1996-ല്‍ കോഴിക്കോട്ടാണ് ആദ്യമായി അന്താരാഷ്ട്ര ചലച്ചിത്രോത്സവം നടന്നത്. പിന്നീട് തിരുവനന്തപുരം സ്ഥിരം വേദിയായി മാറുകയായിരുന്നു. ഏഷ്യ, ആഫ്രിക്ക, ലാറ്റിന്‍ അമേരിക്ക എന്നീ പ്രദേശങ്ങളിലെ സിനിമകളെ മുന്‍നിരയില്‍ എത്തിക്കുക, പുതുമുഖങ്ങളെയും സാമൂഹിക വിഷയങ്ങളെയും പ്രോത്സാഹിപ്പിക്കുക എന്നിവയാണ് ഈ മേളയുടെ പ്രധാന ലക്ഷ്യം.
അന്താരാഷ്ട്ര ചലച്ചിത്രോത്സവം കേരളത്തിന് സിനിമയെ വിനോദ മാധ്യമമെന്നതിലപ്പുറം ഒരു സാമൂഹിക ഭാഷ ആക്കി മാറ്റിയ വേദി കൂടിയാണ്. ലോക ചലച്ചിത്ര ലോകത്ത് കേരളത്തെ ഒരു സാംസ്‌കാരിക കേന്ദ്രമായി മാറ്റി. സിനിമയിലൂടെ മനുഷ്യാവകാശം, ജനാധിപത്യം, സ്ത്രീ സ്വാതന്ത്ര്യം, സമത്വം തുടങ്ങിയ മൂല്യങ്ങള്‍ സമൂഹത്തിലേക്ക് എത്തിക്കുന്നതില്‍ ഈ മേളയ്ക്ക് വലിയ പങ്കുണ്ട്. അന്താരാഷ്ട്ര ചലച്ചിത്രോത്സവത്തിലൂടെ മലയാള സിനിമയും അതിന്റെ ദൃശ്യ സംസ്‌കാരവും ആഗോള വേദികളില്‍ അംഗീകാരം നേടി. സുവര്‍ണ ചകോരം എന്ന പുരസ്‌കാരത്തോടെ അന്താരാഷ്ട്ര ചലച്ചിത്രങ്ങള്‍ക്ക് ബഹുമാനവും മലയാള ചിത്രങ്ങള്‍ക്ക് ആഗോള മതിപ്പും ലഭിച്ചു. സിനിമ പ്രേമികളുടെയും ചലച്ചിത്ര പ്രവര്‍ത്തകരുടെയും ആഘോഷമായി മാറിയ ഈ മേളയില്‍ ലോകത്തെ മികച്ച സംവിധായകരും താരങ്ങളും പങ്കുചേരുന്നു. ഈ മേള ലോക സിനിമയിലെ വൈവിധ്യങ്ങളെയും സാംസ്‌കാരിക അനുഭവങ്ങളെയും മലയാള പ്രേക്ഷകര്‍ക്ക് പരിചയപ്പെടുത്തുന്ന വേദിയായി. ഐഎഫ്എഫ്കെ കേരളത്തെ ആഗോള ചലച്ചിത്ര കലണ്ടറിലെ പ്രധാന ഉത്സവങ്ങളിലൊന്നായി ഉയര്‍ത്തിയിട്ടുണ്ട്.
