ന്യൂഡൽഹി: 2023ലെ പാർലമെന്റ് ബജറ്റ് സമ്മേളനം ജനുവരി 31 മുതൽ ആരംഭിച്ച് ഏപ്രിൽ ആറിന് അവസാനിക്കും. സമ്മേളനത്തിന്റെ ആദ്യ ഭാഗം ഫെബ്രുവരി 10 വരെ തുടരുമെന്ന് വിവിധ റിപ്പോർട്ടുകൾ സൂചിപ്പിക്കുന്നു. എല്ലാ വർഷത്തെയും പോലെ ഫെബ്രുവരി ഒന്നിനാണ് ഇത്തവണയും കേന്ദ്ര ധനമന്ത്രി നിർമ്മല സീതാരാമൻ ബജറ്റ് അവതരിപ്പിക്കുക.
ബജറ്റ് സമ്മേളനത്തിന്റെ ആദ്യ ദിവസം തന്നെ സാമ്പത്തിക സർവേയും ഇരുസഭകളിലും അവതരിപ്പിക്കും. പാർലമെന്റിന്റെ സെൻട്രൽ ഹാളിൽ ലോക്‌സഭയുടെയും രാജ്യസഭയുടെയും സംയുക്ത സമ്മേളനത്തിൽ രാഷ്ട്രപതി ദ്രൗപതി മുർമു നടത്തുന്ന പ്രസംഗത്തോടെയാണ് സമ്മേളനം ആരംഭിക്കുന്നത്.
കഴിഞ്ഞ വർഷം ഓഗസ്റ്റിൽ പരമോന്നത പദവിയിലെത്തിയ ശേഷം പ്രസിഡന്റ് മുർമു പാർലമെന്റിന്റെ ഇരുസഭകളെയും അഭിസംബോധന ചെയ്യുന്ന ആദ്യ പ്രസംഗമാണിത്.
ബജറ്റ് സമ്മേളനത്തിന്റെ രണ്ടാം ഭാഗം മാർച്ച് ആറിന് ആരംഭിച്ച് ഏപ്രിൽ ആറിന് അവസാനിച്ചേക്കുമെന്നാണ് റിപ്പോർട്ടുകൾ. ബജറ്റ് സമ്മേളനത്തിന്റെ രണ്ടാം ഭാഗം പുതിയ പാർലമെന്റ് മന്ദിരത്തിൽ നടത്തിയേക്കുമെന്നാണ് സൂചന.
വിവിധ മന്ത്രാലയങ്ങളുടെ ഗ്രാന്റുകളുടെ ആവശ്യങ്ങൾ പരിശോധിക്കാൻ സ്റ്റാൻഡിംഗ് കമ്മിറ്റികൾ ഇടവേള എടുത്തതിന് ശേഷമായിരിക്കും ഇത്.
ബജറ്റ് സമ്മേളനത്തിന്റെ രണ്ടാം ഭാഗത്തിൽ, സർക്കാരിന്റെ നിയമനിർമ്മാണ അജണ്ടയ്ക്ക് പുറമെ വിവിധ മന്ത്രാലയങ്ങൾക്കുള്ള ഗ്രാന്റ് ആവശ്യങ്ങളെക്കുറിച്ചുള്ള ചർച്ചയാണ് പ്രധാനമായും നടക്കുക.
കഴിഞ്ഞ സമ്മേളനത്തിൽ ഒമ്പത് ബില്ലുകൾ ലോക്‌സഭയിൽ അവതരിപ്പിക്കുകയും ഏഴ് ബില്ലുകൾ പാസാക്കുകയും ചെയ്തിരുന്നു. പൊതു തെരഞ്ഞെടുപ്പിന് മുമ്പുള്ള ബജറ്റ് എന്ന നിലയിൽ ഇത്തവണത്തെ കേന്ദ്ര ബജറ്റിന് ഏറെ പ്രാധാന്യമുണ്ട്.
ബജറ്റ് ജനകീയമാകുമോ അതോ രാജ്യത്തിൻെറ സാമ്പത്തിക വളർച്ച ലക്ഷ്യമിട്ടുള്ളതാകുമോ എന്നത് പ്രധാനമാണ്. ഉയരുന്ന പണപ്പെരുപ്പ നിരക്കും ആഗോള മാന്ദ്യ സൂചനകളും ഒക്കെ വെല്ലുവിളി ഉയർത്തുന്ന ഒരു സാഹചര്യത്തിലാണ് കേന്ദ്ര ബജറ്റ് അവതരണം.
വിലക്കയറ്റം തടയാൻ നടപടി ഉണ്ടാകുമോ, ആദായ നികുതി പരിധി ഉയർത്തുമോ നികുതി ഘടന പരിഷ്കരിക്കുമോ തുടങ്ങി സാധാരണക്കാരും കോർപ്പറേറ്റുകളും ഒക്കെ പ്രതീക്ഷയോടെ നോക്കിയിരിക്കുന്ന ഒട്ടേറെ വിഷയങ്ങളുണ്ട്. അ
തേസമയം കഴിഞ്ഞ മൂന്ന് വർഷമായി സർക്കാർ പ്രഖ്യാപിച്ച സാമ്പത്തിക പരിഷ്കാരങ്ങളിൽ ചിലത് സാമ്പത്തിക വളർച്ച ശക്തിപ്പെടുത്തി എന്ന് വിദഗ്ധർ ചൂണ്ടിക്കാട്ടുന്നു.
