മുംബൈ: ഡിജിറ്റൽ മാപ്പിംഗ് കമ്പനിയായ മാപ്മൈഇന്ത്യ (സി.ഇ. ഇൻഫോ സിസ്റ്റംസ്) 2022 സെപ്തംബർ 30ന് അവസാനിച്ച പാദത്തിൽ 4.1 ശതമാനം വർദ്ധനവോടെ 25.4 കോടി രൂപയുടെ അറ്റാദായം രേഖപ്പെടുത്തി. മുൻ വർഷം ഇതേ കാലയളവിൽ കമ്പനിയുടെ അറ്റാദായം 25.39 കോടി രൂപയായിരുന്നു.
അവലോകന പാദത്തിൽ കമ്പനിയുടെ പ്രവർത്തനങ്ങളിൽ നിന്നുള്ള വരുമാനം 17 ശതമാനം വർധിച്ച് 76.3 കോടി രൂപയായപ്പോൾ പലിശ, നികുതി, മൂല്യത്തകർച്ച (ഇബിഐടിഡിഎ) എന്നിവയ്ക്ക് മുമ്പുള്ള വരുമാനം 30.6 കോടി രൂപയാണ്.
2023 സാമ്പത്തിക വർഷത്തിലെ രണ്ടാം പാദം തങ്ങൾക്ക് ആവേശകരമായ ഒരു പാദമായിരുന്നതായും, എല്ലാ മേഖലകളിലെയും മെച്ചപ്പെട്ട പ്രവർത്തനങ്ങളോടെ കമ്പനി ശക്തമായ പ്രകടനം കാഴ്ചവെച്ചതായും മാപ്മൈഇന്ത്യയുടെ സിഇഒയും എക്സിക്യൂട്ടീവ് ഡയറക്ടറുമായ രോഹൻ വർമ പറഞ്ഞു. ഈ കാലയളവിൽ കമ്പനിയുടെ പ്രവർത്തന വിഭാഗങ്ങളായ ഓട്ടോമോട്ടീവ് & മൊബിലിറ്റി ടെക് 55 ശതമാനത്തിന്റെയും ഉപഭോക്തൃ ടെക് & എന്റർപ്രൈസ് ഡിജിറ്റൽ ട്രാൻസ്ഫോർമേഷൻ 29 ശതമാനത്തിന്റെയും വളർച്ചയാണ് രേഖപ്പെടുത്തിയത്.
ഭാവിയിൽ കമ്പനിയുടെ വരുമാനത്തിന്റെ വളർച്ച ത്വരിതപ്പെടുത്താൻ സഹായിക്കുന്ന പുതിയ നിക്ഷേപങ്ങൾ കമ്പനി നടത്തിയിട്ടുണ്ടെന്ന് മാപ്മൈഇന്ത്യ പറഞ്ഞു. ഡിജിറ്റൽ മാപ്പ് ഡാറ്റ, ടെലിമാറ്റിക്സ് സേവനങ്ങൾ, ലൊക്കേഷൻ അടിസ്ഥാനമാക്കിയുള്ള എസ്എഎഎസ്, ജിഐഎസ് എഐ സാങ്കേതികവിദ്യകൾ എന്നിവ നിർമ്മിക്കുന്ന ഒരു ഇന്ത്യൻ സാങ്കേതിക കമ്പനിയാണ് മാപ്മൈഇന്ത്യ.
