മുംബൈ: ഇന്ത്യയിൽ ഫാക്ടറികളും ഗവേഷണ കേന്ദ്രങ്ങളും നിർമ്മിക്കാൻ 5,000 കോടി രൂപ നിക്ഷേപിക്കുമെന്ന് ലോകത്തിലെ ഏറ്റവും വലിയ ഭക്ഷ്യ കമ്പനിയായ നെസ്‌ലെ എസ്‌എ അറിയിച്ചു. കമ്പനിയുടെ ചീഫ് എക്‌സിക്യൂട്ടീവ് ഓഫീസറായ മാർക്ക് ഷ്‌നൈഡറാണ് ഈ നിക്ഷേപ പ്രഖ്യാപനം നടത്തിയത്.
പുതിയ നിക്ഷേപങ്ങൾ ബ്രാൻഡുകൾ നിർമ്മിക്കുന്നതിനും ഫാക്ടറികളും ഗവേഷണ കേന്ദ്രങ്ങളും സ്ഥാപിക്കുന്നതിനും ഏറ്റെടുക്കലുകൾക്കുമായി ഉപയോഗിക്കുമെന്ന് സ്വിസ് കമ്പനിയുടെ മികച്ച 10 വിപണികളിലൊന്നായ ഇന്ത്യയിൽ ഒരാഴ്ചത്തെ സന്ദർശനത്തിനെത്തിയ ഷ്നൈഡർ പറഞ്ഞു. നെസ്‌ലെ കഴിഞ്ഞ 60 വർഷമായി ഇന്ത്യയിൽ പ്രവർത്തിക്കുന്നു.
ഇന്ത്യയിലെ പുതിയ നിക്ഷേപങ്ങൾ, കമ്പനിയുടെ സാന്നിധ്യം വർധിപ്പിക്കാനും എതിരാളികളായ യുണിലിവറിന്റെ ഇന്ത്യൻ യൂണിറ്റിനോടും പ്രാദേശിക ഭീമൻമാരായ ഐടിസി ലിമിറ്റഡ്, ടാറ്റ കൺസ്യൂമർ പ്രോഡക്‌ട്‌സ് എന്നിവയോട് മത്സരിക്കാനും കമ്പനിയെ പ്രാപ്തമാക്കുകയും ചെയ്യും. 2021 സാമ്പത്തിക വർഷത്തിൽ നെസ്‌ലെ ഇന്ത്യയുടെ അറ്റ വിൽപ്പന 14,633.72 കോടി രൂപയായി ഉയർന്നിരുന്നു.
ഇന്ത്യയിൽ ഒമ്പത് ഫാക്ടറികൾ നടത്തുന്ന നെസ്‌ലെ ഇന്ത്യയുടെ നിർദ്ദിഷ്ട നിക്ഷേപം പ്രത്യക്ഷവും പരോക്ഷവുമായ നിരവധി തൊഴിലവസരങ്ങൾ സൃഷ്ടിക്കുമെന്ന് മാർക്ക് ഷ്നൈഡർ പറഞ്ഞു. കമ്പനിയുടെ പ്രധാന ബിസിനസ് സുസ്ഥിരമായി ത്വരിതപ്പെടുത്തുന്നതാണ് നിക്ഷേപ പദ്ധതികളെന്ന് അദ്ദേഹം കൂട്ടിച്ചേർത്തു.
