മുംബൈ: കഴിഞ്ഞ സാമ്പത്തിക വർഷത്തെ ഇതേ പാദത്തിലെ 380.2 കോടി രൂപയുടെ നഷ്ടത്തിൽ നിന്ന് നടപ്പ് സാമ്പത്തിക വർഷം ജൂൺ പാദത്തിൽ അതിന്റെ അറ്റനഷ്ടം 644.4 കോടി രൂപയായി വർധിച്ചതായി പേടിഎം അറിയിച്ചു. എന്നിരുന്നാലും, ഡിജിറ്റൽ പേയ്‌മെന്റ് പ്ലാറ്റ്‌ഫോമിന്റെ വരുമാനം ആദ്യ പാദത്തിൽ 88.5 ശതമാനം ഉയർന്ന് 1,679.6 കോടി രൂപയായി.
പേയ്‌മെന്റുകളിലെ ശക്തമായ ധനസമ്പാദനം, ഉപകരണ സബ്‌സ്‌ക്രിപ്‌ഷനുകൾ, വായ്പ പോലുള്ള ഉയർന്ന മാർജിൻ ബിസിനസുകൾ ത്വരിതപ്പെടുത്തിയതാണ് വരുമാന വളർച്ചയ്ക്ക് കാരണമായതെന്ന് പേടിഎം പറഞ്ഞു. കമ്പനിയുടെ സംഭാവന ലാഭം വർഷം തോറും 197 ശതമാനം വർധിച്ച് 726 കോടി രൂപയായി.
മികച്ച ചിലവ് ലിവറേജിന്റെ പിൻബലത്തിൽ പ്രവർത്തന ലാഭം കൈവരിക്കുന്നതിനുള്ള പാതയിൽ ഉറച്ചുനിൽക്കുകയാണെന്ന് ഒരു ബിഎസ്ഇ ഫയലിംഗിൽ പേടിഎം പറഞ്ഞു. ഈ പാദത്തിലെ അറ്റ പേയ്‌മെന്റ് മാർജിൻ പേയ്‌മെന്റ് വരുമാനത്തിന്റെ 35 ശതമാനമായി വർദ്ധിച്ചു. അതേസമയം 2023 സെപ്തംബർ പാദത്തോടെ പ്രവർത്തന ലാഭം കൈവരിക്കുമെന്ന് പേടിഎം ആത്മവിശ്വാസത്തിലാണ്.
ഒന്നാം പാദത്തിൽ പേടിഎം വഴിയുള്ള വായ്പ വിതരണം 779 ശതമാനം വർധിച്ച് 5,554 കോടി രൂപയായി. കൂടാതെ കമ്പനിയുടെ ശരാശരി പ്രതിമാസ ഇടപാട് ഉപയോക്താക്കൾ (MTU) ഈ പാദത്തിൽ 74.8 ദശലക്ഷമായി ഉയർന്നു. പേടിഎം ഓഹരികൾ വെള്ളിയാഴ്ച 3.20 ശതമാനം ഇടിഞ്ഞ് 783.65 രൂപയിലാണ് വ്യാപാരം അവസാനിപ്പിച്ചത്.
