മുംബൈ: ഇന്ത്യക്കാർ വിദേശത്ത് ചെലവഴിക്കുന്ന പണത്തിൽ 29 മടങ്ങ് വർധന. കഴിഞ്ഞ 10 വർഷത്തിനുള്ളിൽ ആണ് തുകയിൽ ഇത്രയധികം വർധനയുണ്ടായിരിക്കുന്നത്.
2014 സാമ്പത്തിക വർഷത്തിൽ 110 കോടി ഡോളറായിരുന്ന തുക 2024 സാമ്പത്തിക വർഷത്തിൽ 3,170 കോടി രൂപയാണ്. വിദേശ നാണ്യം ഏറ്റവുമധികം എത്തുന്ന രാജ്യങ്ങളുടെ പട്ടികയിലും ഇന്ത്യ മുൻപന്തിയിലുണ്ട്.
യാത്രാ ആവശ്യങ്ങൾക്കായാണ് വിദേശത്ത് ഏറ്റവുമധികം തുക ചെലവഴിക്കുന്നത്. വിദേശത്ത് ചെലവഴിക്കുന്ന 53.6 ശതമാനം തുകയും അവിടെയെത്തുന്നവർ ചെലവഴിക്കുന്നതാണ്.
ബന്ധുക്കൾക്കായും സമ്മാനമായും വിദേശത്ത് പഠിക്കാൻ പോകുന്ന കുട്ടികളുടെ ഫീസായും ഒക്കെ പണം ഇടപാടുകൾ നടക്കുന്നുണ്ട്. 2024ലും ഈ ഇടപാടുകൾ ഉയരുമെന്ന് വിദഗ്ധർ ചൂണ്ടിക്കാട്ടുന്നു.
മധ്യവർഗ കുടുംബാംഗങ്ങളുടെ പണം ചെലവഴിക്കൽ ഉയർന്നതും യാത്രാവശ്യങ്ങൾക്കായി കൂടുതൽ തുക ചെലവഴിച്ച് തുടങ്ങിയതുമൊക്കെ ഇന്ത്യയിൽ നിന്നുള്ള പണമൊഴുക്ക് കൂടാൻ കാരണമായിട്ടുണ്ട്.
വിദേശനാണ്യ വിനിമയം വീണ്ടും ഉയരും
ഇന്ത്യയിലേക്ക് ഒഴുകുന്ന തുകയിലും വർധനയുണ്ട്. ബാങ്ക് ഓഫ് ബറോഡയുടെ കണക്ക് അനുസരിച്ച് 5.5 ശതമാനമാണ് വർധന. മെക്സിക്കോയാണ് ഒന്നാം സ്ഥാനത്ത്. ആഗോള ശരാശരിയേക്കാൾ ഉയർന്ന തുകയാണ് മെക്സിക്കോയിലേക്ക് ഒഴുകുന്നത്.
ആഗോള ശരാശരി വിനിമയം നാലു ശതമാനം ആണങ്കിൽ മെക്സിക്കോയിൽ ഇത് 10 ശതമാനമാണ്. ചൈനക്ക് പിന്നിൽ ഇപ്പോൾ രണ്ടാം സ്ഥാനത്താണ് മെക്സിക്കോ.
യുഎസ്, യൂറോപ്പ്, യുകെ തുടങ്ങിയ രാജ്യങ്ങളിലെ തൊഴിലില്ലായ്മ നിരക്ക് കുറഞ്ഞ് വരുന്നതിനാൽ വിദേശ നാണ്യ വിനിമയം വീണ്ടും ഉയർന്നേക്കും.
ലോകത്ത് വിദേശ നാണ്യം ഏറ്റവും കൂടുതൽ ഒഴുകുന്ന രാജ്യം യുഎസ് ആണ്. 2021-ലെ മൊത്തം തുകയുടെ 25 ശതമാനത്തോളം യുഎസിലേക്കാണ് എത്തിയത്.
ഗൾഫ് രാജ്യങ്ങളിലേക്ക് 17 ശതമാനം തുകയാണ് ഒഴുകിയത്. ജർമനി, യുകെ, റഷ്യ എന്നീ രാജ്യങ്ങളാണ് തൊട്ടുപിന്നിലുള്ളത്.
