എംപ്ലോയീസ് പ്രൊവിഡൻ്റ് ഫണ്ട് ഓർഗനൈസേഷൻ വരിക്കാർക്ക് അവരുടെ യൂണിവേഴ്സൽ അക്കൗണ്ട് നമ്പർ (യുഎഎൻ) സജീവമാക്കുന്നതിനും അവരുടെ ആധാർ അവരുടെ ബാങ്ക് അക്കൗണ്ടുമായി ബന്ധിപ്പിക്കുന്നതിനുമുള്ള സമയപരിധി വീണ്ടും നീട്ടിയിരിക്കുന്നു.
2025 ജൂൺ 30 ആണ് പുതിയ സമയപരിധി. എംപ്ലോയ്‌മെൻ്റ് ലിങ്ക്ഡ് ഇൻസെൻ്റീവ് (ഇഎൽഐ) സ്കീമിന് കീഴിൽ ആനുകൂല്യങ്ങൾ ക്ലെയിം ചെയ്യുന്നതിനുള്ള നടപടിക്രമങ്ങൾ പൂർത്തിയാക്കാൻ ജീവനക്കാർക്ക് കൂടുതൽ സമയം അനുവദിച്ചിട്ടുമുണ്ട്.
2024 ജൂലൈയിൽ ധനമന്ത്രി നിർമ്മല സീതാരാമൻ കേന്ദ്ര ബജറ്റിൽ പ്രഖ്യാപിച്ച ഇഎൽഐ പദ്ധതി ജീവനക്കാർക്ക് സാമ്പത്തിക സഹായം നൽകാനും തൊഴിലവസരങ്ങൾ സൃഷ്ടിക്കാനും ലക്ഷ്യമിട്ടുകൊണ്ടുള്ളതാണ്. ഇപിഎഫ്ഒ പുറത്തിറക്കിയ സർക്കുലറിൽ, എല്ലാ പുതിയ വരിക്കാരും, പ്രത്യേകിച്ച് നടപ്പ് സാമ്പത്തിക വർഷത്തിൽ ചേർന്നവർ, യുഎഎൻ ആക്ടിവേഷനും ആധാർ ലിങ്കിങ്ങും ഉടനടി പൂർത്തിയാക്കുന്നുവെന്ന് ഉറപ്പാക്കാൻ ഇത് തൊഴിലുടമകളോട് അഭ്യർത്ഥിച്ചിട്ടുണ്ട്.
യുഎഎൻ ആധാർ കാർഡുമായി ബന്ധിപ്പിക്കുന്നതിൻ്റെ പ്രയോജനങ്ങൾ നിരവധിയാണ്. ഇപിഎഫ്ഒ അംഗങ്ങൾക്ക് ആധാറുമായി ലിങ്ക് ചെയ്‌ത ഒരു സജീവമാക്കിയ യുഎഎൻ ഒരു പോർട്ടലിലൂടെ നിരവധി ഇപിഎഫ്ഒ സേവനങ്ങളിലേക്ക് പ്രവേശനം ലഭിക്കും. പിഎഫ് പാസ്ബുക്കുകൾ പരിശോധിക്കുക, ഡൗൺലോഡ് ചെയ്യുക, പിഎഫ് പിൻവലിക്കുക തുടങ്ങിയുള്ള കാര്യങ്ങളുടെ നടപടി ക്രമങ്ങൾ ട്രാക്ക് ചെയ്യാൻ സാധിക്കും.
യുഎഎൻ-ആധാർ ഓഫ്‌ലൈനായി ലിങ്ക് ചെയ്യും വിധം
എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ) ശാഖകളോ, കോമൺ സർവീസ് സെന്ററുകളിലോ (സിഎസ്‌സി) സന്ദർശിച്ചും നിങ്ങളുടെ ഇപിഎഫ് അക്കൗണ്ടുമായി ആധാർ ഓഫ്‌ലൈനായി ആധാർ ലിങ്ക് ചെയ്യാവുന്നതാണ്.
ഇതിനായി യുഎഎൻ ആധാറുമായി ബന്ധിപ്പിക്കുന്നതിനുള്ള അപേക്ഷ പൂരിപ്പിച്ച്, നിങ്ങളുടെ ആധാർ കാർഡിന്റെ സ്വയം സാക്ഷ്യപ്പെടുത്തിയ പകർപ്പ് സഹിതം നേരിട്ട് സമർപ്പിക്കേണ്ടതുണ്ട്.
