ന്യൂഡൽഹി: നടപ്പ് സാമ്പത്തിക വർഷത്തിലെ ഏപ്രിൽ മുതൽ നവംബർ വരെയുള്ള കാലയളവിൽ എഞ്ചിനീയറിംഗ് ഉൽപ്പന്നങ്ങളുടെ കയറ്റുമതി 1.81 ശതമാനം ഇടിഞ്ഞ് 69.46 ബില്യൺ ഡോളറിലെത്തി. മുൻ കാലത്തെ സമാന കാലയളവിലെ 70.74 ബില്യൺ ഡോളറിൽ നിന്ന് ഇത് 1.81 ശതമാനം ഇടിവാണ് രേഖപ്പെടുത്തിയിരിക്കുന്നത്.
2023-24 സാമ്പത്തിക വർഷത്തിലെ ആദ്യ എട്ട് മാസങ്ങളിൽ (ഏപ്രിൽ-നവംബർ) പശ്ചിമേഷ്യയിലേക്കും വടക്കേ ആഫ്രിക്കയിലേക്കും (WANA), വടക്ക് കിഴക്കൻ ഏഷ്യയിലേക്കും സിഐഎസ് രാജ്യങ്ങളിലേക്കും എഞ്ചിനീയറിംഗ് ഉൽപ്പന്നങ്ങളുടെ കയറ്റുമതി വാർഷികാടിസ്ഥാനത്തിൽ നല്ല വളർച്ച രേഖപ്പെടുത്തി.
വടക്കേ അമേരിക്ക, യൂറോപ്യൻ യൂണിയൻ, ആസിയാൻ, ദക്ഷിണേഷ്യ തുടങ്ങിയ പ്രധാന പ്രദേശങ്ങളിലേക്കുള്ള കയറ്റുമതിയിൽ ഈ കാലയളവിൽ ഇടിവ് രേഖപ്പെടുത്തി.
2023-24 ഏപ്രിൽ-നവംബർ കാലയളവിൽ ഇരുമ്പ്, ഉരുക്ക് എന്നിവ ഒഴികെയുള്ള എഞ്ചിനീയറിംഗ് കയറ്റുമതിയിൽ 0.79 ശതമാനം വാർഷിക വളർച്ച രേഖപ്പെടുത്തിയതായി EEPC പ്രസ്താവനയിൽ പറഞ്ഞു.
ഇന്ത്യയിൽ നിന്നുള്ള എഞ്ചിനീയറിംഗ് കയറ്റുമതി 2022 നവംബറിലെ 8.10 ബില്യൺ ഡോളറിൽ നിന്ന് 2023 നവംബറിൽ 3.10 ശതമാനം കുറഞ്ഞ് 7.85 ബില്യൺ ഡോളറായി.
ഇന്ത്യയുടെ മൊത്തം ചരക്ക് കയറ്റുമതിയിൽ എഞ്ചിനീയറിംഗ് കയറ്റുമതിയുടെ പങ്ക് മുൻ മാസത്തെ 24.11 ശതമാനത്തിൽ നിന്ന്, 2023 നവംബറിൽ 23.17 ശതമാനമായി രേഖപ്പെടുത്തിയതായി ഇഇപിസി പറഞ്ഞു.
മികച്ച കയറ്റുമതി ലക്ഷ്യസ്ഥാനങ്ങളിൽ, സൗദി അറേബ്യ, റഷ്യ, ദക്ഷിണ കൊറിയ, മെക്സിക്കോ, സിംഗപ്പൂർ, യുഎഇ, ബ്രസീൽ എന്നിവിടങ്ങളിലേക്കുള്ള കയറ്റുമതി 2023 നവംബറിൽ വാർഷികാടിസ്ഥാനത്തിൽ വളർച്ച കൈവരിച്ചു,
അതേസമയം യുഎസ്എ, യുകെ, ജർമ്മനി, ഇറ്റലി, ചൈന എന്നിവിടങ്ങളിലേക്കുള്ള കയറ്റുമതി നെഗറ്റീവ് വളർച്ചയാണ് കാണിച്ചതെന്ന് വ്യാപാര സംഘടന പറഞ്ഞു.
ഓസ്‌ട്രേലിയയുമായി എഫ്‌ടിഎ ഒപ്പുവച്ചതിന് ശേഷം, ഈ വർഷം നവംബറിൽ രാജ്യത്തേക്കുള്ള എഞ്ചിനീയറിംഗ് കയറ്റുമതി ആദ്യമായി കുറഞ്ഞു എന്നത് ശ്രദ്ധേയമാണ്.
