മുംബൈ: കമ്പനി കൈകാര്യം ചെയ്യുന്ന ഒരു ഫണ്ട് വെളിപ്പെടുത്താത്ത ഓഹരിയ്ക്കായി പാത്ത്കൈൻഡ് ഡയഗ്നോസ്റ്റിക്സിൽ 194.4 കോടി രൂപയുടെ നിക്ഷേപം നടത്തിയതായി മോത്തിലാൽ ഓസ്വാൾ പ്രൈവറ്റ് ഇക്വിറ്റി അറിയിച്ചു. ദക്ഷിണേന്ത്യയിലേക്ക് പ്രവർത്തനം വ്യാപിപ്പിക്കുന്നതിനും ഐടി ഇൻഫ്രാസ്ട്രക്ചർ കൂടുതൽ വികസിപ്പിക്കുന്നതിനും, ഡിജിറ്റൽ മാർക്കറ്റിംഗ് ശ്രമങ്ങൾക്കുമായി ഫണ്ട് ഉപയോഗിക്കുമെന്ന് പാത്ത്കൈൻഡ് ഡയഗ്നോസ്റ്റിക്സ് അറിയിച്ചു. സഞ്ജീവ് വസിഷ്ഠ 2016-ൽ ആരംഭിച്ച ഡയഗ്നോസ്റ്റിക്സ് ശൃംഖലയ്ക്ക് നിലവിൽ 23 സംസ്ഥാനങ്ങളിലായി 75ലധികം ലാബുകളും 2,000 എക്സ്ക്ലൂസീവ് കളക്ഷൻ സെന്ററുകളുമുണ്ട്.
പുതിയ നിക്ഷേപത്തിലൂടെയും, ഗുണനിലവാര പരിശോധന നൽകുന്നതിൽ ശ്രദ്ധ കേന്ദ്രീകരിക്കുന്നതിലൂടെയും കമ്പനി കൂടുതൽ വിപുലീകരിക്കപ്പെടുമെന്ന് മോത്തിലാൽ ഓസ്വാൾ പ്രൈവറ്റ് ഇക്വിറ്റി പറഞ്ഞു. ഇന്ത്യാ ബിസിനസ് എക്സലൻസ് ഫണ്ട് IV മുഖേന നടത്തുന്ന ഈ നിക്ഷേപം, മെഡിക്കൽ/ഡയഗ്നോസ്റ്റിക്സ് വ്യവസായത്തിലെ തങ്ങളുടെ രണ്ടാമത്തെ നിക്ഷേപമാണെന്ന് എംഒപിഇ കൂട്ടിച്ചേർത്തു. ബയോകെമിസ്ട്രി, ഹെമറ്റോളജി, സീറോളജി, ഹിസ്റ്റോപത്തോളജി, മോളിക്യുലാർ ബയോളജി, സൈറ്റോജെനെറ്റിക്സ് എന്നിവയുൾപ്പെടെ എല്ലാ വിഭാഗങ്ങളിലായി 4,000-ത്തിലധികം പരിശോധനകൾ പാത്ത്കൈൻഡ് വാഗ്ദാനം ചെയ്യുന്നു.
