മുംബൈ: ഓഹരി വിപണിയിലെ അരങ്ങേറ്റ ദിനത്തിൽ അതിന്റെ സാമ്പത്തിക ഫലങ്ങൾ വെളിപ്പെടുത്തി ഡ്രീംഫോക്സ് സർവീസസ്. 2022 ജൂണിൽ അവസാനിച്ച ആദ്യ പാദത്തിൽ കമ്പനി 13.4 കോടി രൂപയുടെ ഏകീകൃത അറ്റാദായം റിപ്പോർട്ട് ചെയ്തു. കഴിഞ്ഞ വർഷം ഇതേ കാലയളവിൽ കമ്പനിക്ക് 1.4 കോടി രൂപയുടെ നഷ്ടമായിരുന്നു.
അതേസമയം പ്രസ്തുത പാദത്തിലെ ഡ്രീംഫോക്സിന്റെ പ്രവർത്തനങ്ങളിൽ നിന്നുള്ള വരുമാനം മുൻ വർഷത്തെ 24.5 കോടി രൂപയിൽ നിന്ന് 160 കോടി രൂപയായി വർധിച്ചു. സമാനമായി കമ്പനിയുടെ ഇബിഐടിഡിഎ 19 കോടിയായി ഉയർന്നു. എയർപോർട്ട് സർവീസ് അഗ്രിഗേറ്ററായ ഡ്രീംഫോക്സ് സർവീസസിന്റെ ഓഹരികൾ അതിന്റെ ഐപിഒ ഇഷ്യൂ വിലയായ ₹326-നേക്കാൾ 56% പ്രീമിയത്തോടെ വിപണിയിൽ ശക്തമായ അരങ്ങേറ്റം കുറിച്ചു.
ലോഞ്ചുകൾ, ഭക്ഷണ പാനീയങ്ങൾ, സ്പാ, മീറ്റ് ആൻഡ് അസിസ്റ്റ് എയർപോർട്ട് ട്രാൻസ്ഫർ, ട്രാൻസിറ്റ് ഹോട്ടലുകൾ, ബാഗേജ് ട്രാൻസ്ഫർ സേവനങ്ങൾ തുടങ്ങിയ എയർപോർട്ടുമായി ബന്ധപ്പെട്ട സേവനങ്ങളിലേക്ക് കമ്പനി ഉപഭോക്താക്കൾക്ക് പ്രവേശനം നൽകുന്നു. ഇത് ഇന്ത്യയിലെ ഏറ്റവും വലിയ എയർപോർട്ട് സർവീസ് അഗ്രഗേറ്റർ പ്ലാറ്റ്ഫോമാണ്.
