അഹമ്മദാബാദ്: ഇന്ത്യയെ ലോകത്തിന്റെ ഇലക്ട്രോണിക്സ് നിർമ്മാണ ഹബ്ബാക്കി മാറ്റാനുള്ള ‘മെയ്ക്ക് ഇൻ ഇന്ത്യ’ പദ്ധതികൾ ലക്ഷ്യസ്ഥാനത്തേക്ക് അടുക്കുന്നതായി കേന്ദ്ര മന്ത്രി അശ്വിനി വൈഷ്ണവ്. ഉൽപ്പാദനവുമായി ബന്ധപ്പെട്ട പ്രോത്സാഹനങ്ങളിലൂടെയും നൂതന നയങ്ങളിലൂടെയും രാജ്യം കൈവരിച്ച കുതിച്ചുചാട്ടത്തിന്റെ വിശദാംശങ്ങൾ അദ്ദേഹം എക്സിലൂടെ (X) പങ്കുവെച്ചു.
വെറുമൊരു അസംബ്ലി യൂണിറ്റ് എന്ന നിലയിൽ നിന്ന് മാറി, ഇലക്ട്രോണിക്സ് ഘടകങ്ങൾ സ്വന്തമായി നിർമ്മിക്കുന്ന ശക്തമായ ഒരു ആവാസവ്യവസ്ഥയിലേക്ക് ഇന്ത്യ വളർന്നതായും അദ്ദേഹം ചൂണ്ടിക്കാട്ടി.
നിക്ഷേപത്തിലും തൊഴിലിലും വൻ കുതിപ്പ് ഇലക്ട്രോണിക്സ് കമ്പോണന്റ് മാനുഫാക്ചറിംഗ് സ്കീം വഴി ഇതുവരെ 1.15 ലക്ഷം കോടി രൂപയുടെ നിക്ഷേപ വാഗ്ദാനങ്ങളാണ് ലഭിച്ചിരിക്കുന്നത്. ആകെ 249 അപേക്ഷകൾ ലഭിച്ച ഈ പദ്ധതിയിലൂടെ 10.34 ലക്ഷം കോടി രൂപയുടെ ഉൽപ്പാദനമാണ് രാജ്യം പ്രതീക്ഷിക്കുന്നത്. ഇത് ഇന്ത്യയുടെ ഇലക്ട്രോണിക്സ് മേഖലയിലെ എക്കാലത്തെയും ഉയർന്ന നിക്ഷേപ പ്രതിബദ്ധതയാണ്.
കൂടാതെ, 1.42 ലക്ഷം പുതിയ തൊഴിലവസരങ്ങൾ ഇതിലൂടെ സൃഷ്ടിക്കപ്പെടും. കഴിഞ്ഞ ദശകത്തിൽ മാത്രം ഇലക്ട്രോണിക്സ് മേഖലയിൽ 25 ലക്ഷം തൊഴിലവസരങ്ങൾ സൃഷ്ടിക്കപ്പെട്ടതായും മന്ത്രി കൂട്ടിച്ചേർത്തു.
സെമികണ്ടക്ടർ മേഖലയിൽ സ്വയംപര്യാപ്തത ചിപ്പ് നിർമ്മാണ രംഗത്തും ഇന്ത്യ നിർണ്ണായക ചുവടുവെപ്പുകൾ നടത്തിക്കഴിഞ്ഞു. ഇതുവരെ 10 സെമികണ്ടക്ടർ യൂണിറ്റുകൾക്ക് സർക്കാർ അംഗീകാരം നൽകി. ഇതിൽ മൂന്നെണ്ണം ഇതിനകം തന്നെ പ്രാരംഭ ഉൽപ്പാദന ഘട്ടത്തിലാണ്.
ഈ യൂണിറ്റുകൾ പൂർണ്ണമായും പ്രവർത്തനക്ഷമമാകുന്നതോടെ ആഭ്യന്തര മൊബൈൽ ഫോൺ, ഇലക്ട്രോണിക്സ് നിർമ്മാതാക്കൾക്ക് ആവശ്യമായ ചിപ്പുകൾ ഇന്ത്യയിൽ തന്നെ ലഭ്യമാകും. ഇത് വിദേശ രാജ്യങ്ങളിൽ നിന്നുള്ള ഇറക്കുമതി കുറയ്ക്കാൻ സഹായിക്കും.
ആഗോള മൂല്യശൃംഖലയിൽ ഇന്ത്യയുടെ സ്ഥാനം ഉറപ്പിക്കുന്ന ഈ മാറ്റം ‘മെയ്ക്ക് ഇൻ ഇന്ത്യ’ പദ്ധതിയുടെ വൻ വിജയമാണെന്നും താഴെത്തട്ടിലുള്ള യഥാർത്ഥ സാമ്പത്തിക വളർച്ചയാണിതെന്നും അശ്വിനി വൈഷ്ണവ് വ്യക്തമാക്കി.
