ഡൽഹി: രാജ്യത്തെ ഏറ്റവും വലിയ സ്വകാര്യ വായ്പാ ദാതാക്കളായ എച്ച്ഡിഎഫ്സി ബാങ്ക്, 2022 ജൂൺ 30ന് അവസാനിച്ച പാദത്തിൽ 19 ശതമാനം വർദ്ധനവോടെ 9,195.99 കോടി രൂപയുടെ അറ്റാദായം നേടി. 2021 ഇതേ പാദത്തിൽ കമ്പനിയുടെ അറ്റാദായം 7,729.64 കോടി രൂപയായിരുന്നു. വായ്പാ ദാതാവിന്റെ പ്രസ്തുത പാദത്തിലെ വരുമാനം 2021 ജൂണിലെ 36,771.47 കോടിയിൽ നിന്ന് 13 ശതമാനം വർധിച്ച് 41,560.27 കോടി രൂപയായി. കൂടാതെ ബാങ്കിന്റെ അറ്റ പലിശ വരുമാനം (എൻഐഐ) കഴിഞ്ഞ വർഷം ഇതേ പാദത്തിലെ 17,009 കോടി രൂപയിൽ നിന്ന് 14.5 ശതമാനം ഉയർന്ന് 19,481.4 കോടി രൂപയായി. മൊത്തം ആസ്തിയുടെ 4 ശതമാനമായിരുന്നു പ്രധാന പലിശ മാർജിൻ. അതുപോലെ, പലിശ ഇതര വരുമാനം 9,011.6 കോടി രൂപയായി വളർന്നു. 2022 ജൂൺ പാദത്തിലെ പ്രീ-പ്രൊവിഷൻ പ്രവർത്തന ലാഭം (പിപിഒപി) 15,367.8 കോടി രൂപയാണ്.
എച്ച്ഡിഎഫ്സി ബാങ്ക് കഴിഞ്ഞ പാദത്തിൽ 3,187.7 കോടി രൂപയുടെ നിക്ഷേപം നടത്തി, ഇത് മുൻ വർഷത്തെ 4,830.8 കോടി രൂപയിൽ നിന്ന് 34 ശതമാനം കുറഞ്ഞു. കൂടാതെ മൊത്ത പ്രവർത്തനരഹിത ആസ്തി (ജിഎൻപിഎ) 1.28 ശതമാനമായി കുറഞ്ഞപ്പോൾ, അറ്റ നിഷ്ക്രിയ ആസ്തി (എൻഎൻപിഎ) 0.35 ശതമാനമായി കുറഞ്ഞു. പ്രസ്തുത പാദത്തിൽ 36 ശാഖകൾ കൂട്ടിച്ചേർത്തതായി എച്ച്ഡിഎഫ്സി ബാങ്ക് പ്രസ്താവനയിൽ പറഞ്ഞു. വെള്ളിയാഴ്ച ഫലത്തിന് മുന്നോടിയായി, എച്ച്ഡിഎഫ്സി ബാങ്കിന്റെ ഓഹരികൾ എൻഎസ്ഇയിൽ 0.96 ശതമാനം ഉയർന്ന് 1,364.00 രൂപയിലാണ് വ്യാപാരം അവസാനിപ്പിച്ചത്.
