മുംബൈ: ബെംഗളൂരുവിലെ ഹൈടെക് ഡിഫൻസ് & എയ്‌റോസ്‌പേസ് പാർക്ക് ഫേസ്-2-ൽ കമ്പനിയുടെ ആദ്യ ലിഥിയം അയൺ സെൽ നിർമ്മാണ കേന്ദ്രം സ്ഥാപിക്കാനുള്ള നീക്കം ആരംഭിച്ച് എക്സൈഡ് ഇൻഡസ്ട്രീസ്. ഇന്ത്യയിലെ ആദ്യത്തെ മൾട്ടി-ഗിഗാവാട്ട് ലിഥിയം-അയൺ സെൽ നിർമ്മാണ കേന്ദ്രമാണിത്.
എക്‌സൈഡിന്റെ നിർദിഷ്ട ജിഗാഫാക്‌ടറി 80 ഏക്കർ സ്ഥലത്ത് വ്യാപിച്ചുകിടക്കും. ഇവിടെ വിവിധ ഇവി, വ്യാവസായിക സെഗ്‌മെന്റ് ആവശ്യങ്ങൾക്ക് അനുയോജ്യമായ ലിഥിയം-അയൺ ബാറ്ററികൾ നിർമ്മിക്കും. കൂടാതെ ലിഥിയം-അയൺ ബാറ്ററികളും ബാറ്ററി സംവിധാനങ്ങളും നിർമ്മിക്കുകയും വികസിപ്പിക്കുകയും ചെയ്യുന്ന ആഗോള സാങ്കേതിക കമ്പനിയായ എസ്‌വിഒഎൽടി എനർജി ടെക്‌നോളജിസുമായി (SVOLT) എക്സൈഡ് ഒന്നിലധികം വർഷത്തെ സാങ്കേതിക സഹകരണ കരാറിൽ ഏർപ്പെട്ടിട്ടുണ്ട്.
സഹകരണത്തിന് കീഴിൽ സാങ്കേതികവിദ്യയ്ക്ക് പുറമേ, ടേൺകീ അടിസ്ഥാനത്തിൽ പ്ലാന്റ് സ്ഥാപിക്കുന്നതിനുള്ള പിന്തുണ എസ്‌വിഒഎൽടി നൽകും. സൗകര്യത്തിന്റെ ആദ്യ ഘട്ടം 2024 അവസാനത്തോടെ പ്രവർത്തനക്ഷമമാകുമെന്ന് കമ്പനി അറിയിച്ചു. ഇതിന് പുറമെ ഇന്ത്യൻ വിപണിയിൽ പുതിയ ഉൽപ്പന്ന വികസനത്തിന് പിന്തുണ നൽകുന്നതിനായി എക്സൈഡ് ഒരു ഗവേഷണ-വികസന ലാബ് സ്ഥാപിക്കും.
എക്സൈഡ് ഇൻഡസ്ട്രീസ്, 2.5Ah മുതൽ 20,200 Ah വരെയുള്ള ലോകത്തിലെ ഏറ്റവും വിശാലമായ ലെഡ് ആസിഡ് സ്റ്റോറേജ് ബാറ്ററികൾ നിർമ്മിക്കുകയും വിപണനം ചെയ്യുകയും ചെയ്യുന്നു. ഓട്ടോമോട്ടീവ്, പവർ, ടെലികോം, ഇൻഫ്രാസ്ട്രക്ചർ പ്രോജക്ടുകൾ, കമ്പ്യൂട്ടർ വ്യവസായങ്ങൾ, റെയിൽവേ, ഖനനം, പ്രതിരോധ മേഖലകൾ എന്നിവയ്ക്കായാണ് കമ്പനി ബാറ്ററികൾ നിർമ്മിക്കുന്നത്.
