ന്യൂഡൽഹി: രാജ്യത്തെ വിവിധ വ്യവസായങ്ങളിൽ ഉടനീളം റിക്കാർഡ് നേട്ടങ്ങളാൽ അടയാളപ്പെടുത്തപ്പെട്ട 2024, ഇന്ത്യയുടെ ഉൽപ്പാദന മേഖലയ്ക്ക് ഒരു നാഴികക്കല്ലായ വർഷമാണ്.
ലോകത്തെ മൂന്നാമത്തെ വലിയ സ്‌മാർട്ട്‌ഫോൺ കയറ്റുമതിക്കാരായി ഇന്ത്യയെ ഉയർത്തിയ ഇലക്ട്രോണിക്സ് മേഖല മുതൽ കൽക്കരി, സ്റ്റീൽ എന്നിവയുടെ അസാമാന്യമായ ഉൽപ്പാദനം വരെയുള്ള മുന്നേറ്റങ്ങളുമായി രാജ്യം ആഗോളതലത്തിൽ അതിന്‍റെ സാന്നിധ്യം അറിയിച്ചു.
എന്നാൽ ഈ നാഴികക്കല്ലുകൾ കേവലം ഒരു വർഷത്തെ പരിശ്രമത്തിന്‍റെ ഫലമല്ല. വർഷങ്ങളായുള്ള സ്ഥിരതയാർന്ന പ്രവർത്തനങ്ങൾ, തന്ത്രപരമായ നിക്ഷേപങ്ങൾ, ഗവണ്മെന്‍റ് ഉദ്യമങ്ങൾ എന്നിവയുടെ പരിണിത ഫലത്തെയാണ് അവ പ്രതിനിധീകരിക്കുന്നത്.
കഴിഞ്ഞ ദശകത്തിലുടനീളം രാജ്യം സ്ഥിരമായി ഒരു ആഗോള ഉൽപ്പാദന കേന്ദ്രമായി നിലകൊള്ളുന്നു. ആഭ്യന്തരവും ആഗോളവുമായ ആവശ്യങ്ങൾ നിറവേറ്റുന്നതിന് പര്യാപ്തമായ അസംസ്‌കൃത ഉരുക്കിന്‍റെ റെക്കോർഡ് ഉൽപ്പാദനം മുതൽ ഇലക്ട്രിക് വാഹനങ്ങളിലും ഉപഭോക്തൃ ഇലക്ട്രോണിക്‌സിലും ഉണ്ടായ മുന്നേറ്റം വരെ.
കളിപ്പാട്ടങ്ങൾ പോലെ ഒരു കാലത്ത് വളർച്ച മുരടിച്ചതായി കണക്കാക്കപ്പെട്ടിരുന്ന മേഖലകളിൽ ഇപ്പോൾ കയറ്റുമതി 239% വർദ്ധിക്കുകയും ഇറക്കുമതി 52% കുറയ്ക്കുകയും ചെയ്തുകൊണ്ട് അഭൂതപൂർവമായ വികാസം ഉണ്ടായിരിക്കുന്നു.
ഇന്ത്യയുടെ മരുന്ന് നിർമാണ വ്യവസായത്തിന് ഇപ്പോൾ 748 യുഎസ്എഫ്ഡിഎ-അംഗീകൃത സൈറ്റുകൾ ഉണ്ടെന്നുള്ളത് അതിന്‍റെ ലോകോത്തര ഉൽപ്പാദന ശേഷിയുടെ തെളിവാണ്. സോളാർ പാനലുകളുടെയും കാറ്റാടി യന്ത്രങ്ങളുടെയും ഉൽപാദനത്തിലെ കുതിച്ചുചാട്ടം പുനരുപയോഗ ഊർജത്തോടുള്ള ഇന്ത്യയുടെ വർദ്ധിച്ചുവരുന്ന പ്രതിബദ്ധതയെ പ്രതിഫലിപ്പിക്കുന്നു.
സർക്കാർ ഉദ്യമങ്ങളുടെയും സ്വകാര്യ നവപ്രവർത്തനങ്ങളുടെയും പിന്തുണയോടെയുള്ള ഈ ബഹു-മേഖലാ വളർച്ച, സാമ്പത്തിക പ്രതിരോധത്തിലേക്കും ആഗോള മത്സരക്ഷമതയിലേക്കുമുള്ള കൂട്ടായ മുന്നേറ്റത്തിന് അടിവരയിടുന്നു.
ഇന്ത്യയുടെ നിർമാണ മേഖല 2024-ൽ ശ്രദ്ധേയമായ വളർച്ചയ്ക്ക് സാക്ഷ്യം വഹിച്ചുകൊണ്ട് ഒരു ആഗോള ശക്തി കേന്ദ്രമായി മാറുന്നതിന് അടിവരയിടുന്നു. ഇന്ത്യയെ ഒരു നിർമാണ ഭീമനായി മാറ്റുന്നതിന് ശ്രദ്ധേയമായ മുന്നേറ്റങ്ങൾ നടത്തികൊണ്ടിരിക്കുന്ന മേക്ക് ഇൻ ഇന്ത്യ സംരംഭവും 2024-ൽ 10 വർഷം പൂർത്തിയാക്കി.
ഇന്ത്യക്കാർ ഒരിക്കലും സ്വാധീനം ചെലുത്തുമെന്ന് കരുതിയിട്ടില്ലാത്ത മേഖലകൾ ഉൾപ്പെടെ എല്ലാ മേഖലകളിലും ‘മേക്ക് ഇൻ ഇന്ത്യ’ യുടെ മുദ്ര ദൃശ്യമായി. കഴിഞ്ഞ ദശകത്തിൽ, ഇന്ത്യയുടെ ഉൽപ്പാദന മേഖല ഗണ്യമായ പരിവർത്തനത്തിന് വിധേയമായിട്ടുണ്ട്. ഇത് പ്രധാനമായും ‘മേക്ക് ഇൻ ഇന്ത്യ’ എന്ന ഉദ്യമത്തിലൂടെയാണ് മുന്നേറിയത്.
14 മേഖലകളിലായി ഉൽപ്പാദന ബന്ധിത പ്രോത്സാഹന (പിഎൽഐ) പദ്ധതികൾ അവതരിപ്പിക്കുകയും 1.28 ലക്ഷം കോടി രൂപയിലധികം നിക്ഷേപം ആകർഷിക്കുകയും 8.5 ലക്ഷത്തിലധികം തൊഴിലവസരങ്ങൾ സൃഷ്ടിക്കുകയും ചെയ്തത് പ്രധാന സംഭവവികാസങ്ങളിൽ ഉൾപ്പെടുന്നു.
കളിപ്പാട്ട കയറ്റുമതിയിൽ 239% വർധനയും മൊബൈൽ ഫോൺ ഉൽപ്പാദനത്തിൽ 600% ഉയർച്ചയും പോലുള്ള ശ്രദ്ധേയമായ നേട്ടങ്ങളോടെ ഈ ഉദ്യമങ്ങൾ ഇലക്ട്രോണിക്സ്, സ്റ്റീൽ, ഫാർമസ്യൂട്ടിക്കൽസ്, പ്രതിരോധ ഉത്പാദനം എന്നിവയിലെ വളർച്ചയ്ക്ക് ഉത്തേജനം നൽകി.
ഉൽപ്പാദനം ഇരട്ടിയായതോടെ ഇന്ത്യ ഉരുക്കിന്‍റെ മൊത്ത കയറ്റുമതിക്കാരായി മാറുകയും ഫാർമസ്യൂട്ടിക്കൽസിലും ടെലികോം ഉപകരണങ്ങളിലും ഇറക്കുമതിയെ ആശ്രയിക്കുന്നത് ഗണ്യമായി കുറയ്ക്കുകയും ചെയ്തു.
കുതിച്ചുയർന്ന പ്രതിരോധ കയറ്റുമതി 85-ലധികം രാജ്യങ്ങളിൽ എത്തിയപ്പോൾ 2024-ഓടെ ആഗോള ഉൽപ്പാദന നിലവാരം ഉയർത്തിക്കൊണ്ട് അർദ്ധചാലക നിർമാണത്തിലും പുനരുപയോഗ ഊർജത്തിലും രാജ്യം കുതിച്ചുയർന്നു.
2023-24 സാമ്പത്തിക വർഷത്തിൽ 9.5% ഉയർന്ന വ്യാവസായിക വളർച്ചാ നിരക്കോടെ മൊത്തം 8.2% സാമ്പത്തിക വളർച്ച കൈവരിക്കുകയും ഉല്പാദന നിർമ്മാണ മേഖലകളിലെ വളർച്ച നിരക്ക് ഇരട്ട അക്കത്തോട് അടുക്കുകയും ചെയ്തു.
കഴിഞ്ഞ ഒരു ദശകത്തിലെ സുസ്ഥിരമായ പരിശ്രമങ്ങളുടെയും തന്ത്രപരമായ ഇടപെടലുകളുടെയും പരിണിതഫലമാണ് മേക്ക് ഇൻ ഇന്ത്യ കാമ്പെയ്‌നിന്‍റെ പത്താം വാർഷികം ആഘോഷിക്കുന്ന വേളയിൽ ഈ വളർച്ച പ്രതിഫലിപ്പിക്കുന്നത്.
2024-ലെ നയങ്ങളും അടിസ്ഥാന സൗകര്യ വികസന ഉദ്യമങ്ങളും
നിരവധി ഉദ്യമങ്ങൾ 2024-ൽ ഇന്ത്യയുടെ ഉല്പാദന ആവാസവ്യവസ്ഥയെ കൂടുതൽ കാര്യക്ഷമമാക്കി:
- ജൻ വിശ്വാസ് 2.0 ബിൽ ആവിഷ്കരിച്ചത് ബിസിനസ്സ് ചെയ്യാനുള്ള സാഹചര്യങ്ങൾ കൂടുതൽ ലളിതമാക്കി.
- 100 നഗരങ്ങൾക്ക് സമീപം സാധ്യമാക്കിയ പ്ലഗ് ആൻഡ് പ്ലേ വ്യവസായ പാർക്കുകളുടെ വികസനം നിക്ഷേപങ്ങളെ ആകർഷിച്ചു.
- ക്രിട്ടിക്കൽ മിനറൽ മിഷന്‍റെ ആവിർഭാവം ആഭ്യന്തര ഉൽപ്പാദനവും പുനരുപയോഗവും ഉൾപ്പെടെയുള്ള അവശ്യ വിഭവങ്ങളിലേക്കുള്ള പ്രവേശനം ഉറപ്പാക്കി.
- കൂടാതെ, പുതിയ ബയോ-മാനുഫാക്ചറിംഗ്, ബയോ-ഫൗണ്ടറി പദ്ധതികളുടെ തുടക്കം ഇന്ത്യയെ ജൈവ ഉൽപ്പാദനത്തിൽ നേതൃസ്‌ഥാനത്തേയ്ക്ക് ഉയർത്തുമെന്ന പ്രതീക്ഷ നൽകുന്നു.
പ്രധാന വ്യവസായങ്ങളെ ശക്തിപ്പെടുത്തുന്നു. - 2014 മുതൽ ഉൽപ്പാദനം 50% വർധിപ്പിച്ചുകൊണ്ടും 2024 സാമ്പത്തിക വർഷം എക്കാലത്തെയും ഉയർന്ന സ്റ്റീൽ ഉൽപ്പാദനവും ഉപഭോഗ നിലവാരവും കൈവരിച്ചുകൊണ്ടും ഇന്ത്യ ഉരുക്ക് ഉൽപ്പന്നങ്ങളുടെ മൊത്ത കയറ്റുമതിക്കാരായിമാറി.
- ഊർജ സുരക്ഷയിൽ നിർണായകമായ കൽക്കരി മേഖല 2024 സാമ്പത്തിക വർഷത്തിൽ 997.2 ദശലക്ഷം ടൺ ഉത്പാദനം നടത്തുകയും കഴിഞ്ഞ ദശകത്തിൽ 60% വളർച്ചയോടെ ഇറക്കുമതി ആശ്രിതത്വം കുറക്കുകയും ചെയ്തു.
- 50 ബില്യൺ ഡോളർ മൂല്യമുള്ള ഫാർമസ്യൂട്ടിക്കൽ വ്യവസായം അതിന്‍റെ വ്യാപ്തി അനുസരിച്ച് ലോകത്തിലെ മൂന്നാമത്തെ വലിയ വ്യവസായമായി തുടരുന്നു. പിഎൽഐ സ്‌കീമുകൾക്ക് കീഴിലുള്ള 30,000 കോടി രൂപയുടെ നിക്ഷേപങ്ങൾ ബയോസിമിലറുകൾ, വാക്‌സിനുകൾ, ജനറിക് മരുന്നുകൾ എന്നിവയുടെ വളർച്ചയ്ക്ക് ഉത്തേജനം നൽകികൊണ്ട് താങ്ങാനാവുന്ന ആരോഗ്യപരിരക്ഷ മാർഗങ്ങളിലുള്ള ഇന്ത്യയുടെ ആഗോള നേതൃത്വം ദൃഢമാക്കി.
