മുംബൈ: 2021-22 സാമ്പത്തിക വർഷത്തിൽ 6,089.84 കോടി രൂപയുടെ അറ്റാദായം രേഖപ്പെടുത്തി ഇന്ത്യൻ റെയിൽവേ ഫിനാൻസ് കോർപ്പറേഷൻ ലിമിറ്റഡ് (ഐആർഎഫ്സി). ഇത് കഴിഞ്ഞ സാമ്പത്തിക വർഷത്തിലെ അറ്റാദായമായ 4,416.13 കോടി രൂപയിൽ നിന്ന് 37.89 ശതമാനം വർധിച്ചതായി കമ്പനി അറിയിച്ചു.
ഐആർഎഫ്സിയുടെ 35-ാമത് വാർഷിക പൊതുയോഗം അതിന്റെ ചെയർമാനും മാനേജിംഗ് ഡയറക്ടറുമായ അമിതാഭ് ബാനർജിയുടെ അധ്യക്ഷതയിൽ വെള്ളിയാഴ്ച നടന്നു. അവലോകന വർഷത്തിൽ ഐആർഎഫ്സി മികച്ച സാമ്പത്തിക പ്രകടനം കാഴ്ചവെച്ചതായും. എക്കാലത്തെയും ഉയർന്ന വരുമാനവും ലാഭവും നേടിയതായും എജിഎമ്മിനെ അഭിസംബോധന ചെയ്ത് കൊണ്ട് ബാനർജി പറഞ്ഞു.
പ്രസ്തുത കാലയളവിലെ കമ്പനിയുടെ പ്രവർത്തനങ്ങളിൽ നിന്നുള്ള മൊത്ത വരുമാനം കഴിഞ്ഞ സാമ്പത്തിക വർഷത്തെ 15,770.22 കോടി രൂപയിൽ നിന്ന് 28.71 ശതമാനം വർധിച്ച് 20,298.27 കോടി രൂപയായി. കമ്പനി മൊത്തം 1,829.59 കോടി രൂപയുടെ ലാഭവിഹിതം പ്രഖ്യാപിച്ചിട്ടുണ്ട്, ഇത് 2022 സാമ്പത്തിക വർഷത്തിലെ നികുതിക്ക് ശേഷമുള്ള ലാഭത്തിന്റെ (PAT) 30.04 ശതമാനമാണ്.
2022 സാമ്പത്തിക വർഷത്തിൽ ഐആർഎഫ്സി 60,683.41 കോടി രൂപ ഇന്ത്യൻ റെയിൽവേയ്ക്ക് വിതരണം ചെയ്തു. കമ്പനിയുടെ മാനേജ്മെന്റിന് കീഴിലുള്ള ആസ്തി (എയുഎം) 4,29,851 കോടി രൂപയാണ്. ഇത് 16.03 ശതമാനം വളർച്ച രേഖപ്പെടുത്തി. അതേസമയം ഐആർഎഫ്സിയുടെ മൂലധന പര്യാപ്തത അനുപാതം 439.73 ശതമാനമായി തുടരുന്നതായി ബാനർജി അറിയിച്ചു.
