ചെലവ് 1,486 കോടി രൂപ. ഇത് ലോകത്തിലെ ഏറ്റവും ഉയരം കൂടിയ റെയിൽവേ പാലമാണ്. ഈഫൽ ടവറിനേക്കാൾ 35 മീറ്റർ ഉയരത്തിൽ. വലിയ സ്ഫോടനത്തെയും റിക്ടർ സ്കെയിലിൽ എട്ടു വരെ വരുന്ന തീവ്രതയുള്ള ഭൂകമ്പത്തെയുമൊക്കെ നേരിടാനായി രൂപകൽപ്പന ചെയ്തിട്ടുള്ളതാണ്.
ജമ്മു കശ്മീരിലെ റിയാസി ജില്ലയിലാണ് ലോകത്തിലെ തന്നെ ഏറ്റവും ഉയരം കൂടിയ ഈ റെയിൽവേപ്പാലം. രാജ്യത്തിൻ്റെ നിർണായക പ്രോജക്ടുകളിൽ ഒന്നാണിത്. ചെനാബ് റെയിൽവേ പാലത്തിൽ ഒന്നിലധികം സുരക്ഷാ ഏജൻസികൾ മോക്ക് ഡ്രിൽ നടത്തിയിരുന്നു.
1.3 കിലോമീറ്ററിലധികം വ്യാപിച്ചുകിടക്കുന്ന ഈ പാലം കശ്മീർ റെയിൽവേ പദ്ധതിയുടെ പ്രധാന ഭാഗമാണ്. ഖത്ര മുതൽ ബനിഹാൽ വരെയാണ് ഈ പദ്ധതി വ്യാപിച്ചുകിടക്കുന്നത്. ഉദംപുർ- ശ്രീനഗർ- ബാരാമുള്ള പ്രദേശങ്ങളിലെ 111 കിലോമീറ്റർ വരുന്ന റെയിൽവേ പ്രോജക്ടിലെ നിർണായക പദ്ധതികളിൽ ഒന്നാണിത്.
റിയാസിയിലെ ജില്ലാ പോലീസും വിവിധ സുരക്ഷാ ഏജൻസികളും ചേർന്ന് ചെനാബ് റെയിൽവേ പാലത്തിൽ രണ്ട് മണിക്കൂറിലധികം നീണ്ടുനിന്ന മോക്ക് ഡ്രിൽ വിജയകരമായി നടത്തി. ഏഴ് സുരക്ഷാ ഏജൻസികൾ ഡ്രില്ലിൽ പങ്കെടുത്തു. പൊലീസ്, സ്പെഷ്യൽ ഓപ്പറേഷൻസ് ഗ്രൂപ്പ്, സെൻട്രൽ റിസർവ് പൊലീസ് ഫോഴ്സ്, ജനറൽ റെയിൽവേ പൊലീസ് എന്നീ സുരക്ഷാ സേനകൾ ഒക്കെ മോക്ക് ഡ്രില്ലിൽ പങ്കെടുത്തു.
കണക്കാക്കുന്നത് 120 വർഷം ആയുസ്
ഒരു എഞ്ചിനീയറിംഗ് വിസ്മയമാണ് ചെനാബ് പാലം, ഉധംപുർ-കത്ര-ഖാസിഗുണ്ട് റൂട്ട് വഴി ബാരാമുള്ളയെ ജമ്മുവിലേക്ക് ബന്ധിപ്പിക്കുന്ന കോൺക്രീറ്റ് പാലമാണിത്. നിർമാണത്തിനായി സ്റ്റീലും ഉപയോഗിച്ചിട്ടുണ്ട്.
ഏകദേശം ആറര മണിക്കൂറാണ് യാത്രാ സമയം. പാരീസിലെ ഈഫൽ ടവറിനേക്കാൾ 35 മീറ്റർ ഉയരത്തിൽ നിൽക്കുന്ന ഈ പാലത്തിന് മണിക്കൂറിൽ 260 കിമീ വരെ വേഗതയുള്ള കാറ്റിനെ അതിജീവിക്കാനാകും. കൂടാതെ 120 വർഷത്തോളം ആയുസ് കണക്കാക്കുന്നുണ്ട്.
2002-ൽ പാലത്തിൻ്റെ നിർമ്മാണം ആരംഭിച്ചെങ്കിലും അപകടകരമായ കാറ്റ് മൂലം ഇടയ്ക്ക് പണി നിർത്തിവെച്ചിരുന്നു. 2008-09-ൽ കാറ്റ് ശക്തമായതിനാൽ റെയിൽ യാത്രക്കാരുടെ സുരക്ഷാ പ്രശ്‌നങ്ങൾ പരിഹരിക്കുന്നതിനായി നിർത്തിവച്ചു. പദ്ധതി 2024-ൽ പൂർത്തീകരിക്കുകയായിരുന്നു.
ഈ വർഷം ജൂൺ 20-നാണ് ഇന്ത്യൻ റെയിൽവേ ചെനാബ് പാലത്തിൽ എട്ട് കോച്ചുകളുള്ള മെമുവിൻ്റെ പരീക്ഷണ ഓട്ടം വിജയകരമായി നടത്തിയത്.
