കൊച്ചി: ഓണ സദ്യയ്ക്ക് രുചിയുടെ പുതിയ വൈവിധ്യമൊരുക്കാൻ ഈസ്റ്റേൺ പുതിയ ഉത്പ്പന്നമായ ‘തനി നാടൻ സാമ്പാർ’ വിപണിയിലെത്തിച്ചു. നാടിന്റെ പല കോണുകളിലെയും രുചി വൈവിധ്യം പരിഗണിച്ചാണ് ഈസ്റ്റേൺ പുതിയ ഉത്പ്പന്നം അവതരിപ്പിക്കുന്നത്. ഇതോടെ ഈസ്റ്റേൺ സാമ്പാർ പൊടിക്കൊപ്പം കായത്തിന്റെ രുചി മുന്നിട്ട് നിൽക്കുന്ന തനി നാടൻ സാമ്പാറും ഇനി ലഭ്യമാകും. ”ഓരോ വീട്ടിലും സാമ്പാർ ഒരുങ്ങുന്നത് ഓരോ തരം രുചിയിലാണെന്നും ഈ വൈവിധ്യങ്ങളെയും ഇഷ്ടങ്ങളെയും അംഗീകരിച്ചുകൊണ്ടാണ് ഈസ്റ്റേൺ പുതിയ ഉത്പന്നം പുറത്തിറക്കിയതെന്നും ഇന്നൊവേഷൻ മേധാവി ശിവപ്രിയ ബാലഗോപാൽ പറഞ്ഞു.
പുതിയ ഉത്പന്നങ്ങൾ വിപണിയിൽ അവതരിപ്പിക്കുന്നതിന്റെ ഭാഗമായി ഈസ്റ്റേൺ രുചി വൈവിധ്യങ്ങളെ ആഘോഷിക്കുന്ന ഒരു ക്യാംപെയ്നും തുടക്കമിട്ടു. ഇതിന്റെ ഭാഗമായി ‘സാമ്പാർ പോര്’ എന്ന പേരിൽ ഒരു പരസ്യ ചിത്രവും പുറത്തിറക്കിയിട്ടുണ്ട്. ഒരു കുടുംബത്തിൽ നടക്കുന്ന രസകരമായ ഒരു പാചക മത്സരമാണ് പരസ്യത്തിന്റെ ഇതിവൃത്തം. അമ്മയും മകളും തമ്മിൽ നടക്കുന്ന ഈ സാമ്പാർ പോരാട്ടത്തിൽ, ഒരാൾ പരമ്പരാഗതമായ രുചിക്കൂട്ടിൽ സാമ്പാറുണ്ടാക്കുമ്പോൾ മറ്റൊരാൾ കായത്തിന്റെ രുചി മുന്നിട്ടുനിർത്തുന്നു. ഒടുവിൽ മരുമകൻ ഈസ്റ്റേൺ സാമ്പാർ പൗഡറും തനി നാടൻ സാമ്പാർ പൗഡറും ഉപയോഗിച്ച് രണ്ട് വിഭവങ്ങളും ഒന്നാന്തരമാണെന്ന് പ്രഖ്യാപിക്കുന്നു. കുടുംബബന്ധങ്ങളുടെ ഊഷ്മളതയും നർമ്മവും നിറഞ്ഞ ഈ പരസ്യം, ഓരോ വീടിന്റെയും അടുക്കളയിലെ സന്തോഷങ്ങളെയും ഓർമ്മകളെയും തിരിച്ചുപിടിക്കുന്നു.
കേരളത്തിന്റെ സമ്പന്നമായ പാചക പാരമ്പര്യത്തെ ആഘോഷിക്കാനുള്ള ഞങ്ങളുടെ പ്രതിബദ്ധതയുടെ പ്രതീകമാണ് ഈ ക്യാംപെയ്നെന്ന് ഈസ്റ്റേൺ ബിസിനസ് യൂനിറ്റ് സിഇഒ ഗിരീഷ് നായർ പറഞ്ഞു. സിഎച്ച്ആർഒ റോയ് കുളമാക്കൽ ഈനാസ്, മാർക്കറ്റിംഗ് ജിഎം എമി തോമസ്, എന്നിവരും വാർത്ത സമ്മേളനത്തിൽ പങ്കെടുത്തു.
