മുംബൈ: 2022 സെപ്റ്റംബറിൽ അവസാനിച്ച പാദത്തിൽ ഏകീകൃത അറ്റാദായം 22.5% ഉയർന്ന് 2,229 കോടി രൂപയിലെത്തിയതായി ലാർസൻ ആൻഡ് ടൂബ്രോ (എൽ ആൻഡ് ടി) അറിയിച്ചു. സമാനമായി ഏകീകൃത വരുമാനം 23% വർധിച്ച് 42,763 കോടി രൂപയായി ഉയർന്നു.
ത്രൈമാസത്തിൽ കമ്പനിയുടെ ഓർഡർ ബുക്ക് 3.72 ലക്ഷം കോടി രൂപയായി വർധിച്ചു. മൊത്തം ഓർഡറുകളിലെ അന്താരാഷ്ട്ര ഓർഡറുകളുടെ വിഹിതം 28 ശതമാനമാണ്. പ്രധാന ഇൻഫ്രാസ്ട്രക്ചർ വിഭാഗത്തിലെ ശക്തമായ നിർവഹണവും ഐടി, ടെക്നോളജി സേവന പോർട്ട്ഫോളിയോയിലെ സുസ്ഥിരമായ വളർച്ചയുമാണ് വരുമാനം വളർച്ചയ്ക്ക് കാരണമായതെന്ന് കമ്പനി പത്രക്കുറിപ്പിൽ അറിയിച്ചു.
എൽ ആൻഡ് ടിയുടെ ഏകീകൃത പ്രവർത്തന ലാഭം 22.6% ഉയർന്ന് 4,899.4 കോടി രൂപയിലെത്തി, അതേസമയം മാർജിൻ 3 അടിസ്ഥാന പോയിന്റ് കുറഞ്ഞ് 11.46% ആയി. പദ്ധതികളുടെ ത്വരിതഗതിയിലുള്ള നിർവ്വഹണത്തിന്റെ പശ്ചാത്തലത്തിൽ കമ്പനിയുടെ മുൻനിര ഇൻഫ്രാസ്ട്രക്ചർ പ്രോജക്ട് വിഭാഗം വരുമാനത്തിൽ 39% വളർച്ച രേഖപ്പെടുത്തി.
എന്നാൽ കമ്പനിയുടെ ഊർജ വിഭാഗം പദ്ധതികളുടെ മന്ദഗതിയിലുള്ള നിർവ്വഹണം കാരണം പാദ വരുമാനത്തിൽ 7% ഇടിവ് രേഖപ്പെടുത്തി. കൂടാതെ ഹൈടെക് മാനുഫാക്ചറിംഗ് വിഭാഗത്തിന്റെ വരുമാനത്തിൽ നേരിയ ഇടിവ് സംഭവിച്ചു, എന്നാൽ അനുകൂലമായ മിശ്രിതം കാരണം മാർജിൻ 18.5% ആയി വർദ്ധിച്ചു.
എൽ ആൻഡ് ടി എന്നറിയപ്പെടുന്ന ലാർസൻ ആൻഡ് ടൂബ്രോ ലിമിറ്റഡ് മുംബൈ ആസ്ഥാനമായി പ്രവർത്തിക്കുന്ന എഞ്ചിനീയറിംഗ്, നിർമ്മാണം, സാങ്കേതികവിദ്യ, ഇൻഫർമേഷൻ ടെക്നോളജി, ഫിനാൻഷ്യൽ സേവനങ്ങൾ എന്നിവയിൽ ബിസിനസ് താൽപ്പര്യങ്ങളുള്ള ഒരു ഇന്ത്യൻ മൾട്ടിനാഷണൽ കമ്പനിയാണ്.
