സാന്‍ ഫ്രാന്‍സിസ്‌കോ: ചിപ്പ് നിര്‍മാതാക്കളായ ഇന്റല്‍, കുറഞ്ഞത് 140 ജീവനക്കാരെ പിരിച്ചുവിടും. ഫോള്‍സോം ആര്‍ & പഡി കാമ്പസിലെ 89 ജീവനക്കാരെയും കാലിഫോര്‍ണിയയിലെ സാന്‍ ജോസില്‍ 51 ജീവനക്കാരെയുമാണ് തീരുമാനം ബാധിക്കുക. ചെലവ് കുറയ്ക്കുക ലക്ഷ്യമിട്ടാണ് നടപടി.
പുതിയ തൊഴില്‍ വെട്ടിക്കുറയ്ക്കല്‍ തൊഴില്‍ ഉദ്യോഗസ്ഥരെ അറിയിച്ചിട്ടുണ്ടെന്നും ഈ മാസം അവസാനം നടപടി പ്രാബല്യത്തില്‍ വരുമെന്നും സാക്രമെന്റോ ഇന്നോ റിപ്പോര്‍ട്ട് ചെയ്തു. 10 ജിപിയു സോഫ്‌റ്റ്വെയര്‍ ഡെവലപ്‌മെന്റ് എഞ്ചിനീയര്‍മാര്‍, എട്ട് സിസ്റ്റം സോഫ്‌റ്റ്വെയര്‍ ഡെവലപ്‌മെന്റ് എഞ്ചിനീയര്‍മാര്‍, ആറ് ക്ലൗഡ് സോഫ്‌റ്റ്വെയര്‍ എഞ്ചിനീയര്‍മാര്‍, ആറ് പ്രൊഡക്ട് മാര്‍ക്കറ്റിംഗ് എഞ്ചിനീയര്‍മാര്‍, ആറ് സിസ്റ്റം ഓണ്‍-ചിപ്പ് ഡിസൈന്‍ എഞ്ചിനീയര്‍മാര്‍ എന്നിവരെയാണ് കമ്പനി പിരിച്ചുവിടുന്നത്. ഇതോടെ ഫോള്‍സോം ആര്‍ & ഡി കാമ്പസില്‍ നിന്ന് ഈ വര്‍ഷം നീക്കം ചെയ്യപ്പെട്ട തസ്തികകളുടെ എണ്ണം 500 ആയി.
2022 ന്റെ തുടക്കത്തില്‍ ഫോള്‍സോമില്‍ 5,300 ജീവനക്കാരാണുണ്ടായിരുന്നത്. എസ്എസ്ഡികള്‍, ഗ്രാഫിക്‌സ് പ്രോസസ്സറുകള്‍, സോഫ്‌റ്റ്വെയര്‍, ചിപ്‌സെറ്റുകള്‍ എന്നിവയുടെ വികസനം ഉള്‍പ്പെടെ വിവിധ ഗവേഷണ-വികസന പ്രവര്‍ത്തനങ്ങളാണ് ഇവിടെ നടന്നുവരുന്നത്. വെല്ലുവിളി നിറഞ്ഞ മാക്രമോ ഇക്കണോമിക് പരിതസ്ഥിതിയാണ് ചെലവുകുറയ്ക്കല്‍ നടപടികളിലേയ്ക്ക് കമ്പനിയെ നയിച്ചത്.
പിരിച്ചുവിടല്‍ എത്ര ജീവനക്കാരെ ബാധിക്കുമെന്നതില്‍ ഔദ്യോഗിക സ്ഥിരീകരണമില്ല.
