മുംബൈ: 2022 സെപ്റ്റംബറിൽ അവസാനിച്ച പാദത്തിൽ കമ്പനിയുടെ ഏകീകൃത അറ്റാദായം 4.7 ശതമാനം ഇടിഞ്ഞ് 115.05 കോടി രൂപയായി കുറഞ്ഞതായി ബിർളാസോഫ്റ്റ് അറിയിച്ചു. ഈ ഫലത്തോടെ കമ്പനിയുടെ ഓഹരി 2.14 ശതമാനം ഇടിഞ്ഞ് 276.05 രൂപയിലെത്തി.
2022 സാമ്പത്തിക വർഷവുമായി താരതമ്യം ചെയ്യുമ്പോൾ, കമ്പനിയുടെ അറ്റാദായവും വരുമാനവും യഥാക്രമം 11.6 ശതമാനം, 17.8 ശതമാനം എന്നിങ്ങനെ ഉയർന്നു. ഈ കാലയളവിലെ നികുതിക്ക് മുമ്പുള്ള ഏകീകൃത ലാഭം 147.16 കോടി രൂപയാണ്.
രണ്ടാം പാദത്തിൽ സ്ഥാപനത്തിന്റെ ഇബിഐടിഡിഎ 176.4 കോടി രൂപയായിരുന്നു, ഇത് 3.9% വളർച്ച രേഖപ്പെടുത്തി. അതേസമയം ഇബിഐടിഡിഎ മാർജിൻ 14.8% ആയി കുറഞ്ഞു. പ്രസ്തുത കാലയളവിൽ മൊത്തം 166 മില്യൺ ഡോളറിന്റെ ഓർഡറുകൾ ലഭിച്ചതായി കമ്പനി അറിയിച്ചു. കൂടാതെ ബിർളാസോഫ്റ്റിന് 301 സജീവ ഉപഭോക്താക്കളുണ്ട്.
അതേസമയം, 2022-23 സാമ്പത്തിക വർഷത്തേക്ക് ഒരു ഇക്വിറ്റി ഷെയറിന് 1.50 രൂപ ഇടക്കാല ലാഭവിഹിതം കമ്പനിയുടെ ബോർഡ് അംഗീകരിച്ചു. സികെ ബിർള ഗ്രൂപ്പിന്റെ ഭാഗമായ ബിർളാസോഫ്റ്റ്, വിവിധ വ്യവസായങ്ങളിൽ ഉടനീളമുള്ള സ്ഥാപനങ്ങൾക്ക് ഡിജിറ്റൽ, ഇൻഫർമേഷൻ ടെക്നോളജി കൺസൾട്ടിംഗ്, സേവനങ്ങൾ, ഉൽപ്പന്നങ്ങൾ എന്നിവ നൽകുന്നു.
