മുംബൈ: ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ (LIC), അദാനി ഗ്രൂപ്പിലെ പ്രമുഖ സിമന്റ് കമ്പനിയായ എസിസി ലിമിറ്റഡിലെ (ACC Ltd.) ഓഹരി പങ്കാളിത്തം 10 ശതമാനത്തിലധികമായി ഉയർത്തി. നേരത്തെ ഇത് ഏകദേശം 8.30 ശതമാനം ആയിരുന്നു. പുതിയ കണക്കുകൾ പ്രകാരം, എൽഐസിയുടെ എസിസി ലിമിറ്റഡിലെ ഓഹരി പങ്കാളിത്തം 10.50 ശതമാനത്തിലധികമായി വർദ്ധിച്ചു.
എൽഐസി അവരുടെ നിക്ഷേപം വർദ്ധിപ്പിച്ച മറ്റൊരു പ്രധാന സ്ഥാപനം എൻബിസിസി ഇന്ത്യ (NBCC India) ആണ്. ഈ പൊതുമേഖലാ സ്ഥാപനത്തിലെ എൽഐസിയുടെ ഓഹരി പങ്കാളിത്തം 4.50 ശതമാനത്തോളമായി ഉയർത്തി.
എൽഐസിയുടെ ഈ നിക്ഷേപം വർദ്ധിപ്പിക്കാനുള്ള തീരുമാനം, ഈ ഓഹരികളിലുള്ള സ്ഥാപനത്തിന്റെ വിശ്വാസമാണ് വ്യക്തമാക്കുന്നത്. രാജ്യത്തെ ഏറ്റവും വലിയ സ്ഥാപന നിക്ഷേപകരിലൊരാളായ എൽഐസി, അദാനി ഗ്രൂപ്പിലെ കമ്പനികളിൽ താൽപ്പര്യം കാണിക്കുന്നതും ഓഹരി പങ്കാളിത്തം വർദ്ധിപ്പിക്കുന്നതും ശ്രദ്ധയമായ നീക്കമാണ്. അദാനി ഗ്രൂപ്പിലെ പ്രധാന കമ്പനിയായ എസിസിയിലെ എൽഐസിയുടെ ഓഹരി പങ്കാളിത്തം 10 ശതമാനം കടന്നത്, നിലവിലെ വിപണി സാഹചര്യങ്ങളിൽ സ്ഥാപനപരമായ നിക്ഷേപങ്ങൾ ശക്തിപ്പെടുത്തുന്നതിൻ്റെ സൂചനയാണ്.
എസിസി ഓഹരികൾ കഴിഞ്ഞ മൂന്ന് മാസത്തിനുള്ളിൽ 3 ശതമാനമാണ് നേട്ടമുണ്ടാക്കിയത്. അതേസമയം ഒരു വർഷത്തിനുള്ളിൽ 15 ശതമാനത്തിലധികവും കഴിഞ്ഞ ആറ് മാസത്തിനുള്ളിൽ 3 ശതമാനത്തിലധികവും ഓഹരികള് ഇടിഞ്ഞു.
പൊതുമേഖലാ ഓഹരിയായ എൻബിസിസി (ഇന്ത്യ) ഒരു വർഷത്തിനുള്ളിൽ 20 ശതമാനത്തിലധികവും കഴിഞ്ഞ ആറ് മാസത്തിനുള്ളിൽ 2 ശതമാനത്തിലധികവും ഉയർന്നു.
