ബെംഗളൂരു: രാജ്യാന്തര ടെലി കമ്മ്യൂണിക്കേഷൻ കമ്പനിയായ ലിബേർട്ടി ഗ്ലോബലിൽ നിന്ന് 160 കോടി ഡോളറിൻെറ കരാർ നേടി ഇൻഫോസിസ്. കമ്പനിയുടെ എൻറർടെയ്ൻറ്മൻറ് കണക്റ്റിവിറ്റി പ്ലാറ്റ്‌ഫോമുകൾ നിർമ്മിക്കുന്നതിനായി ആണ് ലിബർട്ടി ഗ്ലോബലിൽ നിന്ന് കരാർ ലഭിച്ചത്.
ലിബർട്ടി ഗ്ലോബലിനായി ക്ലൗഡ് അധിഷ്ഠിത ഡിജിറ്റൽ സേവനങ്ങൾ ഉപയോഗിക്കുന്നതിന് എഐ ഉപയോഗിക്കുമെന്ന് ഇൻഫോസിസ് ചീഫ് എക്സിക്യൂട്ടീവ് ഓഫീസർ സലിൽ പരേഖ് പറഞ്ഞു.
അഞ്ച് വർഷമാണ് കരാർ കാലാവധി. ഇത് എട്ട് വർഷത്തേക്ക് നീട്ടാനാകും. കരാർ നീട്ടിയൽ ഇടപാടുകളുടെ മൂല്യം 250 കോടി ഡോളറിലെത്തും.
സാങ്കേതിക രംഗത്തെ പുതിയ നിക്ഷേപങ്ങ‌ൾ ഉൾപ്പെടെ പ്രതിവർഷം 100 മില്യൺ യൂറോയിൽ കൂടുതൽ നേടാൻ ലിബർട്ടി ഗ്ലോബലിനെ ഈ കരാർ സഹായിക്കുമെന്നാണ് സൂചന.
അത്യാധുനിക എഐ സാങ്കേതികവിദ്യകൾ ഉൾപ്പെടെ വികസിപ്പിച്ച് രാർ പ്രകാരം നിർമ്മിക്കുന്ന എല്ലാ പ്ലാറ്റ്‌ഫോമുകൾക്കും ലിബർട്ടി ഗ്ലോബൽ ഇൻഫോസിസിന് ലൈസൻസ് നൽകും. കമ്പനിക്ക് പുതിയ ഓപ്പറേറ്റർമാർക്കും പുതിയ വിപണികൾക്കും സമാനമായ സേവനങ്ങൾ നൽകാൻ കഴിയും എന്നതാണ് ഇതിൻെറ മെച്ചം.
ലിബർട്ടി ഗ്ലോബലിൻെറ 400 ജീവനക്കാരും ഇൻഫോസിസിനൊപ്പം ഇതിൽ പങ്കാളിയാകും. . ലിബർട്ടി ഗ്ലോബലിൻെറ പ്രോഡക്റ്റ്, ടെക്‌നോളജി ഡെവലപ്‌മെൻറ്, സർവീസ് ഡെലിവറി ഗ്രൂപ്പ് എന്നിവയിൽ നിന്നുള്ള മുതിർന്ന ഉദ്യോഗസ്ഥരും ഇൻഫോസിസിലെത്തും. പുതിയ പ്രതിഭകളെയും ടീമംഗങ്ങളെയും സ്വാഗതം ചെയ്യാൻ ഒരുങ്ങുകയാണ് കമ്പനി.
അടുത്തിടെ, എച്ച്സിഎൽ ടെക് ആഗോള ടെക് ഭീമനായ വെറൈസൺ ബിസിനസുമായി സഹകരിക്കുമെന്ന് പ്രഖ്യാപിച്ചിരുന്നു. ഇത് ഇന്ത്യൻ ഐടി കമ്പനി ഓഹരികളിൽ മുന്നേറ്റത്തിന് കാരണമായിട്ടുണ്ടെന്ന് നിരീക്ഷകർ പറയുന്നു. ഇതിനുശേഷമാണ് ഇൻഫോസിസ് ലിബർട്ടി ഗ്ലോബലുമായുള്ള കരാർ വിവരം പ്രഖ്യാപിച്ചത്.
ഓഗസ്റ്റ് 15ന് ആണ് കരാർ വിവരങ്ങൾ ഇൻഫോസിസ് വെളിപ്പെടുത്തിയത്.
