയുടെ കറന്‍സികള്‍ ഇപ്പോഴും കാണാമറയത്ത് ആണെന്നാണ് റിപ്പോര്‍ട്ട്. അതായത് ഇവ ഇപ്പോഴും വിപണികളില്‍ തുടരുന്നു.

വിനിമയ മൂല്യം ഇല്ലാതിരുന്നിട്ടും ഇത്രയും നോട്ടുകള്‍ എവിടെ എന്നത് ഇപ്പോഴും ഉദ്യോഗസ്ഥരെ ആശയക്കുഴപ്പത്തിലാക്കുന്ന ചോദ്യമായി തുടരുന്നു. ആര്‍ബിഐ ചൊവ്വാഴ്ച പുറത്തിറക്കിയ ഔദ്യോഗിക കണക്കുകളിലാണ് 6,099 കോടി രൂപയുടെ 2000 രൂപ നോട്ടുകള്‍ ഇനിയും തിരിച്ചെത്തിയിട്ടില്ലെന്നു വ്യക്തമാക്കുന്നത്.

2000 രൂപ പിന്‍വലിക്കല്‍
പിന്‍വലിക്കല്‍ പ്രഖ്യാപനത്തിനു ശേഷം 2023 ഒക്ടോബര്‍ 7 വരെ എല്ലാ ബാങ്ക് ശാഖകളിലും 2000 രൂപ നോട്ടുകള്‍ മാറിയെടുക്കാന്‍ ആര്‍ബിഐ സമയം അനവദിച്ചിരുന്നു. ഇതിനു ശേഷവും നോട്ടുകള്‍ മാറിയെടുക്കാന്‍ വിവിധ വഴികളുണ്ടായിരുന്നു.

റിസര്‍വ് ബാങ്കിന്റെ 19 ഇഷ്യു ഓഫീസുകള്‍ വഴി ഇപ്പോഴും ഈ സൗകര്യം ലഭ്യമാണ്. എന്നിട്ടും നോട്ടുകള്‍ വിപണികളില്‍ അവശേഷിക്കുന്നുവെന്നതാണ് വസ്തുത.

കണക്കുകള്‍ സംസാരിക്കുന്നു
നോട്ട് പിന്‍വലിക്കല്‍ പ്രഖ്യാപിച്ച 2023 മെയ് 19 ലെ കണക്കുകള്‍ പ്രകാരം 3.56 ലക്ഷം കോടി രൂപയുടെ 2000 രൂപ നോട്ടുകള്‍ വിപണികളില്‍ ഉണ്ടായിരുന്നു. 2025 ജൂണ്‍ 30 ന് വ്യാപാരം അവസാനിക്കുമ്പോള്‍ 6,099 കോടി രൂപയുടെ നോട്ടുകള്‍ ഇനിയും തിരിച്ചെത്തിയിട്ടില്ലെന്ന് ആര്‍ബിഐ വ്യക്തമാക്കുന്നു.

കുറച്ചുകൂടി വ്യക്തമാക്കിയാല്‍ 2023 മെയ് 19 വരെ പ്രചാരത്തിലുണ്ടായിരുന്ന 2000 രൂപ നോട്ടുകളുടെ 98.29% തിരിച്ചെത്തിയിട്ടുണ്ട്. പക്ഷെ തിരിച്ചെത്താനുള്ള 6,099 കോടി രൂപ എന്നത് ഒരു ചെറിയ സംഖ്യയല്ല.

പോസ്റ്റ് ഓഫീസ് വഴി സേവനം
ഇനിയും 2000 രൂപ നോട്ടുകള്‍ കൈവശമുള്ള ഒരു വ്യക്തിയാണോ നിങ്ങള്‍? ബാങ്കുകള്‍ വഴി ഇവ ഇനി മാറുക സാധ്യമല്ല.

റിസര്‍വ് ബാങ്കിന്റെ 19 ഇഷ്യു ഓഫീസുകളാണ് നിങ്ങള്‍ക്കുള്ള വഴി. എന്നാല്‍ ഇതു കൂടാതെ രാജ്യത്തെ ഏത് പോസ്റ്റ് ഓഫീസില്‍ നിന്നും ഇന്ത്യ പോസ്റ്റ് വഴി 2000 രൂപ നോട്ടുകള്‍ ആര്‍ബിഐ ഇഷ്യൂ ഓഫീസുകളിലേയ്ക്ക് അയയ്ക്കാന്‍ സൗകര്യമുണ്ട്.

ഇങ്ങനെ മാറുന്ന മൂല്യം നിങ്ങളുടെ അക്കൗണ്ടില്‍ ക്രെഡിറ്റ് ചെയ്യപ്പെടും.