ന്യൂഡൽഹി: ഡല്ഹിയുടെ യാത്രാചരിത്രത്തില് പുതിയൊരു അധ്യായം കുറിച്ചുകൊണ്ട് രാജ്യത്തെ ആദ്യത്തെ ‘റിംഗ് മെട്രോ’ ശൃംഖല പൂര്ണ്ണ സജ്ജമായി. പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത പുതിയ ഇടനാഴികളോടെയാണ് നഗരത്തെ ചുറ്റിക്കിടക്കുന്ന ഈ വിസ്മയ പാത പൂര്ത്തിയായത്.
പിങ്ക് ലൈനിലെ മജ്ലിസ് പാര്ക്ക്-മൗജ്പൂര് ബാബര്പൂര് സെക്ഷനും മജന്ത ലൈനിലെ ദീപാലി ചൗക്ക്-മജ്ലിസ് പാര്ക്ക് സ്ട്രെച്ചും തുറന്നതോടെ, 71.56 കിലോമീറ്റര് ദൈര്ഘ്യമുള്ള പാത നഗരത്തിന്റെ പ്രധാന ഭാഗങ്ങളെ കോര്ത്തിണക്കുന്ന ഒരു സമ്പൂര്ണ വൃത്തമായി മാറി.
ഏകദേശം 33,500 കോടി രൂപയുടെ വികസന പദ്ധതികളുടെ ഭാഗമായാണ് ഈ മെട്രോ വിപുലീകരണം നടപ്പിലാക്കിയത്. ഇതില് യമുനയ്ക്ക് കുറുകെ നിര്മ്മിച്ച പുതിയ പാലവും, മെട്രോ പാതയും റോഡ് ഫ്ലൈഓവറും ഒരേ തൂണുകളില് വരുന്ന ‘ഡബിള് ഡെക്കര് വയഡക്റ്റും’ എഞ്ചിനീയറിംഗ് മികവിന്റെ അടയാളങ്ങളാണ്.
ബുരാരി, ഭജന്പുര, യമുന വിഹാര് തുടങ്ങി വടക്കന്-വടക്കുകിഴക്കന് ഡല്ഹിയിലെ ജനസാന്ദ്രതയേറിയ പ്രദേശങ്ങളിലെ ലക്ഷക്കണക്കിന് യാത്രക്കാര്ക്ക് ഈ പുതിയ പാത വലിയ ആശ്വാസമാകും.
യാത്രാ സൗകര്യത്തിനൊപ്പം ഡല്ഹിയുടെ മുഖച്ഛായ മാറ്റുന്ന വമ്പന് ഭവന പദ്ധതികള്ക്കും പ്രധാനമന്ത്രി തുടക്കം കുറിച്ചു. സരോജിനി നഗര്, നേതാജി നഗര് തുടങ്ങി ഏഴ് സര്ക്കാര് കോളനികളുടെ പുനര്വികസനത്തിലൂടെ 21,000-ത്തിലധികം ആധുനിക റെസിഡന്ഷ്യല് യൂണിറ്റുകളാണ് നിര്മ്മിക്കുന്നത്.
ഇതിന്റെ ഭാഗമായി പുതുതായി പണിതീര്ത്ത 2,722 ഫ്ലാറ്റുകളുടെ ഉദ്ഘാടനവും അദ്ദേഹം നിര്വഹിച്ചു. മികച്ച അടിസ്ഥാന സൗകര്യങ്ങളോടെയുള്ള ഈ ഗ്രീന് സിറ്റി പ്രോജക്റ്റുകള് നഗരജീവിതത്തിന്റെ നിലവാരം ഉയര്ത്തുന്നവയാണ്.
മെട്രോയുടെ അടുത്ത ഘട്ടത്തിനുള്ള മൂന്ന് പുതിയ ഇടനാഴികള്ക്കും ഇതോടൊപ്പം തറക്കല്ലിട്ടു. ആര്.കെ. ആശ്രമം മാര്ഗിനെ ഇന്ദ്രപ്രസ്ഥയുമായി ബന്ധിപ്പിക്കുന്ന ഭൂഗര്ഭ സെന്ട്രല് വിസ്റ്റ ഇടനാഴി ഉള്പ്പെടെയുള്ള പദ്ധതികള് പൂര്ത്തിയാകുന്നതോടെ ഡല്ഹി മെട്രോ ലോകത്തിലെ തന്നെ ഏറ്റവും മികച്ച പൊതുഗതാഗത സംവിധാനങ്ങളിലൊന്നായി മാറും.
യാത്രാസമയം കുറയ്ക്കാനും മലിനീകരണം നിയന്ത്രിക്കാനും സഹായിക്കുന്ന ഈ ‘റിംഗ് മെട്രോ’ ഇന്ത്യയുടെ അടിസ്ഥാന സൗകര്യ വികസനത്തിലെ ഒരു നാഴികക്കല്ലാണ്.
