പേഴ്സണൽ കമ്പ്യൂട്ടർ നിർമ്മാതാക്കളായ എച്ച്.പി (HP Inc.), ആർട്ടിഫിഷ്യൽ ഇന്റലിജൻസ് അധിഷ്ഠിത സാങ്കേതികവിദ്യയിലേക്ക് (AI) ശ്രദ്ധ കേന്ദ്രീകരിക്കുന്നതിന്റെ ഭാഗമായി, ആഗോളതലത്തിൽ 4,000 മുതൽ 6,000 വരെ ജീവനക്കാരെ പിരിച്ചുവിടാൻ പദ്ധതിയിടുന്നതായി പ്രഖ്യാപിച്ചു. കമ്പനിയുടെ ലാഭത്തെക്കുറിച്ചുള്ള വിലയിരുത്തലുകൾ പ്രതീക്ഷിച്ചതിലും കുറവായ സാഹചര്യത്തിൽ, 2028 സാമ്പത്തിക വർഷത്തോടെയാണ് ഈ പുനഃസംഘടന നടപടികൾ പൂർത്തിയാക്കുക.
കമ്പനിയുടെ പ്രവർത്തനങ്ങൾ കാര്യക്ഷമമാക്കാനും ഉത്പാദനക്ഷമത വർദ്ധിപ്പിക്കാനും ലക്ഷ്യമിട്ടാണ് എച്ച്.പി ഈ സുപ്രധാന നീക്കം നടത്തുന്നത്. ഉൽപ്പന്നങ്ങളുടെ വികസനം വേഗത്തിലാക്കാനും ഉപഭോക്തൃ സംതൃപ്തി മെച്ചപ്പെടുത്താനും ലക്ഷ്യമിട്ട് കമ്പനിയുടെ വിവിധ പ്രവർത്തനങ്ങളില്‍ എഐ സാങ്കേതികവിദ്യ സംയോജിപ്പിക്കാനാണ് എച്ച്.പി ശ്രമിക്കുന്നത്. ഈ പുനഃസംഘടനയിലൂടെ മൂന്ന് വർഷത്തിനുള്ളിൽ ഏകദേശം 100 കോടി ഡോളർ ($1 billion) ലാഭിക്കാൻ കഴിയുമെന്ന് കമ്പനി പ്രതീക്ഷിക്കുന്നു.
പ്രധാനമായും പ്രൊഡക്ട് ഡെവലപ്പ്മെന്റ്, ആഭ്യന്തര പ്രവർത്തനങ്ങൾ, കസ്റ്റമർ സപ്പോർട്ട് തുടങ്ങിയ വിഭാഗങ്ങളിലെ ജീവനക്കാരെയാണ് പിരിച്ചുവിടൽ ബാധിക്കുക. അതേസമയം, എഐ ചിപ്പുകൾ ഘടിപ്പിച്ച എഐ-എനേബിൾഡ് പിസികൾക്ക് (AI-enabled PCs) വിപണിയിൽ ആവശ്യക്കാർ ഏറിവരുന്നതായി എച്ച്പി റിപ്പോർട്ട് ചെയ്യുന്നു. കമ്പനിയുടെ കഴിഞ്ഞ സാമ്പത്തിക പാദത്തിലെ മൊത്തം ഷിപ്പ്‌മെന്റുകളുടെ 30 ശതമാനത്തിലധികം ഇത്തരം എഐ പിസികളായിരുന്നു.
മെമ്മറി ചിപ്പുകളുടെ വില വർദ്ധനവ് പോലുള്ള വെല്ലുവിളികൾ കമ്പനി നേരിടുന്നതിനാൽ ചെലവ് ചുരുക്കൽ നടപടികൾ അനിവാര്യമാണെന്ന് എച്ച്പി സിഇഒ എൻറിക് ലോറസ് വ്യക്തമാക്കി. സാമ്പത്തിക മാന്ദ്യത്തിനിടയിൽ ടെക് വ്യവസായം നിര്‍മ്മിത ബുദ്ധിയിലേക്ക് ശ്രദ്ധ മാറുന്നതിന്റെ പ്രതിഫലനമാണ് എച്ച്.പി യുടെ ഈ തീരുമാനത്തിലൂടെ വ്യക്തമാകുന്നത്.
