മൂന്നാംപാദ പ്രവര്ത്തന ഫലങ്ങള് പുറത്തുവരാനിരിക്കെ ലൈഫ് ഇന്ഷുറന്സ് കോര്പറേഷന്റെ (എല്.ഐ.സി) ഓഹരി വിലയില് കുതിപ്പ്. 1,120 രൂപയെന്ന റെക്കോഡ് നിലവാരത്തിലാണ് വ്യാപാരം നടക്കുന്നത്. ഓഹരി വില കുതിച്ചതോടെ വിപണി മൂല്യം ഏഴ് ലക്ഷം കോടി കടന്നു.
പ്രീമിയം ഇനത്തിലെ വളര്ച്ച ഇന്ഷുറന്സ് ഭീമനായ എല്ഐസിയുടെ പ്രവര്ത്തനഫലത്തില് പ്രതിഫലിക്കുമെന്നാണ് വിലയിരുത്തല്. എം.കെ ഗ്ലോബലിന്റെ അനുമാന പ്രകാരം അറ്റാദായത്തില് 12.2ശതമാനം വര്ധനവുണ്ടാകും.
ഡിസംബര് പാദത്തില് പ്രതീക്ഷിക്കുന്ന ലാഭം 7,108.70 കോടി രൂപയാണ്. ഇതോടെ ബ്രോക്കിങ് ഹൗസുകള് ഹ്രസ്വ-ഇടക്കാലയളവിലെ ലക്ഷ്യവില ഉയര്ത്തിയിട്ടുണ്ട്. 1,150 രൂപവരെ വില ഉയര്ന്നേക്കാം.
എല്ഐസിയുടെ ഓഹരി കുതിച്ചതോടെ പൊതുമേഖലയിലെ മറ്റ് ഇന്ഷുറന്സ് കമ്പനികളും നേട്ടമുണ്ടാക്കി. ജനറല് ഇന്ഷുറന്സ് കോര്പറേഷന്റെ ഓഹരി വില 52 ആഴ്ചയിലെ ഉയര്ന്ന നിലവാരമായ 460.90 രൂപയിലെത്തുകയും ചെയ്തു.
ന്യൂ ഇന്ത്യ അഷ്വറന്സ് കമ്പനിയുടെ ഓഹരി വില 14 ശതമാനമാണ് ഉയര്ന്നത്.
