സ്റ്റേറ്റ് ബാങ്ക് ഓഫ് ഇന്ത്യ ഭവന വായ്പകൾക്കായി ഉത്സവ സീസണിൽ അവതരിപ്പിച്ച ഫെസ്റ്റിവ് ഓഫർ രണ്ട് മാസത്തിനുള്ളിൽ അവസാനിക്കും. ഒക്ടോബർ 4 ന് ആരംഭിച്ച ഉത്സവ ഓഫർ 2023 ജനുവരി 31 നാണ് അവസാനിക്കുക.
ഈ ഓഫറിന് കീഴിൽ, എസ്ബിഐ 15 ബേസിസ് പോയിന്റ് മുതൽ 30 ബേസിസ് പോയിന്റ് വരെയുള്ള ഇളവുകൾ നൽകുന്നു. ഭവന വായ്പയുടെ പലിശ നിരക്ക് 8.40% ആണ്. സാധാരണ ഭവനവായ്പകൾക്കും ടോപ്പ്-അപ്പ് വായ്പകൾക്കുമുള്ള പ്രോസസ്സിംഗ് ഫീസും ബാങ്ക് ഒഴിവാക്കിയിട്ടുണ്ട്.
എസ്ബിഐയുടെ ഭവനവായ്പ നിരക്കുകൾ സിബിൽ സ്കോർ അനുസരിച്ച് വ്യക്തികൾക്ക് വ്യത്യാസപ്പെടുന്നു എന്നത് ശ്രദ്ധിക്കേണ്ടതാണ്. നിങ്ങളുടെ ക്രെഡിറ്റ് സ്കോർ മെച്ചപ്പെടുന്തോറും ഭവനവായ്പകളുടെ പലിശനിരക്കും കുറയും.
സാധാരണ ഭവന വായ്പകൾക്കുള്ള ഇളവുകൾ
എസ്ബിഐയുടെ വെബ്സൈറ്റ് പറയുന്നതനുസരിച്ച്, പൊതുനിരക്കായ 8.55% നെ അപേക്ഷിച്ച് ഉത്സവ ഓഫറിന് കീഴിൽ ക്രെഡിറ്റ് സ്കോർ 800 വരെയോ കൂടുതലോ അല്ലെങ്കിൽ തുല്യമോ ആയ വായ്പക്കാർക്ക് 8.55% പലിശ നിരക്കിൽ നിന്ന് 15 ബേസിസ് പോയിന്റുകളുടെ ഇളവോടെ 8.40% ആയിരിക്കും വായ്പ നിരക്ക്.
750 നും 799 നും ഇടയിൽ ക്രെഡിറ്റ് സ്കോറുള്ളവർക്ക് ബാങ്ക് 25 ബേസിസ് പോയിന്റ് ഇളവ് നൽകുമ്പോൾ, പലിശ നിരക്ക് 8.65% ത്തിൽ നിന്ന് 8.40% ആയി കുറയും. 700 നും 749 നും ഇടയിലുള്ള സിബിൽ സ്കോറിന് 20 ബേസിസ് പോയിന്റ് ഇളവ് നൽകുന്നു. ഭവനവായ്പകളുടെ പലിശ നിരക്ക് 8.75% ൽ നിന്ന് 8.55% ആയി കുറയുന്നു.
ബെഞ്ച്മാർക്ക് അടിസ്ഥാനമാക്കിയുള്ള വായ്പാ നിരക്ക് 15 ബേസിസ് പോയിന്റ് കുറവാണ്, അതായത് 8.40 ശതമാനം. ശരിയായ ഇബിആർ 8.55 ശതമാനമാണ്. ക്രെഡിറ്റ് സ്കോർ 700ൽ താഴെയുള്ള വായ്പക്കാർക്ക് ഭവനവായ്പയുടെ പലിശ നിരക്കിൽ മാറ്റമുണ്ടാകില്ല.
650 – 699 വരെയുള്ള സിബിൽ സ്കോറുകൾക്ക് 8.85 ശതമാനവും, 550 – 649 ക്രെഡിറ്റ് സ്കോറുകളിൽ 9.05 ശതമാനവും, അതിൽ താഴെയുള്ള സ്കോറുകൾക്കും സ്കോർ ഇല്ലാത്തവർക്കും 8.75% എന്നിങ്ങനെയാണ് നിരക്ക് തുടരുന്നത്.
വനിതകളായ വായ്പക്കാർക്ക് ലഭ്യമായ 5 ബിപിഎസ് ഇളവും സാലറി അക്കൗണ്ട് ഉടമകൾക്ക് പ്രിവിലേജ്, ശൗര്യ, അപോൺ ഘർ എന്നിവയ്ക്കായി ലഭ്യമായ 5 ബിപിഎസ് ഇളവും ഉൾപ്പെടുന്നതാണ് ഇളവ് നിരക്കുകളെന്ന് എസ്ബിഐ അറിയിച്ചു.
ടോപ്പ്-അപ്പ് ഹോം ലോണുകൾക്കുള്ള ഇളവുകൾ
700 മുതൽ 800ന് മുകളിലുള്ള ക്രെഡിറ്റ് സ്കോറുകൾക്ക് എസ്ബിഐ 15 ബേസിസ് പോയിന്റുകളുടെ ഇളവ് നൽകുന്നു. ക്രെഡിറ്റ് സ്കോർ 800-ന് കൂടുതലോ അതിന് തുല്യമോ ആണെങ്കിൽ, എസ്ബിഐയുടെ സാധാരണ നിരക്കായ 8.95 ശതമാനത്തിൽ നിന്ന് 8.80% ആയി കുറയും.
അതേസമയം 750 – 799 സിബിൽ സ്കോറുള്ളവർക്ക് 9.05% ത്തിൽ നിന്ന് 8.90% ആയി നിരക്ക് കുറയും. 700-749 ഇടയിൽ സിബിൽ സ്കോർ ഉള്ളവർക്ക് 9.15 ശതമാനമായിരുന്ന നിരക്ക് 9% ആയി കുറഞ്ഞു കിട്ടും.
650 – 699 എന്ന സിബിൽ സ്കോറിൽ 9.25 ശതമാനും, 550 – 649 സ്കോറുകളിൽ 9.55 ശതമാനവും, സിബിൽ സ്കോർ അതിലും കുറഞ്ഞാലും തീരെ ഇല്ലെങ്കിലും 9.15 ശതമാനം എന്ന നിരക്കിൽ മാറ്റമുണ്ടാവില്ല.
വസ്തുവിന്മേലുള്ള വായ്പകൾക്ക്
ചില ക്രെഡിറ്റ് സ്കോറുകളിൽ പ്രോപ്പർട്ടിക്ക് മേലുള്ള ഭവനവായ്പയിൽ 30 ബേസിസ് പോയിന്റുകളാണ് ബാങ്കിന്റെ ഏറ്റവും ഉയർന്ന ഇളവ്. 800-ന് കൂടുതലോ അതിന് തുല്യമോ ആയ ക്രെഡിറ്റ് സ്കോർ ഉള്ള വായ്പക്കാർക്ക് സാധാരണ നിരക്കായ 10.30% ത്തിൽ നിന്ന് 10% പലിശ നിരക്ക് നൽകും.
750-799 സ്കോറുകളിൽ നിരക്ക് 10.10 ശതമാനവും, 700-749 സ്കോറുകൾക്ക് 10.20 ശതമാനവും ആണ് വായ്പ നിരക്കുകൾ. മറ്റ് നിരക്കുകൾ മാറ്റമില്ല. 650-699 സ്കോറുകൾക്ക് 10.60% നിരക്കും 550-649 സ്കോറുകളിൽ 10.70% നിരക്കും സിബിൽ സ്കോർ ഇല്ലാത്തവർക്ക് 10.50 ശതമാനം നിരക്കും ബാങ്ക് ഈടാക്കുന്നത് തുടരും.
കൂടാതെ, ഈ ക്യാമ്പയിൻ കാലയളവിൽ മറ്റ് ഇളവുകളൊന്നും ബാധകമല്ലെന്ന് എസ്ബിഐ അറിയിച്ചു.
പ്രോസസ്സിംഗ് ഫീസിന്റെ കാര്യമെടുത്താൽ, റെഗുലർ, ടോപ്പ്-അപ്പ് ഹോം ലോണുകളിൽ ഉത്സവകാല ക്യമ്പയിനിനിടെ എസ്ബിഐ ചാർജുകൾഒന്നും ഈടാക്കുന്നില്ല.
എന്നിരുന്നാലും, വസ്തുവിന്മേലുള്ള ഭവനവായ്പകൾക്ക് എസ്ബിഐ 10,000 രൂപയുടെ ഫ്ലാറ്റ് പ്രോസസ്സിംഗ് ഫീസും ബാധകമായ ജിഎസ്ടിയും ചുമത്തും.
