ന്യൂഡല്‍ഹി: എഫ്എംസിജി പ്രമുഖരായ കോള്‍ഗേറ്റ് പാമോലിവ് മൂന്നാം പാദ അറ്റാദായത്തില്‍ കുറവ് രേഖപ്പെടുത്തി. 243.24 കോടി രൂപയാണ് കമ്പനി രേഖപ്പെടുത്തിയ അറ്റാദായം. മുന്‍വര്‍ഷത്തെ അപേക്ഷിച്ച് 3.6 ശതമാനം താഴ്ച.
കഴിഞ്ഞ വര്‍ഷം ഇതേകാലയളവില്‍ 252.33 കോടി രൂപ ആദായം നേടാന്‍ കമ്പനിയ്ക്ക് സാധിച്ചിരുന്നു.വരുമാനം 0.9 ശതമാനം വാര്‍ഷിക വര്‍ധനവില്‍ 1281.21 കോടി രൂപയായിട്ടുണ്ട്. ഉയര്‍ന്ന പണപ്പെരുപ്പമാണ് പ്രകടനം മോശമാക്കിയത്.
അസംസ്‌കൃത വസ്തുക്കളുടെ വിലവര്‍ധനവ് ഉത്പാദന ചെലവ് ഉയര്‍ത്തി. ഇതോടെ ചെലവ് 3 ശതമാനം ഉയര്‍ന്ന് 9.75 ബില്യണ്‍ രൂപയായി. ഉത്പന്നത്തിന്റെ വില ഉയര്‍ത്തിയപ്പോള്‍ ഡിമാന്റ് ഇടിഞ്ഞു.
റഷ്യ-ഉക്രൈന്‍ യുദ്ധം കാരണം വിലവര്‍ധന നേരിട്ട പാം ഓയില്‍, കൊക്കോ,ക്രൂഡ് ഓയില്‍ എന്നിവയാണ് ടൂത്ത് പേസ്റ്റ് നിര്‍മ്മാതാക്കളായ കമ്പനിയുടെ പ്രധാന അസംസ്‌കൃത വസ്തുക്കള്‍. റഫിനിറ്റീവിന്റെ ഐബിഇഎസ് ഡാറ്റ പ്രകാരം 2.66 ബില്യണ്‍ രൂപ അറ്റാദായമാണ് പ്രതീക്ഷിക്കപ്പെട്ടിരുന്നത്. യു.എസ് ഉപഭോക്തൃ ഉത്പന്ന ഭീമന്റെ ഇന്ത്യന്‍ വിഭാഗമാണ് കോള്‍ഗേറ്റ് പാമോലീവ് ഇന്ത്യ.
