ഇന്ത്യന്‍ ബിസിനസ് ചരിത്രത്തില്‍ അതിവേഗം ആളുകള്‍ ഏറ്റെടുത്ത ഒന്നാണ് റിലയന്‍സ് ജിയോ. സൗജന്യങ്ങളുമായെത്തി വളരെ ചുരുങ്ങിയ വര്‍ഷങ്ങള്‍ക്കുള്ളില്‍ ഇന്ത്യയിലെ ഒന്നാം നമ്പര്‍ ടെലികോം കമ്പനിയാതയി മാറാന്‍ മുകേഷ് അംബാനിയുടെ റിലയന്‍സ് ജിയോയ്ക്ക് സാധിച്ചു.
എന്നാല്‍ റിപ്പോര്‍ട്ടുകള്‍ പ്രകാരം ഇവിടെ ഒന്നും നിര്‍ത്താന്‍ അംബാനി തീരുമാനിച്ചിട്ടില്ല. ലോകത്തെ മുന്‍നിര ടെലികോം സേവനദാതാവായി ജിയോയുടെ മാറ്റാനുള്ള പരിശ്രമത്തിലാണ് അദ്ദേഹം.
പറഞ്ഞുവരുന്നത് റിലയന്‍സ് ജിയോയുടെ ഐപിഒയെ പറ്റിയാണ്. അതേ മുകേഷ് അംബാനിയുടെ റിലയന്‍സ് കുടുംബത്തില്‍ നിന്നു മറ്റൊരു കമ്പനി കൂടി ഓഹരി വിപണികളിലേയ്ക്ക് എത്തുന്നു.
അടുത്തിടെ എത്തിയ ജിയോ ഫിനാന്‍ഷ്യല്‍ സര്‍വീസസിനെ വിപണികളും, നിക്ഷേപകരും ഇരുകൈയ്യും നീട്ടിയാണു സ്വീകരിച്ചത്. ഐപിഒ വഴി റിലയന്‍സ് ജിയോയുടെ എന്റര്‍പ്രൈസ് മൂല്യം (ഇവി) 136 ബില്യണ്‍ മുതല്‍ 154 ബില്യണ്‍ ഡോളര്‍ വരെയാകുമെന്ന് കണക്കാക്കപ്പെടുന്നു.
റിലയന്‍സ് ജിയോ എന്റര്‍പ്രൈസ് മൂല്യം 136 ബില്യണ്‍ മുതല്‍ 154 ബില്യണ്‍ ഡോളര്‍ വരെയാകുമ്പോള്‍, മാര്‍ക്കറ്റ് ക്യാപിറ്റലൈസേഷന്‍ പ്രകാരം ലോകത്തിലെ ആറാമത്തെ വലിയ ലിസ്റ്റഡ് ടെലികോം കമ്പനിയായി ഇതു മാറുമെന്നാണ് കണക്കുകള്‍ വ്യക്തമാക്കുന്നത്.
അതേസമയം ഏറ്റവും വേഗത്തില്‍ ഈ നാഴികക്കല്ല് കൈവരിക്കുന്ന ടെലികോം കമ്പനിയെന്ന റെക്കോഡും ഈ അംബാനി കമ്പനി സ്വന്തമാക്കും. 2016 ല്‍ മാത്രമാണ് ജിയോ പ്രവര്‍ത്തനം ആരംഭിച്ചത്.
നിലവില്‍ വിപണിമൂല്യത്തില്‍ ലോകത്തെ ഒന്നാം നമ്പര്‍ ടെലികോം സേവനദാതാവ് യുഎസ് ആസ്ഥാനമായുള്ള ടി-മൊബൈല്‍ (282.58 ബില്യണ്‍ ഡോളര്‍) ആണ്. രണ്ടാം സ്ഥാനത്ത് ചൈന മൊബൈല്‍ (232.09 ബില്യണ്‍ ഡോളര്‍) ആണ്.
മൂന്നാം സ്ഥാനത്ത് എടി ആന്‍ഡ് ടിയും (198.67 ബില്യണ്‍ ഡോളര്‍), നാലാമത് വെരിസോണും (184.41 ബില്യണ്‍ ഡോളര്‍) ആണ്. അഞ്ചാം സ്ഥാനത്തുള്ളത് ഡച്ച് ടെലികോം (175.63 ബില്യണ്‍ ഡോളര്‍) ആണ്.
ഐപിഒയ്ക്ക് പിന്നാലെ ഇവര്‍ക്ക് തൊട്ടരികെ റിലയന്‍സ് ജിയോ എത്തും. ഇന്ത്യന്‍ കമ്പനിയായ സുനില്‍ ഭാരതി മിത്തലിന്റെ ഭാരതി എയര്‍ടെല്ലും ജിയോയ്ക്ക് പിന്നിലായുണ്ട്. എയര്‍ടെല്ലിന്റെ വിപണിമൂല്യം നിലവില്‍ 131.34 ബില്യണ്‍ ഡോളര്‍ ആണ്.
ഇന്ത്യന്‍ ടെലികോം വിപണിയില്‍ അതിവേഗം വളര്‍ന്നു കൊണ്ടിരിക്കുന്ന 2 കമ്പനികളാണ് ജിയോയും, എയര്‍ടെല്ലും. മാര്‍ച്ചില്‍ റിലയന്‍സ് ജിയോ 2.17 ദശലക്ഷം പുതിയ മൊബൈല്‍ ഉപയോക്താക്കളെ നേടിയിരുന്നു. ഇന്നലെ പുറത്തുവന്ന ഭാരതി എയര്‍ടെല്ലിന്റെ പാദഫലവും മികച്ചതാണ്.
2025 മാര്‍ച്ച് പാദ കണക്കുകള്‍ പ്രകാരം ജിയോ കൂട്ടിച്ചേര്‍ത്ത പുതിയ വരിക്കാര്‍ പാദത്തിലെ മുഴുവന്‍ വ്യവസായത്തിലേയ്ക്ക് എത്തിയവരുടെ 74% വരും. വിവിധ വിഭാഗങ്ങളിലായി 70 ശതമാനത്തിലധികം വിപണി വിഹിതവുമായി കമ്പനി വ്യവസായ വളര്‍ച്ചയെ മുന്നോട്ട് നയിക്കുന്നു.
ലോകമെമ്പാടുമുള്ള കണക്റ്റിവിറ്റി വ്യവസായത്തില്‍ ഏറ്റവും വേഗത്തില്‍ വളരുന്ന വിഭാഗം 5ജി ഫിക്‌സഡ് വയര്‍ലെസ് ആക്സസ് ആണ്. 2025 മാര്‍ച്ച് വരെ 5.57 ദശലക്ഷം വരിക്കാരുമായി ജിയോ ഈ വിഭാഗത്തില്‍ 82 ശതമാനത്തിലധികം വിപണി വിഹിതം തുടരുന്നു.
