ഹൈദരാബാദ്: മുംബൈ-അഹമ്മദാബാദ് ഹൈ-സ്പീഡ് റെയില് പദ്ധതിക്കായി ഇന്ത്യന് റെയില്വേ 90,000 കോടി രൂപയുടെ അധികച്ചെലവ് ഏറ്റെടുക്കാന് ഒരുങ്ങുന്നു. 2016-ല് 1.08 ലക്ഷം കോടി രൂപ കണക്കാക്കിയിരുന്ന പദ്ധതിയുടെ ആകെ ചെലവ്, ഭൂമി ഏറ്റെടുക്കലിലെ കാലതാമസവും നിര്മ്മാണ സാമഗ്രികളുടെ വിലക്കയറ്റവും കാരണം ഇപ്പോള് 1.98 ലക്ഷം കോടി രൂപയായി ഉയര്ന്നിരിക്കുകയാണ്. പദ്ധതിയുടെ 83 ശതമാനത്തോളം വരുന്ന ഈ സാമ്പത്തിക വര്ദ്ധനവ് കേന്ദ്ര സര്ക്കാര് നേരിട്ട് വഹിക്കാനാണ് തീരുമാനം.
പദ്ധതിക്കായി നേരത്തെ 88,000 കോടി രൂപ വായ്പ നല്കിയ ജപ്പാന് ഇന്റര്നാഷണല് കോ-ഓപ്പറേഷന് ഏജന്സി, അധികച്ചെലവുകള്ക്ക് പുതിയ വായ്പ നല്കാന് കഴിയില്ലെന്ന് അറിയിച്ചിരുന്നു.
ഈ സാഹചര്യത്തിലാണ് വിദേശ സഹായം കാത്തുനില്ക്കാതെ ബജറ്റ് വിഹിതത്തിലൂടെ തുക കണ്ടെത്താന് സര്ക്കാര് തീരുമാനിച്ചത്. ഇന്ത്യയുടെ ആദ്യ ബുള്ളറ്റ് ട്രെയിന് പദ്ധതി തടസ്സമില്ലാതെ പൂര്ത്തിയാക്കാനുള്ള റെയില്വേ മന്ത്രാലയത്തിന്റെ ശക്തമായ പ്രതിബദ്ധതയാണ് ഈ നീക്കം വ്യക്തമാക്കുന്നത്.
നിര്മ്മാണ പ്രവര്ത്തനങ്ങള് ഇപ്പോള് യുദ്ധകാലാടിസ്ഥാനത്തില് പുരോഗമിക്കുകയാണ്. കണക്കുകള് പ്രകാരം പദ്ധതിയുടെ 57% ജോലികള് പൂര്ത്തിയായിക്കഴിഞ്ഞു. ഗുജറാത്തിലെ സൂറത്തിനും ബിലിമോറയ്ക്കും ഇടയിലുള്ള ആദ്യത്തെ 100 കിലോമീറ്റര് പാതയുടെ ഉദ്ഘാടന ഓട്ടം 2027 ഓഗസ്റ്റ് 15-ന് നടക്കും.
മഹാരാഷ്ട്രയിലെ പാല്ഘര് ജില്ലയിലുള്പ്പെടെയുള്ള ദുര്ഘടമായ തുരങ്ക നിര്മ്മാണങ്ങള് വിജയകരമായി പൂര്ത്തിയാക്കിയത് പദ്ധതിയുടെ വേഗത വര്ദ്ധിപ്പിച്ചിട്ടുണ്ട്. ബുള്ളറ്റ് ട്രെയിന് പാതയ്ക്ക് അപ്പുറം വന്കിട റെയില് ശൃംഖലയാണ് സര്ക്കാര് ലക്ഷ്യമിടുന്നത്. ഇതിന്റെ ഭാഗമായി 16 ആഭ്യന്തര നിര്മ്മിത ട്രെയിന് സെറ്റുകള് വാങ്ങാനുള്ള നടപടികള് ആരംഭിച്ചു.
ജാപ്പനീസ് ഷിങ്കാന്സെന് സാങ്കേതികവിദ്യയ്ക്കൊപ്പം ഇന്ത്യന് കരുത്തും ചേരുന്നതോടെ രാജ്യം അതിവേഗ റെയില്വേയില് സ്വയംപര്യാപ്തത നേടും. കൂടാതെ, രാജ്യത്താകെ 4,000 കിലോമീറ്റര് ദൂരത്തില് ഏഴ് പുതിയ ബുള്ളറ്റ് ട്രെയിന് കോറിഡോറുകള് കൂടി നിര്മ്മിക്കാനുള്ള ബൃഹദ് പദ്ധതിയും സര്ക്കാര് പ്രഖ്യാപിച്ചിട്ടുണ്ട്.
