തിരുവനന്തപുരം ടെക്നോസിറ്റിയിൽ സ്ഥാപിക്കുന്ന എമേർജിങ് ടെക്നോളജി ഹബ് ലക്ഷ്യമിടുന്നത് 1000 ത്തിലധികം സ്റ്റാർട്ടപ്പുകൾക്ക് പിന്തുണ നൽകാൻ. 350 കോടി രൂപ ചിലവിൽ സംസ്ഥാന സർക്കാർ ആരംഭിക്കുന്ന എമേർജിങ്ങ് ടെക്നോളജി ഹബ്ബിൻ്റെ നിർമ്മാണപ്രവർത്തനങ്ങൾക്ക് തുടക്കം കുറിച്ചു.
കൃഷി/ഭക്ഷ്യ സംസ്കരണം, സ്പേസ്/പ്രതിരോധ മേഖലകള്, ആരോഗ്യമേഖല, ലൈഫ് സയന്സ്, ഡിജിറ്റല് മീഡിയ/ പുത്തന് വിനോദോപാധികള്, പാരമ്പര്യേതര ഊര്ജ്ജ സ്രോതസ്സുകള് എന്നീ രംഗങ്ങളില് നിര്മ്മിതബുദ്ധി ഉള്പ്പെടെയുള്ള നവീന സാങ്കേതികവിദ്യയുടെ സാധ്യതകള് പ്രയോജനപ്പെടുത്താൻ പദ്ധതി ലക്ഷ്യമിടുന്നതായി സംസ്ഥാന വ്യവസായ വകുപ്പ് മന്ത്രി പി. രാജീവ് വ്യക്തമാക്കി.
ഒപ്പം ഈ മേഖലയില് പ്രവര്ത്തിക്കുന്ന സ്റ്റാര്ട്ടപ്പുകള്ക്കുവേണ്ടി ഒരു ഡീപ് ടെക് എക്കോസിസ്റ്റം രൂപപ്പെടുത്താന് സര്ക്കാര് നടപടി സ്വീകരിക്കും. നിര്മ്മിത ബുദ്ധി, മെഷീന് ലേര്ണിംഗ്, അനിമേഷന്, വിഷ്വല് എഫക്ട്, ഗെയ്മിംഗ്, കോമിക്സ് എന്നീ മേഖലകളില് കടന്നുവരുന്ന ഡീപ് ടെക് സംരംഭകര്ക്ക് വേണ്ടി ഒരു ഗ്രാഫിക് പ്രോസസിംഗ് യൂണിറ്റ് ക്ലസ്റ്റര് സ്ഥാപിക്കാനും സര്ക്കാര് ലക്ഷ്യമിടുന്നുണ്ട്.
