ന്യൂഡൽഹി: പൊതുമേഖല ടെലികോം കമ്പനിയായ ഭാരത് സഞ്ചാർ നിഗം ലിമിറ്റഡിന് (ബിഎസ്എൻഎല്) പുതിയ മുഖം. കണക്ടിങ് ഇന്ത്യ എന്നതിന് പകരം പുതിയ ലോഗോയില് കണക്ടിങ് ഭാരത് എന്നാക്കിയത് ചർച്ച വിഷയമായിട്ടുണ്ട്.
രാജ്യത്താകമാനം 4ജി സേവനം ആരംഭിക്കുന്നതിന് മുന്നോടിയായിട്ടാണ് ലോഗോ മാറ്റം. ഇതോടൊപ്പം സ്പാം ബ്ലോക്കിങ് അടക്കം ഏഴ് പുതിയ സേവനങ്ങളും അവതരിപ്പിച്ചിട്ടുണ്ട്.
ഡല്ഹിയിലെ ബിഎസ്എൻഎല് ആസ്ഥാനത്ത് നടന്ന ചടങ്ങില് കേന്ദ്ര ടെലിംകോം മന്ത്രി ജ്യോതിരാദിത്യ സിന്ധ്യയാണ് പുതിയ ലോഗോ അനാച്ഛാദനം ചെയ്തത്. ഏഴ് പുതിയ സേവനങ്ങളും പ്രഖ്യാപിക്കുകയും ചെയ്തു.
ഉപഭോക്താവിനെ അലേർട്ട് ചെയ്യാതെ തന്നെ ക്ഷുദ്രകരമായ SMS, തട്ടിപ്പ് ശ്രമങ്ങള് എന്നിവ സ്വയമേവ ഫില്ട്ടർ ചെയ്യുമെന്ന് അവകാശപ്പെടുന്ന ഒരു പുതിയ സ്പാം ബ്ലോക്കിങ് സേവനമാണ് പ്രഖ്യാപിച്ചിരിക്കുന്നത്. എഐ സ്പാം ഡിറ്റക്ഷൻ എന്ന പേരില് നേരത്തെ എയർടെലും സമാനമായ സ്പാം ബ്ലോക്കിങ് സംവിധാനം അവതരിപ്പിച്ചിരുന്നു.
വൈഫൈ റോമിങ് സർവീസ്
ഫൈബർ-ടു-ദി-ഹോം (FTTH) ഉപഭോക്താക്കള്ക്കായി ഒരു Wi-Fi റോമിങ് സേവനം അവതരിപ്പിച്ചു. ബിഎസ്എൻഎല് ഹോട്ട്സ്പോട്ടുകളില് ഉപഭോക്താക്കള്ക്ക് ഉയർന്ന വേഗതയുള്ള ഇന്റർനെറ്റ് ഇതിലൂടെ ആക്സസ് നല്കുമെന്ന് കമ്പനി അവകാശപ്പെടുന്നു, ഇത് ഡാറ്റാ ചെലവ് കുറയ്ക്കുന്നു.
ഫൈബർ അധിഷ്ഠിത ഇൻട്രാനെറ്റ് ടിവി
500-ലധികം തത്സമയ ചാനലുകളും പേ ടിവി സൗകര്യവും വാഗ്ദാനം ചെയ്യുന്ന ഫൈബർ അധിഷ്ഠിത ഇൻട്രാനെറ്റ് ടിവി സേവനമാണിത്. FTTH ഉപഭോക്താക്കള്ക്ക് അധികപണം നല്കാതെ തന്നെ ഈ സേവനം ലഭിക്കും. ടിവി സ്ട്രീമിംഗിനായി ഉപയോഗിക്കുന്ന ഡാറ്റ ഉപയോക്താക്കളുടെ FTTH ഡാറ്റ അലവൻസായി കണക്കാക്കില്ല.
സിം എടിഎം
ഓട്ടോമാറ്റെഡ് സിം കിയോസ്കുകള് (എടിഎം) വഴി ഉപഭോക്താക്കള്ക്ക് പുതിയ കണക്ഷനുകള് നേടുന്നതും അപ്ഗ്രേഡ് ചെയ്യുന്നതും എളുപ്പമാക്കും. ക്യുആർ പ്രാപ്തമാക്കിയ യുപിഐ പേയ്മെന്റുകളും വിവിധ ഭാഷകളിലുള്ള സേവനങ്ങളോടെ എപ്പോള് വേണമെങ്കിലും തങ്ങളുടെ സിം കാർഡുകള് വാങ്ങാനോ മാറ്റിസ്ഥാപിക്കാനോ അപ്ഗ്രേഡ് ചെയ്യാനോ പോർട്ട് ചെയ്യാനോ ഇത് ഉപയോക്താക്കളെ അനുവദിക്കും.
ഡി2ഡി സർവീസ്
മൊബൈള് ടവർ വഴിയടക്കമുള്ള നെറ്റ് വർക്കുകള് തടസ്സപ്പെടുമ്ബോള് സാറ്റലൈറ്റ് വഴി സുഗമമായി മൊബൈല് ഫോണുകളും സേവനങ്ങളും പ്രവർത്തിപ്പിക്കാൻ കഴിയുന്ന സംവിധാനമാണിത്.
ദുരന്തമേഖലയിലെ സേവനം
ദുരന്തബാധിത പ്രദേശങ്ങളില് കവറേജ് വർധിപ്പിക്കുന്നതിന് ബലൂണ് അധിഷ്ഠിതവും ഡ്രോണ് അധിഷ്ഠിത സംവിധാനങ്ങളും ഈ സേവനം പ്രയോജനപ്പെടുത്തുമെന്ന് പറയുന്നു.
സി-ഡാകുമായുള്ള പങ്കാളിത്തം
ഒരു സ്വകാര്യ 5G നെറ്റ്വർക്ക് അവതരിപ്പിക്കുന്നതിനായി ടെലികോം ദാതാവ് സി-ഡാക്കുമായുള്ള പങ്കാളിത്തവും പ്രഖ്യാപിച്ചു. ഖനന സേവനങ്ങള്ക്കായാണ് ഇത് പ്രധാനമായും ലക്ഷ്യമിടുന്നത്.
